SURAT PAULUS NANG KADUA
UNTUꞌ JAMAAT KAꞌ
TESALONIKA
Pangantar
Jamaat kaꞌ Tesalonika bingung barang ia kaꞌ koa napeꞌ nauꞌan ahe nang tajajiaꞌ kaꞌ kaatangan Tuhan Yesus kadua kalinya. Ada dari nya kaꞌ koa nang bakata kadeꞌ kaatangan Yesus kadua kalinya dah atakng. Ada ugaꞌ nang inaꞌ agiꞌ bakaraja jukut ia kaꞌ koa bakata kadeꞌ Tuhan Yesus atakngngaꞌ sabantar agiꞌ.
Jaji Paulus nyonteng surat nian untuꞌ ia kaꞌ koa biar ia kaꞌ koa batol-batol nauꞌan ajaran nang banar tentang hal-hal nian. Paulus nantuatn untuꞌ ia kaꞌ koa kadeꞌ Yesus Karistus napeꞌ atakng, katanya: sanapeꞌ Karistus atakng kadua kalinya, arus atakng saurakng nang dinyabut: “Talino Jahat”. Gara-gara pakarajaatn Talino Jahat koa, samua urakng-urakng kaꞌ dunia ngalamiaꞌ manyak kasusahatn.
Kaꞌ dalapm surat nian, Paulus mintaꞌ kaꞌ urakng Tesalonika biar ia kaꞌ koa batahan dalapm kasusahatn nang di nya kaꞌ koa ngalamiꞌ tagal kapucayaꞌatn nya kaꞌ Yesus. Paulus ngajar biar ia kaꞌ koa masing-masing bakaraja untuꞌ biaya idup nya kaꞌ koa, sama lea Paulus man ayukng-ayukngnya. Ugaꞌ biar ia kaꞌ koa tatap babuat edoꞌ.
Isi
Pamulaꞌant 1:1-2
Pujian man nasehat 1:3-12
Panjalasan tentang kaatangan Karistus kaꞌ dunia ontoꞌ kadua kalinya 2:1-17
Nasehat leamae saarusnya kalakuan urakng Karisten 3:1-15
Panutup 3:16-18