Pakarajaatn Paulus untuꞌ urakng nang bukeꞌ urakng Yahudi
3:1-13
3
Koalah tagalnya, aku Paulus, di minjara tagal Karistus Yesus untuꞌ kitaꞌ urakng-urakng nang bukeꞌ urakng Yahudi. 2 Tantunya kitaꞌ dah nangngar kadeꞌ Allah, tagal kabaikatn ati-Nya, dah mareꞌatn kaꞌ aku tugas nian untuꞌ kapantingan kitaꞌ. 3 Allah madahatn rahasia rencana-Nya man madahatnnya kaꞌ aku. (Tentang hal nian kaꞌ atas dah kunyontengan sabebet. 4 Man kadeꞌ kitaꞌ macanya, kitaꞌ baya ngarati ahe nang kupahamiꞌ tentang rahasia nang deꞌe nang di Allah ngarahasiaꞌatn kaꞌ talino yakoa rahasia tentang Karistus.) 5 Deꞌe rahasia koa inaꞌ suah dipadahatn kaꞌ talino, tapi ampeatn Roh Kudus Allah dah neleꞌatnnya kaꞌ rasul-rasul man nabi-nabi nang dah di-Nya milih, 6 man nianlah rahasia koa: sigana urakng nang bukeꞌ bangsa Yahudi nang pucayaꞌ kaꞌ Kabar Baik tentang Yesus Karistus sama-samaaꞌ jaji waris karajaan Allah, lea nang Allah nyanjiatn untuꞌ urakng Yahudi.Kaduanya lea anggota soteꞌ tubuh man sama-sama narimaꞌ samua janji Allah untuꞌ umat-Nya.a 7 Tagal koasa man kabaikatn ati Allah, aku dah jaji amba-Nya nang dimarentahatn untuꞌ ngesahatn Kabar Baik koa. 8 Kaꞌ antara samua umat Allah akulah nang paling hina. Tapi Allah dah basikap baik kaꞌ aku, aku di-Nya marentahatn untuꞌ nyampeatn kaꞌ urakng-urakng nang bukeꞌ urakng Yahudi tentang Kabar Baik tentang kakayaatn nang di diriꞌ narimaꞌ dari Karistus nang sidi luar biasa. 9 Man ugaꞌ lewat aku, biar samua urakng nauꞌan lemae Allah panampaꞌ sigananya, nyalanan rencana-Nya nang dah dari deꞌe di nosokatn untuꞌ dunia. 10 Maksut Allah biar ampeatn lewat jamaat, panguasa-panguasa kaꞌ saruga nauꞌan kapanean Allah dalapm sigana hal. 11 Koalah tujuan man rencana-Nya dari samula nang dah di-Nya nyalanan lewat Karistus Yesus Tuhan diriꞌ. 12 Kaꞌ dalapm Karistus diriꞌ namu kabaranian man maraga nyamakiꞌ Allah lewat iman kapucayaꞌatn diriꞌ kaꞌ Ia. 13 Tagal koa aku mintaꞌ kaꞌ kitaꞌ, amelah tawar ati neleꞌ kasingsaraatnku tapi sabaliknya jajilah bangga barang kasingsaraatnku nian untuꞌ kapantingan kitaꞌ.
Doꞌa Paulus
3:14-21
14 Koalah tagalnya aku balutut badoꞌa kaꞌ Apaꞌ, 15 dari-Nya samua kaluarga nang kaꞌ dalapm saruga man kaꞌ atas aiꞌ tanah narimaꞌ dama-Nya. 16 Aku badoꞌa biar Ia nurut kakayaan-Nya nang mulia, nguatatn kitaꞌ man koasa lewat Roh Kudus kaꞌ dalapm ati kitaꞌ, 17 Tagal kitaꞌ pucayaꞌ kaꞌ Karistus, Ia badiapm kaꞌ dalapm ati kitaꞌ, man idup kitaꞌ didasaratn man dikoasaiꞌ di Kasih. 18 Aku badoꞌa biar kitaꞌ sama-sama man sigana umat Allah, kitaꞌ mampu nyalapmiꞌ sidi lebar, panyakng, tingi man dalapmnya kasih Karistus. 19 Kasih-Nya koa inaꞌ baya dipahamiꞌ secara lengkap, tapi aku badoꞌa biar kitaꞌ ngarasa kasih-Nya koa, sampe kitaꞌ baya diisiꞌ dalapm sigana kapanuhan Allah. 20 Tapujilah Allah nang dapat manjawat sigana hal nang balimpah, lea nang diriꞌ doꞌaatn man pahamiꞌ jauh ngalabihiꞌ nang dah nyata dari kuasa nang bakaraja kaꞌ dalapm diriꞌ, 21 untuꞌ Ialah kamuliaatn kaꞌ dalapm jamaat man kaꞌ dalapm Karistus Yesus turun-temurun sampe salama-lamanya. Amin.