Cara idup nang ngarepoatn ati Allah
4:1-12
4
Ahirnya sodara-sodara kitaꞌ dah balajar kaꞌ kami, lemae kitaꞌ arus idup untuꞌ ngarepoatn ati Allah. Memang kitaꞌ dah idup lekoa. Tapi ampeatn atas koasa Tuhan Yesus, kami mintaꞌ sidi kaꞌ kitaꞌ biar kitaꞌ manjawat hal koa labih giat agiꞌ. 2 Barang kitaꞌ dah nauꞌan lemae kitaꞌ arus manjawatnya, lea nang kami nyampeatn kaꞌ kitaꞌ man koasa Tuhan Yesus. 3 Allah maoꞌ kitaꞌ idup nang baraseh kaꞌ adapatn-Nya biar kitaꞌ nyauhiꞌ nang cabul. 4 Tiap nanglaki kaꞌ antara kitaꞌ arus nauꞌan lemae idup kadeꞌ dah panganten man cara nang ngarepoatn ati Allah man talino. 5 Amelah biaratn idup kaꞌ dalapm kamaoꞌan hawa napsu lea nang di bangsa-bangsa nang inaꞌ kanal kaꞌ Allah manjawat. 6 Dalapm hal lea nian, amelah saurakng pun babuat salah kaꞌ sodaranya, atopun nipunya. Deꞌe kami dah mareꞌ paringatan nang karas kaꞌ kitaꞌ, kadeꞌ Allah ngukumaꞌ urakng-urakng nang manjawat kasalahatn-kasalahatn lekoa. 7 Allah maba diriꞌ jaji umat-Nya biar idup diriꞌ baraseh kaꞌ adapatn-Nya bukeꞌ jaji pamabayaꞌ. 8 Urakng nang baiꞌ kaꞌ pangajaran nian, bukeꞌlah baiꞌ kaꞌ talino, tapi baiꞌ kaꞌ Allah nang mareꞌatn Roh-Nya nang suci kaꞌ kitaꞌ. 9 Inaꞌ palalu kami nyontengan agiꞌ untuꞌ kitaꞌ tentang lemae kitaꞌ arus ngasihiꞌ sodara-sodara nang sakapucayaꞌatn. Kitaꞌ babaro dah di Allah ngajariꞌ untuꞌ kajah ngasihiꞌ. 10 Kitaꞌ dah ngasihiꞌ samua urakng-urakng pucayaꞌ kaꞌ dalapm Yesus Karistus, kaꞌ samua binua Makedonia. Sodara-sodara, kami maoꞌ kitaꞌ labih agiꞌ sidi-sidi ngasihiꞌ urakng-urakng pucayaꞌ. 11 Iduplah dame man urakng lain. Uruslah urusannyu babaro, ame nyampuriꞌ urusan urakng lain. Ame ngarapatn pamareꞌ urakng untuꞌ kitaꞌ makatn, ato kapalaluan lain. Bakaraja man kokot kitaꞌ babaro. Waꞌtu kami man kitaꞌ deꞌe, hal koa dah kami marentahatn biar kitaꞌ manjawatnya. 12 Kadeꞌ kitaꞌ idup lekoa, kitaꞌ inaꞌ bagantukng kaꞌ urakng lain man urakng-urakng nang inaꞌ pucayaꞌ kaꞌ Karistus, hormataꞌ kaꞌ kitaꞌ.Kaatangan Tuhan Yesus
4:13-18
13 Sodara-sodara, kami maoꞌ kitaꞌ nauꞌan ahe nang tajaji kaꞌ urakng-urakng nang pucayaꞌ nang dah mati, biar kitaꞌ ame bakanang lea urakng nang napeꞌ pucayaꞌ. 14 Diriꞌ pucayaꞌ kadeꞌ Yesus mati man mulakng idup. Koa tagalnya diriꞌ pucayaꞌ ugaꞌ kadeꞌ Allah ngidupatnnaꞌ agiꞌ samua urakng nang pucayaꞌ kaꞌ Yesus man nang dah mati biar ia kaꞌ koa idup sama-sama man Yesus. 15 Tentang hal koa, nianlah ajaran Tuhan nang kami maoꞌ sampeatn kaꞌ kitaꞌ: kaꞌ waꞌtu Tuhan Yesus atakng, diriꞌ nang masih idup, inaꞌ nyintoloꞌiaꞌ urakng-urakng nang dah labih doloꞌ mati.a 16 Naꞌe pamimpin malaekat nyaruꞌaꞌ man suara nang nyarikng man tarompet Allah babunyi jaji tanda. Lalu Tuhan Yesus babaro turutnnaꞌ dari saruga, man urakng-urakng pucayaꞌ nang dah mati diidupatnnaꞌ labih doloꞌ. 17 Lakaꞌ koa, diriꞌ nang masih idup man urakng-urakng nang dah mati diangkataꞌ, bakomoꞌ man Tuhan Yesus kaꞌ langit. Diriꞌ badiapmaꞌ man Tuhan Yesus salama-lamanya. 18 Jadi, iburlah saurakng man nang lainnya man pakataatn-pakataatn nian.