SURAT PAULUS UNTUꞌ JAMAAT KAꞌ
KOLOSE
Pangantar
Kolose nian kota kaꞌ Asia Enek, sabalah timur kota Epesus. Bukeꞌ Paulus nang madiri jamaat kaꞌ Kolose nian, tapi takaꞌ ia ngiripm palayan dari Epesus, ibukota propinsi Roma kaꞌ Asia Enek, ia marasa batanggong jawap ugaꞌ kaꞌ jamaat Kolose koa. Paulus dah narimaꞌ kabar kadeꞌ kaꞌ dalapm jamaat koa ada guru-guru nang ngajaratn ajaran-ajaran nang salah. Guru-guru koa bakaras kadeꞌ untuꞌ nganal Allah man pasti salamat, urakng arus nyambah “roh-roh nang nguasaiꞌ man marentah aiꞌ tanah.” Kata guru-guru koa ugaꞌ, urakng aruslah taat nyalanan paraturan-paraturan tentang babalak, balalaꞌ man nang lainnya. Surat Paulus kaꞌ jamaat Kolose nian dinyonteng untuꞌ nyelasatn ajaran pucayaꞌ nang banar man nantang ajaran-ajaran salah nang di guru-guru palsu koa ngajaratn. Inti dari surat nian, kadeꞌ Yesus Karistus sanggup mareꞌ kasalamatan nang pasti man kadeꞌ ajaran-ajaran nang lainnya koa kahe manjawat urakng jauh dari Karistus. Lewat Karistus, Allah nampaꞌ aiꞌ tanah nian, man lewat Karistus ugaꞌ Allah nyalamatatnnya. Kahe lewat Karistus, arapan dunia untuꞌ disalamatatn. Baruꞌ Paulus nyelasatn hubungan antara ajaran nang agung koa man kaidupatn urakng pucayaꞌ. Palalu ditambahatn kaꞌ dian kadeꞌ Tikhikus --nang ngincakng surat nian kaꞌ Kolose untuꞌ Paulus --nang di Onesimus ngayukngiꞌ, amba nang di Paulus nyuruh untuꞌ mulakng kaꞌ tuannya Pilemon, saurakng anggota jamaat kaꞌ Kolose.
Isi
Pendahuluan 1:1-8
Sipat man tindakkan Karistus 1:9- ; 2:19
Idup baharu nang dingalami urakng-urakng Karisten 2:20 -; 4:6
Panutup 4:7-18