Siap-siaplah kaꞌ kaatangan Tuhan
5:1-11
5
Sodara-sodara waꞌtu Tuhan Yesus atakngngaꞌ koa, inaꞌ palalu kami nyontengan agiꞌ kaꞌ kitaꞌ. 2 Jukut kitaꞌ babaro nauꞌan sidi-sidi kadeꞌ Tuhan atakngngaꞌ agiꞌ lea pangalit atakng kaꞌ malam ari.a 3 Naꞌe waꞌtu urakng bakataaꞌ: “Samuanya aman man dame,” jaji waꞌtu koalah tiba-tiba ia kaꞌ koa ditimpaꞌaꞌ kabinasaatn, man inaꞌ saurakng pun nang bisa ngelaꞌ. Hal koa tajajiaꞌ man tiba-tiba, lea rasa sakit nang nimpaꞌ saurakng nangbini nang baranakaꞌ. 4 Tapi sodara-sodara, kitaꞌ inaꞌ idup lea urakng-urakng nang badosa nang inaꞌ nganal Allah. Sampe kaatangan ari Tuhan ngatakngiꞌ kitaꞌ tiba-tiba lea kaatangan pangalit. 5 Jukut kitaꞌ samuanya urakng-urakng nang idup kaꞌ nang tarakng. Kitaꞌ bukeꞌlah urakng-urakng nang badosa nang inaꞌ nganal Allah. 6 Jadi, diriꞌ inaꞌ mulih tidur-tidur maꞌan lea urakng lain. Diriꞌ arus bajaga-jaga man pikiran diriꞌ arus tarakng. 7 Barang urakng nang tidur, tidur waꞌtu malam man ia kaꞌ koa nang kamabuk, kamabuk waꞌtu malam. 8 Tapi diriꞌ urakng-urakng nang idup kaꞌ siakng ari waꞌtu nawang. Diriꞌ arus tatap pucayaꞌ kaꞌ Allah man ngasihiꞌ urakng lain. Diriꞌ arus tatap pucayaꞌ kadeꞌ Allah nyalamatatnnaꞌ diriꞌ. Koa sinjata parang nang ngalinukngiꞌ diriꞌ dari koasa galap.b 9 Barang Allah inaꞌ natapatn diriꞌ untuꞌ ditimpaꞌ ukuman, tapi untuꞌ namu kasalamatan kaꞌ dalapm Tuhan Yesus Karistus, Tuhan diriꞌ. 10 Ia dah mati untuꞌ diriꞌ, biar diriꞌ idup man Ia kaꞌ waꞌtu Ia atakng naꞌe man inaꞌ jaji soꞌal ahe keꞌ kaꞌ waꞌtu koa diriꞌ masih idup ato keꞌ dah mati. 11 Jadi, nasehatiꞌlah saurakng man nang lain man kajah nguatatn lea nang memang kitaꞌ manjawat.Nasehat nang pangabisatn
5:12-22
12 Sodara-sodara, kami mintaꞌ sidi kaꞌ kitaꞌ biar kitaꞌ hormat kaꞌ urakng-urakng nang bakaraja kaꞌ tangah-tangah kitaꞌ, kaꞌ ia kaꞌ koa nang dah di Tuhan milih untuꞌ mimpin man nasehatiꞌ kitaꞌ. 13 Hormatiꞌlah ia kaꞌ koa, jukut ia kaꞌ koa manjawat samuanya koa untuꞌ mantoꞌ kitaꞌ. Kitaꞌ arus batol-batol nganggap ia kaꞌ koa sidi panting man kasihiꞌ ia kaꞌ koa. Iduplah dame man samua urakng.
14 Sodara-sodara, padah kaꞌ urakng nang pamalas bakaraja kadeꞌ tabiat nya kaꞌ koa inaꞌ banar. Bareꞌ kayakinan urakng nang gia galiꞌ, bantoꞌ urakng nang bakakurangan, basikaplah sabar kaꞌ samua urakng. 15 Paratiatnlah, biar ame ada urakng malas nang jahat man nang jahat, tapi barusahalah maꞌan untuꞌ nang edoꞌ kaꞌ sabayaatn kitaꞌ man kaꞌ samua urakng.
16 Man muha nang edoꞌ, kaja neleꞌatn ati diriꞌ nang repo. 17 Kaja badoꞌa kaꞌ Allah tiap waꞌtu. 18 Batarimaꞌ kasihlah kaꞌ Allah untuꞌ sigana hal, edoꞌ ato inaꞌ edoꞌ. Barang nianlah nang di Allah maoꞌiꞌ barang kitaꞌ dah idup kaꞌ dalapm Karistus Yesus.
19 Amelah kitaꞌ ngalangiꞌ Roh Kudus nang bakaraja kaꞌ dalapm diriꞌ masing-masing. 20 Amelah nganggap enteng pasatn-pasatn nang di Roh Kudus nyampeatn. 21 Sigana hal arus diuji doloꞌ, man sigana nang edoꞌ arus diikutiꞌ.
22 Amelah manjawat sigana nang jahat.
Salam pangabisatn
5:23-28
23 Kiraꞌnya Allah nang mareꞌ diriꞌ idup nang panuh dame, manjawat kitaꞌ banar-banar idup kusus untuꞌ Ia. Kiraꞌnya Allah ugaꞌ mihara tubuh, roh man pikiran, man kalakuan kitaꞌ, biar kitaꞌ naꞌ basalah kaꞌ adapatn-Nya sampe waꞌtu Tuhan diriꞌ Yesus Karistus atakng agiꞌ. 24 Ia nang nyaruꞌ kitaꞌ, manjawataꞌ hal koa jukut Ia setia.
25 Sodara-sodara, badoꞌalah ugaꞌ untuꞌ kami.
26 Salamiꞌlah sodara sakapucayaꞌatn man rasa kasih sayang.
27 Kaꞌ dalapm dama Tuhan Yesus aku mintaꞌ sidi kaꞌ kitaꞌ, biar surat nian dibacaatn kaꞌ samua urakng pucayaꞌ.
28 Kiraꞌnya Tuhan diriꞌ Yesus Karistus nojokatn kabaikatn ati-Nya kaꞌ kitaꞌ!