Idup kaꞌ dalapm tarakng
5:1-21
5
Kitaꞌlah kamudaꞌ-kamudaꞌ Allah nang di-Nya ngasihiꞌ, tagal koa kitaꞌ arus barusaha ngikutiꞌ conto Allah 2 iduplah kaꞌ dalapm kasih, lea Yesus Karistus ugaꞌ dah ngasihiꞌ kitaꞌ man dah nyarahatan diriꞌ-Nya untuꞌ diriꞌ sebagai paremahan man korban nang ngarepoatn Allah.a 3 Amelah manjawat nang cabul man inaꞌ sanonoh, atopun kasarakahatn. Hal-hal nian sama sakali inaꞌ pantas untuꞌ umat Allah, tagal kitaꞌ dah di-Nya marasehatn. 4 Amelah ngataatn kata-kata kotor, inaꞌ sanonoh atopun nang inaꞌ baguna. Tagal hal-hal koa inaꞌ pantas. Tapi biarlah kitaꞌ kaja basukur kaꞌ Allah. 5 Paratiatn edoꞌ-edoꞌ boh: urakng nang bakalakuan cabul ato inaꞌ sanonoh, sarakah, kalakuan koa sama lea nyambah dewa, urakng koa inaꞌ baya jaji anggota umat nang di Karistus man Allah marentah. 6 Amelah miaratn urakng nyasatatn kitaꞌ man kata-kata nang inaꞌ baguna. Tiap urakng nang manjawat hal-hal nang kunyabutatn tadi manjawataꞌ kaberaatn Allah nang miah, barang ia kaꞌ koa baiꞌ ngasiꞌ kaꞌ Ia. 7 Tagal koa amelah kitaꞌ barayukng man ia kaꞌ koa. 8 Kitaꞌ deꞌenya idup kaꞌ dalapm nang galap tapi ampeatn kitaꞌ dah jaji umat Allah, kitaꞌ ada kaꞌ dalapm tarakng. Jaji kitaꞌ arus idup kaꞌ dalapm tarakng. 9 Tagal dari tarakng koalah tarbit sigana macam kalakuan nang baik, adil man kabanaran. 10 Barusahalah nganal ahe nang ngarepoatn ati Allah. 11 Ame agiꞌ kitaꞌ ngikutiꞌ kalakuan urakng nang idup kaꞌ dalapm galap. Samuanya koa toaꞌ-toaꞌ ja. Sabaliknya kiraꞌnya kalakuan man pakataatn kitaꞌ neleꞌatn kadeꞌ cara idup nya kaꞌ koa salah. 12 Tagal ngomongannyapun ahe nang di nya kaꞌ koa panjawat kaꞌ tampat-tampat nang dinosokatn dah matabeꞌiꞌ. 13 Sigana kalakuan nang jahat dah kateleꞌanan kaꞌ dalapm tarakng. Barang kadeꞌ kaꞌ abut nang tarakng, inaꞌ ada nang inaꞌ kateleꞌanan. 14 Koalah tagalnya dingataatn: “Lumpatlah, o kitaꞌ nang tidur man mulaknglah idup dari antara urakng mati man Karistus basahoaꞌ kaꞌ atas kitaꞌ.”15 Jaji paratiatniꞌlah baik-baik cara idup kitaꞌ masing-masing, amelah idup lea urakng bodo tapi iduplah lea urakng bijaksana. 16 Pagunaanlah kasampatan nang ada untuꞌ babuat baik, jukut kaꞌ waꞌtu nian kamanyakatn urakng babuat nang jahat.b 17 Tagal koa amelah kitaꞌ baga tapi barusahalah biar kitaꞌ ngarati kamaoꞌan Tuhan. 18 Amelah kitaꞌ kamabuk di anggur tagal anggur nimulatn hawa napsu, tapi kiraꞌnya kitaꞌ panuh di Roh Kudus Allah, 19 man bakata-katalah saurakng man nang lain pakelah kata-kata dari Masmur, lagu puji-pujian man lagu rohani. Kiraꞌnya kitaꞌ man ati nang repo barenyah puji-pujian untuꞌ Tuhan. 20 Batarimaꞌkasihlah untuꞌ singananya kaꞌ dalapm dama Tuhan Yesus Karistus kaꞌ Allah Apaꞌ diriꞌ.c 21 Tunduklah kaꞌ sekoꞌ man nang lainnya man galiꞌ kaꞌ Karistus.
Kasih Karistus dasar idup dua laki bini
5:22-33
22 O nangbini, ngasiꞌlah kaꞌ laki kitaꞌ, lea kitaꞌ ngasiꞌ kaꞌ Allah.d 23 Tagal nanglaki kapala dari bininya sama lea Karistus pun ugaꞌ jaji kapala dari jamaat. Ia babarolah ugaꞌ Raja Panyalamat untuꞌ jamaat nang jaji tubuh-Nya. 24 Sama lea jamaat tunduk kaꞌ Karistus, lekoa ugaꞌ nangbini arus ngasiꞌ kaꞌ lakinya kaꞌ dalapm sigana hal. 25 O nanglaki kasihiꞌlah bininyu, sama lea Karistus ngasihiꞌ jamaat nang dah ngorbanan diriꞌ-Nya untuꞌ jamaat koa.e 26 Karistus manjawatnya koa biar Ia baya nyuciatn jamaat koa man ajaran-Nya man lewat aiꞌ baptisan, baruꞌ lakaꞌ koa Ia nyarahatnnya kaꞌ Allah. 27 Biar man nang ampa koa Ia nampatatn jamaat koa badiri kaꞌ adapatn-Nya, nang di-Nya ngampuꞌ, jaji kudus, nang banar-banar baraseh, nang inaꞌ bakakurangan ato sama sakali inaꞌ ada kasalahatn. 28 Lekoa ugaꞌ nanglaki arus ngasihiꞌ bininya lea iya ngasihiꞌ tubuhnya babaro. Urakng nang ngasihiꞌ bininya barati iya ngasihiꞌ diriꞌnya babaro. 29 Barang inaꞌ suah urakng busak kaꞌ tubuhnya babaro tapi mihara man ngarawatnya sama lea Karistus kaꞌ jamaat, 30 barang diriꞌlah anggota tubuh-Nya. 31 Tagal koa nanglaki ningalatnnaꞌ apaꞌnya man uweꞌnya jaji soteꞌ man bininya, sampe kaduanya koa soteꞌ isiꞌ.f 32 Rahasia nian ayaꞌ tapi nang ku maksut nian ubungan Karistus man jamaat. 33 Tapi leamaepun ugaꞌ balaku kaꞌ kitaꞌ parentah nian: kasihiꞌlah bininyu lea kao ngasihiꞌ diriꞌnyu babaro, man nangbini aruslah ngasiꞌ kaꞌ lakinya.