4
Jaji Sodara-sodaraku, lea nang dah aku ngataatn kaꞌ kitaꞌ, iduplah tatap pucayaꞌ kaꞌ Tuhan Yesus. Aku sidi kasih man rehoꞌ kaꞌ kitaꞌ! Sidi repo man bangganya aku kaꞌ kitaꞌ!Nasehat-nasehat pangabisatn
4:2-9
2 Euodia man Sintike ku nasehatiꞌ, biar saati sapikir barang lea koalah urakng nang pucayaꞌ kaꞌ Tuhan Yesus. 3 Jaji ku mintaꞌ kaꞌ kao, Sunsugos, ayukng ku nang setia, bantoꞌlah kadua nangbini koa. Tagal nyadua koa dah bajuang man aku untuꞌ ngesahatn Kabar Baik, sama-sama man Klemen man ayukng-ayukng sakarajaku nang lain, nang dama-damanya ada dalapm kitap kaidupatn.
4 Barepo-repolah kitaꞌ nang dah soteꞌ man Tuhan! Sakali agiꞌ aku bakata: Barepo-repolah! 5 Kiraꞌnya kabaikatn ati kitaꞌ di samua urakng tauꞌatn. Tagal Tuhan Yesus inaꞌ lama agiꞌ atakngaꞌ. 6 Amelah kuatir tentang aheaꞌ maꞌan, tapi badoꞌalah untuꞌ sigana hal. Sampeatnlah kamaoꞌan kitaꞌ kaꞌ Allah dalapm doꞌa man ngucapatn sukur. 7 Jaji dame sejahtera dari Allah nang inaꞌ mungkin baya di talino ngarati, nyagaaꞌ isiꞌ ati man pikiran kitaꞌ tagal kitaꞌ pucayaꞌ kaꞌ Karistus Yesus.
8 Jaji, sodara-sodara pikirlah samuanya nian, samua nang banar, samua nang pantas, samua nang adil, samua nang baraseh, samua nang ngarepoatn, samua nang nyaman didangngar, samua nang disabut kabaikatn man patut dipuji. 9 Jalananlah ahe nang dah kitaꞌ palajariꞌ man tarimaꞌ dari aku, baik dari kata-kata maoꞌpun dari ahe nang dah ku manjawat. Allah sumber sejahtera, nyarataiꞌaꞌ kitaꞌ.
Tarimaꞌ kasih untuꞌ pamareꞌ jamaat
4:10-20
10 Aku sidi repo man basukur kaꞌ Tuhan, kadeꞌ ahirnya pikiran kitaꞌ man parasaan kitaꞌ tumuh agiꞌ untuꞌ ku. Memang kitaꞌ kaja maratiatn aku, tapi inaꞌ ada kasampatan untuꞌ kitaꞌ nojokatnnya. 11 Aku ngataatn nian bukeꞌlah tagal kakurangan, jukut aku dah balajar nyukupiꞌ diriꞌ dalapm sigana kaadaan. 12 Aku nauꞌan ahe koa kakurangan man aku nauꞌan ahe koa kalimpahan. Kaꞌ tiap kaadaan man dalapm sigana hal inaꞌ ada hal nang jaji rahasia untuꞌ ku, baik dalapm kaadaan kanyang, maoꞌpun dalapm kaadaan kaparatn, baik dalapm kaadaan bakalimpahatn maoꞌpun dalapm kaadaan bakakurangan. 13 Aku bisa ngadapiꞌ sigana kaadaan tagal Karistus kaja mareꞌ kakuatan kaꞌ aku. 14 Biarpun lekoa, aku batarimaꞌ kasih kaꞌ kitaꞌ nang dah mantoꞌ dalapm kasusahatn ku ampeatn nian.
15 Sodara-sodaraku urakng Pilipi! Takaꞌ aku nyebaratn Kabar Baik untuꞌ pertama kalinya kaꞌ kitaꞌ, kitaꞌlah jamaat nang mareꞌ bantuan duit kaꞌ aku lakaꞌ aku ninggalatn Makedoniaa. 16 Takaꞌ aku kaꞌ Tesalonika pun kitaꞌ dah sakali dua kali ngiripm bantuan kaꞌ aku.bc 17 Tapi bukeꞌ pamareꞌ koa nang ku ngagoꞌ, aku maoꞌ neleꞌ Allah marakatiꞌ kitaꞌ labih ayaꞌ agiꞌ. 18 Samua kapalaluanku dah di panuhiꞌ, bahkan balabih, tagal Epaproditus dah ngantat pamareꞌ kitaꞌ kaꞌ aku. Pamareꞌ kitaꞌ koa jaji persembahan nang harum kaꞌ Allah. Ia dah narimaꞌ persembahan koa man di-Nya nyukaiꞌ.d 19 Allahku nyukupatnnaꞌ sigana kapalaluan kitaꞌ nurut kakayaan-Nya nang balimpah-limpah lewat Karistus Yesus. 20 Dipujilah Allah Apaꞌ diriꞌ salama-lamanya! Amin.
Salam pangabisatn
4:21-23
21 Salam hormatku kaꞌ urakng-urakng pucayaꞌ kaꞌ Karistus Yesus. Man tarimalah ugaꞌ salam dari sodara-sodara sakapucayaꞌatn man aku kaꞌ dian. 22 Samua umat Allah, kususnya ia kaꞌ koa nang bakaraja kaꞌ istana Kaisar, ugaꞌ ngiripm salam kaꞌ kitaꞌ samua.
23 Kiraꞌnya kabaikatn ati Tuhan Yesus Karistus nyarataiꞌ kitaꞌ. Hormat kami, Paulus man Timotius.