SURAT PAULUS UNTUꞌ JAMAAT KAꞌ
EPESUS
Pangantar
Surat Paulus untuꞌ jamaat kaꞌ Epesus, nyontengan rencana Allah biar “Samua alam, baik nang kaꞌ saruga maoꞌpun nang kaꞌ aiꞌ tanah, jaji soteꞌ man Karistus nang jaji kapala” (1:10). Surat nian ugaꞌ maba umat Allah biar ia kaꞌ koa ngarati maꞌna rencana agung dari Allah koa untuꞌ nyoteꞌatn sigana umat talino lewat Yesus Karistus. Kaꞌ bagian pamulaꞌatn surat Epesus nian dimadahatn lemae hal koa terjadi. Untuꞌ nyelasatn hal koa ia ngesahatn lemae Allah Apaꞌ dah milih umat-Nya, lemae Allah lewat Yesus Karistus, Anak-Nya, ngamponiꞌ man mebasatn umat-Nya dari dosa, man lemae janji Allah koa di Roh Kudus tanggong.
Kaꞌ dalapm bagian kadua, dinyontengan kaꞌ urakng-urakng nang macanya biar ia kaꞌ koa idup rukun. Biar ia kaꞌ koa soteꞌ dalapm karukunan lea umat nang pucayaꞌ kaꞌ Karistus baya tajaji. Untuꞌ nojokatn kadeꞌ umat Allah dah jaji soteꞌ man Karistus, panulis make sangahe parumpamaan. Jamaat tubuh-Nya man Karistus kapala-Nya, ato lea sabuah bangunan nang batu sendinya ialah Karistus ato lea saurakng bini man Karistus lakinya. Panulis sidi iba takaꞌ ngingat rahmat Allah lewat Karistus, sampe-sampe kata-kata nang dinya pake dalapm suratnya nojokatn kadeꞌ atinya siaꞌ malimpah man rasa sukur man pujian kaꞌ Tuhan. Samua hal diteleꞌ dari kasih Karistus, dari pangorbanan-Nya, pangamponan-Nya, kabaikatn ati-Nya, man kasuciatn-Nya.
Isi
Pendahuluan 1:1-2
Karistus man gareja-Nya 1:3; 3:21
Kaidupaꞌtn nang baharu sebagai urakng Karisten 4:1; 6:20
Panutup 6:21-24