3
Kitaꞌ dah dingidupatn man Karistus, tagal koa gagoꞌlah hal-hal nang kaꞌ saruga, kaꞌ mae Karistus ada, duduk kaꞌ sabalah kanan Allah.a 2 Arahatn pikirannyu kaꞌ hal-hal nang kaꞌ saruga, bukeꞌ nang kaꞌ dunia. 3 Idupnyu nang lama dah mati, man idupnyu nang baharu napeꞌ kateleꞌanan sapanuhnya sama lea kamuliaatn Karistus giꞌ napeꞌ kateleꞌanan ugaꞌ barang Allah giꞌ inaꞌ madahatnnya. 4 Takaꞌ Karistus sumber paridupatn kitaꞌ madahatn diriꞌ-Nya agiꞌ, jaji kitaꞌ ugaꞌ diteleꞌatnnannaꞌ dalapm kamuliaatn sama-sama man Karistus.Talino baharu
3:5-17
5 Tagal koa, buaknglah sigana hal-hal dunia kaꞌ dalapm diriꞌnyu, lea sigana macam dosa (pikiran, pakataatn, man ahe nang dipanjawat) nang baubungan man kamaluatn talino, pikiran jahat, napsu jahat man ugaꞌ sarakah nang sama man nyambah berhala. 6 Hal-hal koalah nang ngatangan kaberaatn Allah kaꞌ urakng-urakng nang inaꞌ ngasiꞌ kaꞌ Ia. 7 Deꞌe kitaꞌ ugaꞌ manjawat hal-hal koa, takaꞌ kitaꞌ di kuasaiꞌnya. 8 Tapi ampeatn buaknglah sigana hal-hal nian dari idup kitaꞌ, kaberaatn, manggila ato teget kaꞌ urakng, ngomong nang inaꞌ-inaꞌ man kata-kata kotor nang kaluar dari molot nyu. 9 Ame agiꞌ ngalokiꞌ sekoꞌ man nang lainnya, tagal idup nang lama man sigana sipatnya koa dah kitaꞌ ngalapasatn. b 10 Kitaꞌ ampeatn dah dimareꞌ idup nang baharu. Kitaꞌ talino baharu, nang tagah dibaharuiꞌ maꞌan untuꞌ namu pangatahuan nang banar nurut gambar Panampaꞌnya, yakoa Allah; c 11 dalapm hal nian inaꞌ ada agiꞌ urakng Yunani ato urakng Yahudi, urakng babalak ato inaꞌ babalak, urakng Barbar ato urakng Skit, amba ulutn ato urakng merdeka. Tapi Karistus idup kaꞌ dalapm samua urakng nang pucayaꞌ kaꞌ Ia.
12 Kitaꞌlah umat Allah. Ia kasih kaꞌ kitaꞌ man milih kitaꞌ kusus nang di-Nya ngampuꞌ. Koalah tagalnya kitaꞌ arus nojokatn rasa kasihatn, kitaꞌ arus baik ati, rendah ati, lamah lambut, man tahan singsara.d 13 Kitaꞌ arus sabar saurakng kaꞌ nang lain, man ngamponiꞌ kadeꞌ ada nang dandam kaꞌ nang lain, sama lea Allah dah ngamponiꞌ kitaꞌ, panjawatlah lekoa ugaꞌ.e 14 Tapi sipat nang paling panting kaꞌ atas samuanya kajah bakasihiꞌ. Kiraꞌnya kasih jaji tali pangikat nang nyoteꞌatn kitaꞌ jaji sampurna. 15 Biarlah dame sejahtera Karistus marentah kaꞌ dalapm atinyu, tagal untuꞌ koalah kitaꞌ dah dinyaruꞌ kaꞌ dalapm soteꞌ tubuh Karistus. Man injeꞌlah diriꞌ kaja basukur kaꞌ Ia. 16 Biarlah ajaran Karistus tarus mimpin kaidupatnnyu man tumuh subur dalapm atinyu, biar kitaꞌ kajah ngajar man nasehatiꞌ man bijaksana. Salah soteꞌ cara untuꞌ manjawat hal koa man nyanyian lagu-lagu dari kitap Masmur man lagu rohani lain. Biar atinyu kaja basukur kaꞌ Allah.f 17 Man sigana nang di kitaꞌ panjawat man omongkatn, panjawatlah kaꞌ dalapm dama Tuhan Yesus. Man basukurlah kaꞌ Allah Apaꞌ lewat Yesus.
Ubungan antara anggota-anggota rumah tangaꞌ
3:18–4:6
18 Kitaꞌ nangbini-nangbini nang dah balaki, ngasiꞌlah kaꞌ laki kitaꞌ, lekoalah saharusnya kalakuan kitaꞌ kaꞌ dalapm Tuhan.g
19 Lekoa ugaꞌlah kitaꞌ nanglaki nang dah babini, kasihiꞌlah bini kitaꞌ, amelah bongkaꞌ kaꞌ ia.h
20 Kitaꞌ ugaꞌ kamudaꞌ-kamudaꞌ ngasiꞌlah urakng tuha kitaꞌ kaꞌ sigana hal, tagal koalah nang ngarepoatn ati Allah.i
21 Lekoa ugaꞌ man kitaꞌ apaꞌ-apaꞌ, amelah kitaꞌ nyakitiꞌ ati kamudaꞌ-kamudaꞌ kitaꞌ biar ia kaꞌ koa inaꞌ jaji putus asa.j
22 Lekoa ugaꞌlah kitaꞌ amba ulutn, ngasiꞌlah kaꞌ tuan nang ngampuꞌ kitaꞌ kaꞌ dunia nian dalapm sigana hal. Ame kahe kaꞌ adapatnnya kaꞌ koa ngarepoatnnya, tapi man ati nang inaꞌ bapuraꞌ-puraꞌ, tagal kitaꞌ menghormatiꞌ Allah.k 23 Ahe pun ugaꞌ nang kitaꞌ panjawat, panjawatlah man ati nang inaꞌ bapuraꞌ-puraꞌ lea kaꞌ Tuhan bukeꞌ lea kaꞌ talino. 24 Kitaꞌ nauꞌan, kadeꞌ dari Tuhan Yesuslah kitaꞌ narimaꞌaꞌ bagiatn nang jaji upah kitaꞌ. Karistus koa Tuan man kitaꞌ amba-amba-Nya. 25 Sae jaꞌ nang manjawat kasalahatn, ia babaro nang nanggongaꞌ kasalahatn nya koa, tagal Allah inaꞌ ba teleꞌ muha. l