Dari kamatiatn nuju kaidupatn
2:1-10
2
Deꞌe kitaꞌ dah mati tagal palanggaran-palanggaran man dosa-dosa kitaꞌ. 2 Tagal waꞌtu koa kitaꞌ kaja nunaꞌan cara pikir dunia nian man nurutiꞌ kamaoꞌan roh jahat, nang ampeatn tagah marentah kaꞌ atas samua koasa galap kaꞌ dunia. Ialah nang bakoasa kaꞌ dalapm kaidupatn samua urakng nang baiꞌ ngasiꞌ kaꞌ Allah. 3 Deꞌe diriꞌ samua ugaꞌ idup lea ia kaꞌ koa, diriꞌ idup nurutiꞌ tabiat talino diriꞌ man manjawat ahe nang ngarepoatn tubuh man ati pikiran diriꞌ. Waꞌtu koa diriꞌ urakng-urakng nang arus namu ukuman dari Allah sama lea urakng-urakng lain ugaꞌ. 4 Tapi tagal Allah nang sidi panyayang man panuh balas kasihatn, Ia ngasihatniꞌ diriꞌ man kasih nang di-Nya madahatn secara luar biasa, 5 kaꞌ waꞌtu diriꞌ masih dalapm kaadaan mati rohani tagal palanggaran-palanggaran diriꞌ, Allah ngidupatn diriꞌ agiꞌ sama-sama man Karistus. Jaji tagal kabaikatn ati Allah ihan diriꞌ di-Nya nyalamatatn.a 6 Tagal diriꞌ soteꞌ man Yesus Karistus, Allah ngidupatn diriꞌ sama-sama man Ia, biar diriꞌ marentah ugaꞌ sama-sama man Ia kaꞌ dalapm saruga. 7 Allah manjawatnya koa, biar kaꞌ jaman nang atakngngaꞌ talino baya neleꞌ sidi ayaꞌnya kasih Allah. Kasih koa di Allah madahatn lewat kabaikatn ati-Nya kaꞌ diriꞌ man melaluiꞌ Yesus Karistus. 8 Allah nyalamatatn kitaꞌ bukeꞌlah tagal ahe nang dah di kitaꞌ manjawat. Tapi Ia mareꞌatnnya jaji adiah untuꞌ kitaꞌ tagal kitaꞌ pucayaꞌ kaꞌ Yesus Karistus, 9 koa bukeꞌ asil pakarajaatnnyu, biar inaꞌ ada saurakngpun nang bangga kaꞌ diriꞌnya. 10 Diriꞌ lah tampaꞌatn baharu Allah. Lewat pakomoꞌan diriꞌ man Yesus Karistus, Allah dah nampaꞌ diriꞌ biar diriꞌ ngarajaatn hal-hal nang baik. Ia dah nyiapatn hal-hal koa jauh sanapeꞌnya untuꞌ diriꞌ karajaatn sapanyakng idup diriꞌ.Dinyoteꞌatn dalapm Karistus
2:11-22
11 Tagal koa ingatlah kadeꞌ deꞌe kitaꞌ bukeꞌ urakng Yahudi secara jasmani, nang dinyabut urakng-urakng nang inaꞌ babalak di nya kaꞌ koa nang madahatn diriꞌnya “Babalak” ia kaꞌ koa babalak secara jasmani nang dikokot talino manjawat. 12 Sanapeꞌ kitaꞌ kanal kaꞌ Karistus, kitaꞌ inaꞌ ada harapan untuꞌ jaji warga karajaan Allah yakoa umat Israel nang baharu secara rohani. Waꞌtu koa kitaꞌ sama sakali inaꞌ namu bagiatn kaꞌ dalapm perjanjian-perjanjian Allah kaꞌ umat-Nya sampe kitaꞌ idup kaꞌ dunia nian inaꞌ ada arapan man inaꞌ kanal kaꞌ Allah. 13 Deꞌe kitaꞌ memang jauh dari Allah. Tapi ampeatn Karistus dah bakorban mati kaꞌ kayu salib, man ngaluaratn darah-Nya untuꞌ kitaꞌ. Jaji ampeatn kitaꞌ dah samak man Allah. 14 Tagal Karistuslah dame sejahtera diriꞌ. Ia nang dah nyoteꞌatn bangsa Yahudi man bangsa bukeꞌ Yahudi jaji soteꞌ bangsa. Dinikng pamisah kaꞌ antara ia kaꞌ koa, yakoa pamusuhatn, dah di Karistus ngancuratn man cara ngorbantatn diriꞌ-Nya babaro. 15 Lewat kamatiatn-Nya kaꞌ kayu salip Karistus dah ngapus ukum Torat Yahudi man sigana parentahnya. Man hal koa Ia nyajiatn soteꞌ kadua bangsa koa jaji manunsia nang baharu man baya idup kaꞌ dalapm dame, tagal Karistus dah nyoteꞌatn ia kaꞌ koa man diriꞌ-Nya. b 16 Man kamatiatn-Nya kaꞌ salip, Karistus nyoteꞌatn dua bangsa koa jaji soteꞌ tubuh man madameannya man Allah sampe bamunsuhatn koa lanyap.c 17 Koa tagalnya Karistus atakng untuꞌ nyampeatn Kabar Baik tentang dame sejahtera koa kaꞌ kitaꞌ, baik kaꞌ kitaꞌ urakng nang bukeꞌ Yahudi nang deꞌenya jauh man Allah, maoꞌpun kaꞌ urakng Yahudi nang samak man Allah.d 18 Ampeatn lewat pangorbanan nang dah di Karistus manjawat, diriꞌ samua ngampuꞌ hak untuꞌ atakng kaꞌ Apaꞌ diriꞌ lewat Roh Kudus nang ada kaꞌ dalapm diriꞌ masing-masing. 19 Tagal koa kitaꞌ bukeꞌ agiꞌ tamasok urakng asing ato urakng luar. Kitaꞌ ampeatn sama-sama warga umat Allah, kitaꞌlah anggota-anggota kaluarga Allah, 20 nang dimadiri kaꞌ atas dasar rasul-rasul man nabi-nabi. Yesus Karistuslah nang jaji batu nang paling panting, 21 Ialah nang nyusutn sigana bangunan koa jaji Rumah Allah nang kudus kaꞌ dalapm Tuhan. 22 Tagal pakomoꞌan kitaꞌ man Karistus, kitaꞌ dari bangsa maeaꞌ maꞌan sama-sama dibangun jaji tampat kadiaman Allah man Roh-Nya nang kudus.