Sigana nang ada nyambah Yesus
2:1-11
2
Kitaꞌ kuat, tagal kitaꞌ soteꞌ man Karistus. Man kitaꞌ dingibur tagal kitaꞌ di Karistus ngasihiꞌ. Kitaꞌ di Roh Kudus ngirikng, man kitaꞌ ugaꞌ ada rasa bakasihatn kaꞌ sekoꞌ man nang lainnya. 2 Jaji cobalah kitaꞌ batol-batol ngarepoatn atiku man hal-hal nian: Iduplah saati man kasih nang sama, man pikiran nang sama, man tujuan nang sama. 3 Ahe pun nang kitaꞌ panjawat, amelah untuꞌ kapantingan babaro ato untuꞌ kasombongan diriꞌ. Sabaliknya kiraꞌnya kitaꞌ man randah ati nang saurakng nganggap nang lain labih utama daripada diriꞌnya babaro; 4 man amelah tiap-tiap urakng kahe maratiatn kapantingannya babaro, tapi kapantingan urakng lain ugaꞌ. 5 Kiraꞌnya kitaꞌ dalapm idup, kitaꞌ bapikiran man baparasaan nang ada kaꞌ dalapm Karistus Yesus, 6 biarpun Yesus ngampuꞌ samua sipat Allah, Ia inaꞌ suah nganggap kadudukatn-Nya nang sama man Allah koa arus dipertahankan, 7 tapi Ia dah mabahatn diriꞌ-Nya, naap rupa saurakng amba ulutn, jaji sama man talino. 8 Dalapm keadaan lea talino, Ia dah mabahatn diriꞌ-Nya man ngasiꞌ sampe mati; bahkan sampe mati kaꞌ kayu salip. 9 Koalah tagalnya Allah dah ngangkat Ia kaꞌ tampat nang paling tahormat, man ningian Yesus kaꞌ atas sigana panguasa nang lain. 10 Supaya hormat kaꞌ Yesus, jaji samua nang ada nang kaꞌ saruga, man kaꞌ aiꞌ tanah, sarata man nang kaꞌ babah aiꞌ tanah nyambahaꞌ Ia, 11 man sigana urakng ngakoꞌaꞌ: “Kadeꞌ Yesus Karistuslah Tuhan” untuꞌ kamuliaꞌatn Allah, Apaꞌ!aBasaho lea saho narakngiꞌ aiꞌ tanah
2:12-18
12 Tagal koa sodara-sodara nang terkasih, kitaꞌ kaja ngasiꞌ; sebagai urakng nang dah di Allah nyalamatatn, barusahalah untuꞌ idup banar man hormat kaꞌ Allah. Bukeꞌ jaꞌ lea waꞌtu aku masih ada kaꞌ tangah-tangah kitaꞌ, tapi labih agiꞌ waꞌtu aku dah inaꞌ kaꞌ tangah-tangah kitaꞌ, 13 barang Allahlah nang bakaraja kaꞌ dalapm kitaꞌ untuꞌ manjawat kitaꞌ rela man sanggup ngarepoatn ati Allah. 14 Kadeꞌ kitaꞌ manjawat sigana hal, amelah kitaꞌ bagarungut man amelah kitaꞌ babantah-bantah sekoꞌ man nang lainnya. 15 Biar kitaꞌ inaꞌ bisa dipasalah man inaꞌ banoda tagal kitaꞌ anak-anak Allah nang inaꞌ bacacat takaꞌ kitaꞌ masih idup kaꞌ tangah urakng-urakng nang jahat man sasat nian. Jaji kitaꞌ basaho kaꞌ antara nya kaꞌ koa lea bintakng-bintakng narakngiꞌ aiꞌ tanah nian.b 16 Kitaꞌ ugaꞌ arus mampautiꞌ pakataatn nang mareꞌ idup. Biar aku baya bangga kaꞌ ari Karistus atakng agiꞌ kaꞌ aiꞌ tanah. Koa buktinya kadeꞌ aku inaꞌ toaꞌ-toaꞌ balombaꞌ man inaꞌ toaꞌ-toaꞌ basusah-susah. 17 Tapi sakalipun aku mati dibunuh man darah ku dinontongan dalapm ibadah kapucayaꞌatn kitaꞌ, aku basukur man aku barepo-repo man kitaꞌ samua. 18 Lekoa ugaꞌlah kiraꞌnya kitaꞌ pun basukur man turut karepoatn man aku.
Timotius man Epaproditus
2:19-30
19 Aku pucayaꞌ kadeꞌ Tuhan Yesus mukaꞌ maraga, sampe-sampe aku ganceh baya nyuruh Timotius kaꞌ kitaꞌ, biar aku baya taibur di gesah tentang kitaꞌ. 20 Barang Timotiuslah sekoꞌ-sekoꞌnya urakng nang saati man aku, man nang sidi-sidi mikiriꞌ kapantingan kitaꞌ. 21 Samua nang lainnya ngagoꞌ kapantingannya babaro ihan, bukeꞌ ngagoꞌ kapantingan Yesus Karistus. 22 Kitaꞌ babaro dah neleꞌ buktinya kadeꞌ Timotius baguna. Ia dah bakaraja karas man aku untuꞌ nyebaratn Kabar Baik dari Allah. Kami badua lea apaꞌ man anak. 23 Tagal koa, lakaꞌ aku nauꞌan pakaraku naꞌe baahir, aku ganceh nyuruhaꞌ Timotius kaꞌ kitaꞌ. 24 Kadeꞌ Tuhan Yesus mukaꞌ maraga, aku yakin kadeꞌ aku babaro pun atakngaꞌ ganceh.
25 Tentang Epaproditus saurakng nang pucayaꞌ kaꞌ Yesus sama lea diriꞌ nang kitaꞌ nyuruh untuꞌ mantoꞌ aku, aku marasa ku anggap palalu untuꞌ nyuruh ia mulakng kaꞌ kitaꞌ. Ia dah nampingiꞌ aku dalapm pakarajaatn man pajuangan ku. 26 Ia sidi rehoꞌ kaꞌ kitaꞌ samuanya, man ia gulisah tagal kitaꞌ dah namu kabar kadeꞌ ia sakit. 27 Ingkaꞌ banar Epaproditus sakit sampe amper mati. Tapi Allah kasihatn kaꞌ ia, man bukeꞌ jaꞌ kaꞌ ia ihan, tapi kaꞌ aku ugaꞌ, biar aku ame jaji labih kasal ati agiꞌ. 28 Koalah tagalnya siaꞌ ayaꞌ kamaoꞌanku untuꞌ nyuruh Epaproditus mulakng kaꞌ kitaꞌ, biar kitaꞌ barepo ati agiꞌ kadeꞌ kitaꞌ batamu man ia, man ati ku pun jaji tanang. 29 Jaji, sambutlah Epaproditus lea sodara nang sama-sama pucayaꞌ kaꞌ Tuhan man karepoatn man ugaꞌ hormatiꞌlah urakng-urakng lea ia. 30 Ia arus dihormatiꞌ jukut ia amper mati untuꞌ pakarajaatn Karistus. Ia bataroh nyawa kaꞌ dalapm bahaya biar ia dapat mantoꞌ aku. Koalah pertolongan nang inaꞌ dapat di kitaꞌ bareꞌatn kaꞌ aku.