SURAT PAULUS NANG PAMULAꞌATN
UNTUꞌ JAMAAT KAꞌ
TESALONIKA
Kata pamulaꞌatn nang nyalasatn isiꞌ surat
Tesalonika nian ibukota Makedonia, propinsi karajaan Roma. Deꞌe Paulus dari Pilipi ampus kaꞌ Tesalonika nyampeatn Kabar Baik, sampe ada urakng-urakng koa nang pucayaꞌ kaꞌ Tuhan Yesus (Gesah Rasul-Rasul 17:1-4). Tapi inaꞌ lama lakaꞌ koa, ada urakng-urakng Yahudi nang rusiꞌ ati kaꞌ Paulus. Ia kaꞌ koa mulaiꞌ nantakng pakarajaatn Paulus untuꞌ ngesahatn ajaran Kabar Baik tentang Yesus Karistus kaꞌ urakng-urakng bukeꞌ Yahudi. Tagal tantangannya kaꞌ koalah Paulus tapaksa ningalatn Tesalonika man ampus kaꞌ Berea. Takaꞌ ia namus kaꞌ Korintus, ia narimaꞌ surat dari Timotius, ayukng sakarajanya, tentang kaadaan jamaat kaꞌ Tesalonika.
Kaꞌ dalapm surat nian, Paulus nguatatn kapucayaꞌatn urakng Tesalonika biar ia kaꞌ koa batahan kaꞌ dalapm kasusahatn. Paulus ngingatiꞌ ia kaꞌ koa tentang kaidupatnnya babaro takaꞌ ia masih ada kaꞌ antara nya kaꞌ koa. Lakaꞌ madahatn sigananya koa, Paulus nyahutiꞌ pertanyaꞌa nya kaꞌ koa tentang kaatangan Karistus nang kadua kalinya. Kadeꞌ urakng pucayaꞌ mati sanapeꞌ Karistus atakng agiꞌ, baya keꞌ urakng koa narimaꞌ idup nang salama-lamanya dari Karistus? Kamile Karistus atakngngaꞌ? Paulus nasehatiꞌ biar ia kaꞌ koa tatap bakaraja man ati nang tanang sambil ngantiꞌatn kaatangan Karistus nang panuh harapan.
Isi
Pamulaatn 1:1
Sukur man pujian 1:2—3:13
Nasehat lemae saarusnya kalakuan urakng Karisten 4:1-12
Panjalasan tantang kaatangan Karistus nang kadua kalinya 4:13—5:11
Nasehat-nasehat pangabisatn 5:12-22
Penutup 5:23-28