SURAT PAULUS UNTUꞌ JAMAAT KAꞌ
PILIPI
Pangantar
Jamaat kaꞌ Pilipi, jamaat pamulaꞌatn nang di Paulus madiri kaꞌ Eropa. Pilipi ada kaꞌ kota makedonia, propinsi karajaan Roma. Surat Paulus kaꞌ jamaat Pilipi nian dinyontengan takaꞌ Paulus kaꞌ dalapm pinjara. Ati Paulus waꞌtu koa inaꞌ tanang tagal ada pakaraja-pakaraja Karisten nang nantakngnya. Ugaꞌ, tagal kaꞌ dalapm jamaat Pilipi koa ada urakng nang ngajaratn ajaran-ajaran nang nyasatatn. Biar pun lea koa, surat Paulus nian banada repo man panuh harapan. Tagalnya Paulus sidi pucayaꞌ kaꞌ Karistus.
Paulus nyontengan surat nian pamulaatnnya, ia maoꞌ batarimaꞌ kasih kaꞌ pamareꞌ jamaat Pilipi nang dah dinya narimaꞌ. Takaꞌ ia kaꞌ dalapm kasusahatn. Man dalapm kasampatan nian pulaꞌ, ia maoꞌ mareꞌ dorongan kaꞌ ia kaꞌ koa biar ia kaꞌ koa barani man sabar dalapm ngadapiꞌ kasusahatn. Ia sidi bapintaꞌ biar ia kaꞌ koa randah ati lea Yesus, man inaꞌ dikuasaiꞌ di parasaꞌan sombong man kapantingan diriꞌ babaro. Ia ngingatiꞌ ia kaꞌ koa kadeꞌ kahe tagal kabaikat ati Allah ihanlah, Allah manjawat ia kaꞌ koa soteꞌ man Karistus tagal pucayaꞌ nya kaꞌ koa kaꞌ Karistus, bukeꞌ tagal ia kaꞌ koa ngasiꞌ nyalanan upacara-upacara agama nang dinantuatn dalapm ukum Torat Yahudi.
Paulus ugaꞌ nyontengan tentang karepoatn man sejahtera nang di Allah mareꞌatn kaꞌ urakng-urakng nang idup soteꞌ man Karistus. Ciri kusus surat nian ialah tekannannya kaꞌ karepoatn, kateguhan ati, kesatuan, man katabahan urakng pucayaꞌ dalapm mempertahankan kapucayaꞌatnya kaꞌ Karistus man dalapm nyalatniꞌ idup sebagai urakng pucayaꞌ. Surat nian nojokatn ugaꞌ sidi kasihnya Paulus kaꞌ jamaat kaꞌ Pilipi koa.
Isiꞌ
Pamulaꞌatn 1:1-11
Kaadaꞌan Paulus 1:12-26
Kaidupatn urakng pucayaꞌ 1:27; 2:18
Rancana untuꞌ Timotius man Epaproditus 2:19-30
Paringatan adanya munsuh-munsuh dari luar man dari dalapm 3:1; 4:9
Paulus man ayukng-ayukngnya kaꞌ Pilipi 4:10-20
Panutup 4:21-23