SURAT PAULUS UNTUꞌ JAMAAT KAꞌ
EPESUS
Salam
1:1-2
1
Dari Paulus, rasul Yesus Karistus tagal kamaoꞌan Allah, untuꞌ urakng-urakng Epesus nang kudus kaꞌ dalapm Yesus Karistus. a 2 Kabaikatn ati Allah man idup nang panuh dame dari Allah, Apaꞌ diriꞌ man dari Tuhan Yesus Karistus nyarataiꞌ kitaꞌ.Kakayaatn urakng-urakng nang dimilih
1:3-14
3 Dipujilah Allah nang di Tuhan diriꞌ Yesus Karistus nyaruꞌ Apaꞌ, Ia marakatiꞌ diriꞌ man sigana barakat rohani kaꞌ dalapm saruga, tagal diriꞌ bersatu man Karistus. 4 Tagal Allah dah milih diriꞌ sanapeꞌ dunia nian di nampaꞌ, ratinya Ia dah ngasihiꞌ diriꞌ man ngarancanaan biar diriꞌ dikudusatn man inaꞌ basalah kaꞌ adapatn-Nya tagal diriꞌ dah dipersatukan man Karistus. 5 Sanapeꞌ dunia nian dinampaꞌ Allah dah natapatn diriꞌ untuꞌ diangkat jaji anak-anak-Nya lewat Yesus Karistus, pas man kamaoꞌan-Nya, 6 jaji diriꞌ muji Allah tagal kabaikatn ati-Nya nang mulia, nang dah dimareꞌatn kaꞌ diriꞌ toaꞌ-toaꞌ tagal diriꞌ soteꞌ man Anak-Nya nang di Nya ngasihiꞌ. 7 Tagal man kamatiatn Karistus, diriꞌ di Allah mebasatn, ratinya Ia dah ngamponiꞌ diriꞌ dari dosa-dosa diriꞌ.b 8 Ia manjawatnya koa tagal Ia sidi ngasihiꞌ diriꞌ, kasih koa kasih nang panuh kapanean man pangaratian nang di-Nya ngalimpahatn kaꞌ diriꞌ. 9 Nurut kamaoꞌan-Nya babaro, Allah madahatn kaꞌ diriꞌ rahasia rencana-Nya. Ia dah mutusatn kadeꞌ rencana-Nya koa di-Nya panuhiaꞌ melaluiꞌ Karistus. 10 Ia dah ngaturnya biar kadeꞌ naꞌe dah sampe waꞌtunya, sigana nang kaꞌ aiꞌ tanah man kaꞌ saruga Nya nyoteꞌatn kaꞌ dalapm Karistus nang mimpinaꞌ sigananya koa. 11 Allah ngarajaatn samuanya nurut kamaoꞌan-Nya man kaputusan-Nya babaro. Dari samula Ia dah milih diriꞌ barang Ia maoꞌ biar diriꞌ jaji umat-Nya tagal soteꞌ man Karistus. 12 Jaji diriꞌlah nang pamulaꞌatn jaji umat-Nya nang baarap kaꞌ Karistus, diriꞌ dapat muji Allah tagal kaagungan-Nya. 13 Kitaꞌ pun dah jaji umat Allah waꞌtu kitaꞌ nangngar pasatn nang banar dari Allah, yakoa Kabar Baik nang mareꞌ kasalamatan kaꞌ kitaꞌ. Kitaꞌ pucayaꞌ kaꞌ Karistus, tagal koa Allah mareꞌatn Roh Kudus nang dah di-Nya nyanjiatn kaꞌ kitaꞌ jaji tanda kadeꞌ kitaꞌ di Allah ngampuꞌ. 14 Roh Kudus koalah jaminan kadeꞌ diriꞌ narimaꞌaꞌ ahe nang dah di Allah nyanjiatn kaꞌ umat-Nya. Nian mareꞌ kayakinan kaꞌ diriꞌ kadeꞌ Allah mebasatnnaꞌ umat-Nya.
Dipujilah Allah tagal kaagungan-Nya.
Doꞌa Paulus
1:15-23
15 Tagal koa waꞌtu aku nangngar kadeꞌ kitaꞌ pucayaꞌ kaꞌ Tuhan Yesus man kitaꞌ ngasihiꞌ samua umat Allah, 16 aku pun inaꞌ putus-putusnya batarimaꞌ kasih kaꞌ Allah tagal kitaꞌ. Aku kaja nyabut dama kitaꞌ waꞌtu aku badoꞌa. 17 Aku bapintaꞌ biar Allah diriꞌ dari Tuhan Yesus Karistus, Apaꞌ nang mulia, mareꞌ Roh-Nya kaꞌ kitaꞌ. Roh koa nyajiatnnaꞌ kitaꞌ bijaksana man mandahatnnaꞌ tentang Allah kaꞌ kitaꞌ biar kitaꞌ nganal Ia. 18 Aku bapintaꞌ kaꞌ Allah biar Ia mukaꞌ pikiran kitaꞌ biar jaji tarakng, biar kitaꞌ ngarati kaꞌ ahe nang kitaꞌ baya arapatn dari Allah nang nyaruꞌ kitaꞌ. Ugaꞌ biar kitaꞌ nauꞌan sidi balimpahnya barakat-barakat nang mulia nang di Allah nyiapatn untuꞌ umat-Nya. 19 Man sidi kuat koasa-Nya bakaraja kaꞌ dalapm diriꞌ urakng nang pucayaꞌ pas man kakuatatn koasa-Nya, 20 nang di-Nya make takaꞌ ngidupatn Yesus Karistus dari kamatiatn man mareꞌatn kaꞌ Ia kadudukatn nang miah tingi sama-sama man Allah kaꞌ saruga.c 21 Kadudukatn Karistus koa jauh labih tingi daripada kadudukatn sigana pamarentah, sigana panguasa, sigana pamimpin, sigana tuan-tuan man saepun ugaꞌ nang dimareꞌ kadudukatn tingngi, baik nang idup kaꞌ jaman nian maoꞌpun nang idup kaꞌ jaman nang atakngngaꞌ ana. 22 Man Allah ngalakaꞌatn sigana hal kaꞌ babah kuasa Karistus, ugaꞌ nyajiatn Ia kapala kaꞌ atas sigana pakomoꞌan jamaat Karistus untuꞌ mimpin ia kaꞌ koa dalapm sigana hal.d 23 Jamaat koa tubuh-Nya, Ia nyukupiꞌ jamaat kaꞌ dalapm sigana hal lea tubuh-Nya.e