Pilipi 1

SURAT PAULUS UNTUꞌ JAMAAT KAꞌ

PILIPI

Salam pamukaꞌ

1:1-2

Dari ku, damaku Paulus man ayukngku Timotius kami amba Karistus Yesus. Untuꞌ samua urakng kudus dalapm Karistus Yesus nang badiapm kaꞌ Pilipi, man pamimpin-pamimpin jamaat man urakng-urakng nang mantoꞌ pamimpin-pamimpin jamaat.

2 Kiraꞌnya kitaꞌ samua kaja idup baati nang dame man marasa kabaikatn ati Allah Apaꞌ diriꞌ man Yesus Karistus Tuhan diriꞌ.

Doꞌa man ucapatn sukur Paulus untuꞌ jamaat

1:3-11

3 Tiap kali aku taringat kaꞌ kitaꞌ, aku batarimaꞌ kasih kaꞌ Allah. 4 Tiap kali aku badoꞌa untuꞌ kitaꞌ samuanya, man ati nang repo aku badoꞌa. 5 Aku batarimaꞌ kasih kaꞌ Allah barang dari ari pertama sampe kaꞌ ampeatn, kitaꞌ dah mantoꞌ aku ngesahatn Kabar Baik dari Allah. 6 Allah babaro nang mulaiꞌ pakarajaatn nang baik koa kaꞌ kitaꞌ, aku yakin Ia narusatnnaꞌ pakarajaatn baik koa sampe abis kaꞌ ari Karistus Yesus mulakng agiꞌ. 7 Dah sapatutnya aku bapikir lekoa tentang kitaꞌ samua, tagal kitaꞌ ada kaꞌ dalapm atiku. Barang kitaꞌ dah jaji ayukng sakarajaku kaꞌ dalapm nyalanan tugas nang Allah mareꞌatn di kabaikatn ati-Nya. Kitaꞌ manjawat hal koa baik waꞌtu aku kaꞌ dalapm man kaꞌ luar pinjara. Kitaꞌ gia turut mela ajaran Kabar Baik sarata muktiatn kabanaran ajaran koa. 8 Allah saksinya kadeꞌ aku banar-banar rehoꞌ kaꞌ kitaꞌ samua man kasih nang dari Karistus Yesus babaro.

9 Nianlah doꞌaku untuꞌ kitaꞌ, kiraꞌnya kasih kitaꞌ siaꞌ balimpah dalapm pangatahuan nang banar man dalapm sigana macam pangaratian. 10 Sampe kitaꞌ baya milih ahe nang paling baik, biar kitaꞌ baraseh man inaꞌ bacacat kaꞌ ari Karistus mulakng agiꞌ. 11 Idup kitaꞌ binsiꞌaꞌ man kalakuan nang baik nang di Yesus Karistus ngarajaatn untuꞌ muliaatn man muji Allah.

Idup untuꞌ Karistus

1:12-26

12 Sodara-sodara, aku maoꞌ kitaꞌ nauꞌan kadeꞌ lewat samua masalah man kasingsaraatn nang tagah ku ngalamiꞌ, manjawat urakng rami siaꞌ pucayaꞌ kaꞌ Kabar Baik tentang Karistus koa, 13 sampe samua urakng-urakng kususnya pangawal istana nauꞌan kadeꞌ aku di minjara tagal aku ngalayaniꞌ Karistus. 14 Man tagal aku diminjara, kamanyakatn sodara-sodara sakapucayaꞌatn kaꞌ dalapm Tuhan dah jaji labih yakin agiꞌ untuꞌ siaꞌ barani ngesahatn pakataatn Allah inaꞌ galiꞌ-galiꞌ. 15 Memang ada urakng nang nyampeatn Karistus tagal dangki man basalisih, tapi ada pulaꞌ ngesahatn-Nya man maksut nang baik. 16 Ia kaꞌ koa ngesahatn Karistus tagal kasih, barang ia kaꞌ koa nauꞌan kadeꞌ aku ada kaꞌ dian tagal mela Kabar Baik, 17 tapi nang lain tagal kapantingannya babaro man maksut nang inaꞌ baik, sangkanya bebanku kaꞌ pinjara siaꞌ barat.

18 Ahe pun tujuannya, koa bukeꞌ masalah untuꞌ ku, nang panting gesah tentang Karistus tasabar luas, baik digesahatn man alasan nang banar maoꞌpun inaꞌ banar. Dalapm hal koa aku barepo-repo man aku tatap barepo-repoaꞌ; 19 barang aku nauꞌan man doꞌa-doꞌa kitaꞌ ugaꞌ bantuan dari Roh Yesus Karistus, aku dibebasatnnaꞌ. 20 Aku sidi-sidi baarap biar aku inaꞌ gagal dalapm nyalanan tugas ku nian man inaꞌ jaji supeꞌ kaꞌ adapatn Tuhan. Kahe nang ku maoꞌiꞌ man kabaranian baya tarus basaksi lea biasanya. Jaji, Karistus kaja dimuliaatn dalapm sigana hal nang ku manjawat, baik kaꞌ kaidupatn maoꞌpun kamatiatnku. 21 Tagal idupku untuꞌ Karistus man mati kauntungan. 22 Tapi kadeꞌ aku idup kaꞌ dunia nian, koa barati aku baya mantoꞌ urakng labih manyak agiꞌ. Jaji mae nang arus ku pilih, aku inaꞌ nauꞌan. 23 Aku di narik dari dua pihak. Aku maoꞌ sidi ningalatnnaꞌ dunia nian untuꞌ ampus badiapm man Karistus; tagal koalah nang paling baik. 24 Tapi untuꞌ kapantingan kitaꞌ, labih baik kadeꞌ aku tatap badiapm kaꞌ dunia. 25 Tagal kayakinan koalah aku nauꞌan kadeꞌ aku idupaꞌ man badiapm man kitaꞌ. Jaji man nang koa aku baya mantoꞌ kitaꞌ untuꞌ siaꞌ batumuh man barepo-repo tagal kapucayaꞌatn diriꞌ kaꞌ Karistus. 26 Jaji sampe waꞌtu aku atakng agiꞌ kaꞌ kitaꞌ, tantu kitaꞌ siaꞌ karepoatn man basukur kaꞌ Karistus Yesus tagal aku.

Nasehat biar tatap bajuang

1:27-30

27 Nang paling panting kitaꞌ tatap idup pas man Kabar Baik tentang Karistus, man cara nang pantas untuꞌ warga karajaan Allah. Jaji aku nauꞌan kadeꞌ kitaꞌ saati sapikiran man tarus bajuang untuꞌ kapucayaꞌatn diriꞌ kaꞌ Kabar Baik, intah aku bisa atakng man neleꞌnya langsung, atopun kahe nangngar kabar tentang kitaꞌ dari dalapm pinjara nian. 28 Amelah galiꞌ kaꞌ urakng-urakng nang nantakng kitaꞌ. Ia kaꞌ koa ngalawan jaji bukti kadeꞌ ia kaꞌ koa di Allah binasaatnnaꞌ, tapi kitaꞌ disalamatatnnaꞌ. 29 Tagal kabaikatn ati Allah, Ia milih kitaꞌ bukeꞌ kahe untuꞌ pucayaꞌ kaꞌ Karistus, tapi ugaꞌ singsara untuꞌ Karistus. 30 Kasingsaraatn nang tagah kitaꞌ ngarasa koa sama lea kasingsaraatn nang ku ngalamiꞌ, lea nang dah suah kitaꞌ nyaksiatn, man kitaꞌ babaro ugaꞌ nangngar kadeꞌ aku masih singsara sampe ampeatn.