4
Kitaꞌ tuan-tuan, adil man jujurlah kaꞌ amba-amba kitaꞌ; ingatlah, kitaꞌ ugaꞌ ngampuꞌ Tuan kaꞌ saruga. a2 Aruslah kitaꞌ rajitn badoꞌa man bajaga-jagalah, sambil ngucapatn sukur kaꞌ Allah. 3 Badoꞌa ugaꞌlah untuꞌ kami biar Allah mareꞌatn kaꞌ kami kasampatan nang baik untuꞌ nyabaratn barita tentang rahasia Karistus. Tagal hal koalah jaji aku ampeatn nian kaꞌ dalapm pinjara. 4 Badoꞌalah biar aku baya nyampeatn rahasia nian sajalas-jalasnya, lemae nang sabatolnya.
5 Kaꞌ dalapm ubungan kitaꞌ man urakng-urakng nang inaꞌ pucayaꞌ, biarlah kitaꞌ idup bijaksana man make kasampatan sabaik-baiknya. b 6 Aruslah kata-kata kitaꞌ panuh kasih, kata-kata nang ngarepoatn. Sampe kitaꞌ nauꞌan, lemae kitaꞌ arus nyahutiꞌ pertanyaꞌan-pertanyaꞌan dangan.
Panutup man salam
4:7-18
7 Sigana kabar tentang aku, di Tikhikus padahatnnaꞌ kaꞌ kitaꞌ. Tikhikus koa sodara diriꞌ nang dikasihiꞌ, amba nang satia man ayukng palayanan dalapm Allah.c d 8 Aku nyuruh ia kaꞌ kitaꞌ biar kitaꞌ nauꞌan tentang kami man ati kitaꞌ taibur. 9 Tikhikus ku nyuruh sama-sama man Onesimus, sodara diriꞌ nang satia man nang dikasihiꞌ, saurakng dari antara kitaꞌ. Nya dua koa madahatnnaꞌ kaꞌ kitaꞌ sigana hal nang jaji kaꞌ dian.e
10 Aristarkus, nang ada sama man aku kaꞌ dian, kaꞌ dalapm pinjara ngiripm salam kaꞌ kitaꞌ. Markus, sakadiriatn Barnabas ugaꞌ ngiripm salam. Aku ugaꞌ bapasatn kaꞌ kitaꞌ, tarimaꞌlah Markus waꞌtu ia atakng kaꞌ kitaꞌ.f 11 Salam dari Yesus nang di nalah Yustus ugaꞌ. Dari urakng-urakng Yahudi nang dah pucayaꞌ kaꞌ Tuhan Yesus, kahe nya talu ihan nang bakaraja sama-sama man aku untuꞌ Karajaan Allah. Ia kaꞌ koa sidi-sidi mantoꞌ aku. 12 Salam dari Epapras untuꞌ kitaꞌ; ia saurakng dari antara kitaꞌ, amba Karistus Yesus nang tarus bajuang dalapm doꞌa untuꞌ kitaꞌ, biar kitaꞌ sidi-sidi pucayaꞌ kaꞌ Karistus man jaji batol-batol dewasa secara rohani ugaꞌ biar kitaꞌ siaꞌ yakin tentang samua kamaoꞌan Allah kaꞌ kitaꞌ.g 13 Tagal aku baya mareꞌ kasaksian tentang Epapras, kadeꞌ ia karaja mati-matian untuꞌ kitaꞌ man untuꞌ ia kaꞌ koa nang kaꞌ Laodikia man Hierapolis. 14 Salam dari dokter Lukas, nang diriꞌ ngasihiꞌ, man salam ugaꞌ dari Demas untuꞌ kitaꞌ.h
15 Sampeatn salam kami kaꞌ sodara-sodara sakapucayaꞌatn kaꞌ Laodikia; ugaꞌ kaꞌ Nimpa man jamaat nang ada kaꞌ rumahnya. 16 Man kadeꞌ surat nian dah di macaatn kaꞌ antara kitaꞌ, usahaatn ugaꞌ di bacaatn kaꞌ jamaat Laodikia. Man surat nang untuꞌ Laodikia ugaꞌ di bacaatn kaꞌ kitaꞌ. 17 Man padahatn kaꞌ Arkhipus: biar tugas kusus untuꞌ ngalayaniꞌ Tuhan nang dimareꞌatn kaꞌ ia, kiraꞌnya ia selesaiatn baik-baik.i
18 Salam nian ku nyontengan man kokotku babaro. Ame lupa kadeꞌ aku masih kaꞌ dalapm pinjara. Kiraꞌnya kabaikatn ati Allah nyarataiꞌ kitaꞌ. Hormat kami, Paulus man Timotius.