1 Tesalonika 1

SURAT PAULUS NANG PAMULAꞌATN

UNTUꞌ JAMAAT KAꞌ

TESALONIKA

Salam

1:1

Dari Paulus, Silwanus man Timotius untuꞌ jamaat kaꞌ Tesalonika nang dah jaji umat Allah, Apaꞌ diriꞌ, man Tuhan Yesus Karistus. Kiraꞌnya Allah nojokatn kabaikatn ati-Nya man mareꞌ kaꞌ kitaꞌ idup nang panuh dame.^a

Asil palayanan Paulus

1:2-10

2 Tiap kali kami badoꞌa kaꞌ Allah untuꞌ kitaꞌ, kami gia ngucapatn tarimaꞌ kasih kaꞌ Ia tagal kitaꞌ. 3 Waꞌtu kami badoꞌa untuꞌ kitaꞌ kaꞌ adapatn Allah, Apaꞌ diriꞌ, kami ingat lemae kitaꞌ neleꞌatn karaja karas kitaꞌ tagal pucayaꞌ kaꞌ Karistus, lemae kitaꞌ ngasihiꞌ urakng lain man ngalayaniꞌ ia kaꞌ koa. Man kami ingat ugaꞌ lemae kitaꞌ sidi tekun baarap kaꞌ Tuhan diriꞌ Yesus Karistus kadeꞌ Ia nyalamatatnnaꞌ diriꞌ. 4 Kami nauꞌan, sodara-sodara nang Allah ngasihiꞌ kadeꞌ Ia dah milih kitaꞌ jaji ampuꞌ-Nya. 5 Barang kami nyampeatn Kabar Baik kaꞌ kitaꞌ bukeꞌ man kata-kata ihan, tapi ugaꞌ man kakuatan Roh Kudus. Man kami pucayaꞌ sidi kaꞌ kabanaran Kabar Baik koa. Kitaꞌ nauꞌan lemae kami idup untuꞌ kapantingan kitaꞌ takaꞌ kami ada kaꞌ tangah-tangah kitaꞌ. 6 Kitaꞌ ngikutiꞌ conto kami man conto Tuhan. Biarpun kitaꞌ idup sidi singsara gara-gara tekanan, tapi kitaꞌ nyambut Kabar Baik koa man ati nang miah repo. Karepoatn ati kitaꞌ koa di Roh Kudus mareꞌ.^b 7 Man nang lekoa, kitaꞌ jaji conto untuꞌ samua urakng nang pucayaꞌ kaꞌ Makedonia man Akhaya. 8 Mulaiꞌ dari kitaꞌ, kabar tentang Tuhan dah sampe kaꞌ Makedonia man Akhaya. Man bukeꞌ koa ihan, bahkan barita tentang lemae kitaꞌ pucayaꞌ kaꞌ Allah dah sampe kaꞌ maeaꞌ maꞌan. Kami pun inaꞌ palalu agiꞌ ngataatn ahe-ahe barang urakng-urakng dah nangngar tentang kapucayaꞌatn kitaꞌ. 9 Samua urakng koa ngomong tentang lemae kitaꞌ narimaꞌ kami, takaꞌ kami deꞌe atakng kaꞌ kitaꞌ. Ia kaꞌ koa ngomong tentang lemae kitaꞌ inaꞌ agiꞌ nyambah pantak-pantak man atakng untuꞌ ngalayaniꞌ Allah nang sekoꞌ-sekoꞌnya, nang idup man nang banar. 10 Ia kaꞌ koa ugaꞌ ngomong tentang lemae kitaꞌ ngarapatn kaatangan Anak Allah dari saruga, yakoa Yesus, nang dah di Allah ngidupatn dari kamatiatn. Yesus koa ugaꞌlah nang nyalamatatn diriꞌ dari ukuman nang atakngngaꞌ.