Kabar Baik nang di Timotius ngincakng
3:1-13
3
Jaji kami dah naꞌ tahan agiꞌ. Kami bapikir labih baik kami badiapm babaro kaꞌ Atena.a 2 Lalu kami ngiripm Timotius, sodara sakapucayaꞌatn diriꞌ nang karaja man kami untuꞌ Allah dalapm nyampeatn Kabar Baik Karistus Yesus, untuꞌ nguatatn man mantoꞌ kitaꞌ biar labih pucayaꞌ kaꞌ Karistus. 3 Kami ngiripm ia biar inaꞌ ada saurakng pun nang lamah imannya gara-gara kasusahatn-kasusahatn nian. Kitaꞌ babaro nauꞌan kadeꞌ diriꞌ dinantuatn untuꞌ koa. 4 Jukut waꞌtu kami sama-sama man kitaꞌ, dah kami ngataatn kaꞌ kitaꞌ kadeꞌ diriꞌ ngalamiaꞌ kasusahatn. Lea nang kitaꞌ tauꞌatn, hal koa dah tajaji. 5 Koalah tagalnya aku ngiripm Timotius, barang aku sidi maoꞌ nauꞌan lemae kapucayaꞌatn kitaꞌ kaꞌ Karistus. Aku kawater kadeꞌ Ibalis barasil nyobaiꞌ kitaꞌ sampe samua susah payah kami toaꞌ-toaꞌ. 6 Tapi ampeatn Timotius dah mulakng man ngincakng gesah nang edoꞌ kadeꞌ kitaꞌ tatap pucayaꞌ sapanuhnya kaꞌ Karistus man kajah bakasihiꞌ. Ia ngesahatn kadeꞌ kitaꞌ kaja ngingat kami man naꞌbatah maoꞌ batamu man kami, sama lea kami ugaꞌ naꞌbatah batamuaꞌ man kitaꞌ.b 7 Koalah tagalnya, page samadiꞌatn, kaꞌ dalapm sigana kasusahatn man kasingsaraatn kami, kami taibur di gesah tentang kapucayaꞌatn kitaꞌ. 8 Ampeatn kami marasa banar-banar idup, asal jaꞌ kitaꞌ tatap idup sama-sama man Tuhan Yesus. 9 Kami sidi miah basukur kaꞌ Allah tagal di kitaꞌ. Takaꞌ kami madoꞌaatn kitaꞌ, ati kami sidi repo. 10 Siakng malaman kami sidi-sidi badoꞌa biar kami baya neleꞌ kitaꞌ agiꞌ, biar kami baya ngajaratn hal-hal nang kitaꞌ palaluatn sampe kapucayaꞌatn kitaꞌ siaꞌ kuat. 11 Arapan man doꞌa kami, kiraꞌnya Allah Apaꞌ man Tuhan diriꞌ, Karistus Yesus, mukaꞌ maraga biar diriꞌ baya batamu agiꞌ. 12 Kiraꞌnya Tuhan Yesus nyajiatn kitaꞌ siaꞌ ngasihiꞌ sekoꞌ man nang lainnya, man siaꞌ ngasihiꞌ samua urakng, sampe kasih kitaꞌ koa batambah-tambah, sama lea kasih kami kaꞌ kitaꞌ. 13 Jaji kami badoꞌa biar Tuhan Yesus nguatatn ati kitaꞌ sampe-sampe kitaꞌ suci man inaꞌ basalah kaꞌ adapatn Allah, Apaꞌ diriꞌ, takaꞌ Tuhan diriꞌ Yesus atakng agiꞌ man samua urakng kudus-Nya.