Soteꞌ tubuh
4:1-16
4
Koa tagalnya aku, urakng nang di minjara tagal ngalayaniꞌ Allah nasehatiꞌ kitaꞌ, biar kitaꞌ bajalatn pas man ahe nang di Tuhan nyaruꞌatn kaꞌ diriꞌ. 2 Kiraꞌnya kitaꞌ rendah ati, babuat baik kaꞌ urakng, man sabar. Tojokatnlah kasihnyu man kajah babantoꞌ.a 3 Man barusahalah mihara kasatuan Roh Kudus nang di ngikat man dame sejahtera: 4 soteꞌ tubuh, man soteꞌ Roh Kudus Allah, lea koa ugaꞌ kitaꞌ dinyaruꞌ kaꞌ soteꞌ harapan nang sama, 5 soteꞌ Tuhan, soteꞌ iman, soteꞌ baptisan, 6 man soteꞌ nang jaji Apaꞌ samua urakng. Ialah Tuhan dunia nang bakaraja lewat samuanya, man bakuasa kaꞌ dalapm samuanya. 7 Tapi kaꞌ samua kasamaan koa kitaꞌ masing-masing dimareꞌ kamampuan rohani nang babeda-beda di Karistus, pas man kabaikatn ati-Nya kaꞌ diriꞌ. 8 Dalapm Kitap Suci taconteng:“Takaꞌ Ia naik kaꞌ tampat nang paling tingi, Ia ngincakng manyak tawanan;
Ia mareꞌ adiah kaꞌ urakng-urakng.”b
9 Bukeꞌ keꞌ “Ia dah naik” barati Ia ugaꞌ dah turutn kaꞌ bagian aiꞌ tanah nang paling babah? 10 Ia dah turutn, Ia ugaꞌ dah naik jauh labih tingi daripada samua langit untuꞌ manuhiꞌ sigana hal. 11 Ialah nang mareꞌ kamampuan rohani baik kaꞌ rasul-rasul maoꞌpun nabi-nabi, panginjil-panginjil man guru-guru, 12 biar umat Allah dilangkapi sapanuhnya untuꞌ baya ngalayaniꞌ Tuhan man madiri tubuh Karistus, 13 sampe diriꞌ samua jaji soteꞌ dalapm kapucayaꞌatn nang sama man pangaratian nang sama tentang Anak Allah man diriꞌ jaji urakng-urakng nang dewasa nang siaꞌ lama siaꞌ samaaꞌ lea Karistus. 14 Jaji diriꞌ inaꞌ agiꞌ lea kamudaꞌ-kamudaꞌ nang mudah tapangaruh man diincakng kaꞌ kea kaꞌ naun dimacam-macam pangajaran dari urakng-urakng licik. Ia kaꞌ koa nyasatatn urakng man tipu muslihatnya, 15 sabaliknya diriꞌ arus manjawat hal-hal nang banar man ati nang panuh kasih, sampe dalapm sigana hal diriꞌ siaꞌ lama siaꞌ jaji sarupa lea Karistus nang jaji kapala diriꞌ. 16 Dari Karistus sigana tubuh rapi tasusutn man dingikat jaji soteꞌ jukut samua bagian palayanannya kajah tarikat, pas man kakuatatn pakarajaatn tiap-tiap anggota narimaꞌ pertumbuhannya man madiri diriꞌnya dalapm kasih.c
Talino baharu
4:17-32
17 Tagal koa dalapm dama Tuhan Yesus aku ngataatn tegas kaꞌ kitaꞌ: amelah agiꞌ idup lea urakng-urakng nang inaꞌ kanal kaꞌ Allah. Pikirannya kaꞌ koa toaꞌ-toaꞌ 18 man ia kaꞌ koa inaꞌ ngarati ahe-ahe. Ia kaꞌ koa inaꞌ nganal kaidupatn nang di Allah mareꞌ, tagal ia kaꞌ koa inaꞌ nauꞌan ahe-ahe tentang Allah. Ia kaꞌ koa ampa koa tagal karas kapala. 19 Ia kaꞌ koa inaꞌ nauꞌan supeꞌ agiꞌ sampe ia kaꞌ koa nunaꞌan sigana hawa napsu, man idup cabul samaoꞌ ati. 20 Tapi bukeꞌ cara idup lekoa kitaꞌ palajariꞌ tentang Karistus. 21 Tagal kitaꞌ dah nangngar tentang Ia man narimaꞌ pangajaran kaꞌ dalapm Ia nurut kabanaran nang kateleꞌatn kaꞌ dalapm Yesus, 22 tagal koa lapasatnlah talino lama man cara kaidupatn lama nang tagah dingarusak di kamaoꞌan-kamaoꞌannya nang nyasatatn,d 23 Biarlah roh man pikiran kitaꞌ dibaharuiꞌ samuanya. 24 Kiraꞌnya kitaꞌ idup lea talino baharu nang dinampaꞌ nurut kamaoꞌan Allah kaꞌ dalapm kabanaran man tabiat nang ngarepoatn ati Allah, bujur man nang suci.e 25 Jaji tagal kitaꞌ dah muang cara idup kitaꞌ nang lama, ame agiꞌ pangalok kaꞌ sabayaatn kitaꞌ. Ngomonglah nang banar kaꞌ sekoꞌ man nang lainnya, tagal kitaꞌ kajah anggota dari soteꞌ tubuh.f 26 Kadeꞌ kitaꞌ bera, amelah miaratn kaberaatn koa jaji panyabab kitaꞌ badosa: ame bera saarianan.g 27 Biar Ibalis pamimpin setan-setan inaꞌ namu kasampatan. 28 Urakng pangalit, amelah ia ngalit agiꞌ tapi ia arus bakaraja sidi-sidi man manjawat pakarajaatn nang baik man kokotnya babaro biar ia baya babagi man urakng lain nang bakakurangan. 29 Kadeꞌ kitaꞌ ngomong, amelah ada pakataatn kotor nang kaluas dari molot kitaꞌ ato kata-kata nang nyakitiꞌ ati urakng, tapi sabaliknya ngomonglah man pakataatn nang nguatatn man ngatangan barakat untukng tuah untuꞌ urakng-urakng nang nangngarnya. 30 Salain koa ugaꞌ, amelah cara idup kitaꞌ manjawat Roh Kudus kasal, jukut Roh koalah bukti kadeꞌ kitaꞌlah di Allah ngampuꞌ man takaꞌ namus waꞌtunya naꞌe Allah mebasatnnaꞌ kitaꞌ sapanuhnya. 31 Buaknglah samua sakit ati, dandam, man kaberaꞌatn kaꞌ dalapm idupnyu. Ame bakalahi man kajah ngina. Badiapm manjawat samua kajahatatn. 32 Sabaliknya kitaꞌ ramah saurakng kaꞌ nang lainnya, panuh kasih man kajah ngamponiꞌ lea Allah dalapm Karistus dah ngamponiꞌ kitaꞌ.h