Palayanan Paulus kaꞌ Tesalonika
2:1-12
2
Kitaꞌ babaro nauꞌan sodara-sodara, takaꞌ kami naboꞌ kitaꞌ kaꞌ Tesalonika, inaꞌ toaꞌ-toaꞌ, tapi ada asilnya. 2 Kitaꞌ nauꞌan kadeꞌ sanapeꞌ kami atakng kaꞌ kitaꞌ kaꞌ Tesalonika, kami dah dinganiaya man dingina kaꞌ Pilipi. Tapi biarpun manyak urakng ngalawan kami, Allah diriꞌ dah mareꞌ kami kabaranian untuꞌ ngesahatn kaꞌ kitaꞌ Kabar Baik nang barasal dari-Nya.a 3 Barang kami maba kitaꞌ bukeꞌ man tujuan nang jahat, bukeꞌ ugaꞌ man tujuan nang inaꞌ banar ato untuꞌ nipu kitaꞌ. 4 Sabaliknya kami gia ngomong lea urakng-urakng nang disatujuiꞌ Allah man nang baya Ia pucayaꞌ untuꞌ satia ngesahatn Kabar Baik. Kami inaꞌ barusaha ngarepoatn talino tapi untuꞌ ngarepoatn Allah, nang nguji isiꞌ ati diriꞌ. 5 Kitaꞌ babaro dah nauꞌan kami naꞌ suah bamolot manseꞌ man kami naꞌ suah ngajariꞌ kitaꞌ man maksut nang inaꞌ banar demi namu duit. Allah ugaꞌ jaji saksi kadeꞌ nian ingkaꞌ banar. 6 Kami inaꞌ ngagoꞌ hormat dari talino, bukeꞌ dari kitaꞌ ato urakng lain. Sabatolnya kami rasul-rasul Karistus ngampuꞌ hak untuꞌ mintaꞌ hal koa kaꞌ kitaꞌ, tapi kami inaꞌ nuntut hak kami koa. 7 Tapi kami basikap lamah lamut waꞌtu ada kaꞌ tangah-tangah kitaꞌ, sama lea saurakng uweꞌ nang mihara man ngarawat kamudaꞌ-kamudaꞌnya. 8 Jukut kami sidi kasih kaꞌ kitaꞌ, kami repo babagi man kitaꞌ. Inaꞌ kahe Kabar Baik dari Allah tapi ugaꞌ kami manjawat samua nang baya kami panjawat untuꞌ baya mantoꞌ kitaꞌ. 9 Sodara-sodara tantu kitaꞌ ingat lemae kami sidi-sidi karaja takaꞌ kami kaꞌ Tesalonika. Kami karaja siakng malaman untuꞌ namu duit ngidupiꞌ diriꞌ kami babaro biar inaꞌ nyusahiꞌ saurakng pun dari kitaꞌ salamaꞌ kami ngesahatn Kabar Baik dari Allah kaꞌ kitaꞌ. 10 Kitaꞌlah saksi, man Allah pun nauꞌan, kadeꞌ kami idup suci, banar man inaꞌ salah kaꞌ adapatn kitaꞌ nang pucayaꞌ kaꞌ Karistus. 11 Kitaꞌ ugaꞌ nauꞌan kadeꞌ kami dah jaji lea urakng tuha man kamudaꞌnya babaro nang nasehatiꞌ, ngibur kitaꞌ. 12 Man kami mintaꞌ sidi, biar kitaꞌ idup pas man kamaoꞌan Allah nang nyaruꞌ kitaꞌ kaꞌ dalapm Karajaan Allah man kamuliaatn-Nya.Paulus basukur kaꞌ kaadaan jamaat
2:13-20
13 Man kami ugaꞌ tarus ngucapatn tarimaꞌ kasih kaꞌ Allah jukut kitaꞌ narimaꞌ pakataatn Allah, nang kitaꞌ nangngar dari kami. Kitaꞌ narimaꞌnya bukeꞌ lea pakataatn talino tapi sidi-sidi pakataatn Allah. Memang pakatatn koa batol-batol dari Allah; pakataatn koa nang tagah karaja kaꞌ dalapm kitaꞌ nang pucayaꞌ. 14 Sodara-sodara hal nang kitaꞌ ngalamiꞌ dah dingalamiꞌ ugaꞌ di jamaat-jamaat kaꞌ Yudea nang di Karistus Yesus ngampuꞌ. Kitaꞌ ngalamiꞌ kasingsaraatn dari pihak bangsa kitaꞌ babaro, sama lea nang di jamaat-jamaat Allah ngalamiꞌ kaꞌ Yudea koa dari pihak urakng-urakng Yahudi.b 15 Urakng-urakng Yahudi koa nang dah munuh nabi-nabi-Nya man munuh Tuhan Yesus, ugaꞌ nganiaya kami. Ia kaꞌ koa inaꞌ ngarepoatn Allah man nyadiatn diriꞌnya musuh samua urakng.c 16 Bahkan ia kaꞌ koa ngalangiꞌ-ngalangiꞌ kami untuꞌ ngesahatn kaꞌ bangsa-bangsa bukeꞌ urakng Yahudi, kabar nang baya nyalamatatn bangsa-bangsa koa. Man hal koa urakng-urakng Yahudi koa tarus nambah dosa-dosanya sampe jumbalahnya ganap. Man ampeatn ia kaꞌ koa ahirnya kana timpaꞌ ukuman Allah. 17 Tapi kami, sodara-sodara takaꞌ kami tapaksa bapisah man kitaꞌ, jauh kaꞌ mata tapi samak kaꞌ ati. Kami siaꞌ rehoꞌ kaꞌ kitaꞌ man barusaha sidi-sidi biar baya atakng man naboꞌ kitaꞌ agiꞌ. 18 Kami baniat ampus naboꞌ kitaꞌ man aku Paulus dah nyobanya dua talu kali, tapi Ibalis pamimpin setan-setan gia ngalangiꞌ kami. 19 Amelah heran kadeꞌ kami sidi marasa rehoꞌ ampusaꞌ naboꞌ kitaꞌ. Jukut kitaꞌlah kabanggaan man karepoatn ati kami! Koa ugaꞌlah rasa bangga kami, takaꞌ Tuhan diriꞌ Yesus atakngngaꞌ agiꞌ. Waꞌtu koa kami sidi banggaaꞌ badiri kaꞌ adapatn-Nya barage man kitaꞌ asil palayanan kami. 20 Sidi, kitaꞌlah kabanggaan man karepoatn ati kami!