SURAT PAULUS NANG KADUA
UNTUꞌ JAMAAT KAꞌ
TESALONIKA
Salam
1:1-2
1
Dari Paulus, Silwanus man Timotius, untuꞌ jamaat-jamaat nang pucayaꞌ kaꞌ Tesalonika, kaꞌ dalapm Allah, Apaꞌ diriꞌ man Tuhan Yesus Karistus.a 2 Kiraꞌnya Allah, Apaꞌ diriꞌ, man Tuhan Yesus Karistus nojokatn kabaikatn ati-Nya man mareꞌ kaꞌ kitaꞌ idup nang panuh dame.Basukur man badoꞌa
1:3-12
3 Sodara-sodara kami kaja batarimaꞌ kasih kaꞌ Allah jukut kitaꞌ siaꞌ pucayaꞌ kaꞌ Tuhan Yesus Karistus. Man kami ugaꞌ batarimaꞌ kasih jukut kasih kitaꞌ kaꞌ sekoꞌ man nang lainnya siaꞌ kuat. 4 Koalah tagalnya, kaꞌ maeaꞌ maꞌan kami ampus naboꞌ jamaat-jamaat Allah, kami kaja ngesahatn tentang kitaꞌ man karepoatn. Kami repo ngesahatn lemae kitaꞌ tatap kuat pucayaꞌ kaꞌ Tuhan Yesus, biarpun kitaꞌ ngalamiꞌ aniaya man singsara. 5 Cara kitaꞌ batahan lea koa muktiatn kadeꞌ Allah gia batindak adil kaꞌ talino, sampe kitaꞌ ditantuatn pantas tamaꞌ kaꞌ dalapm Karajaan Allah. Barang memang kitaꞌ tagah singsara tagal ngasiꞌ kaꞌ Allah. 6 Allah manjawataꞌ nang adil man mareꞌaꞌ ukuman nang barat kaꞌ ia kaꞌ koa nang manjawat kitaꞌ singsara. 7 Man Ia mareꞌ parasaan nang repo kaꞌ kitaꞌ nang dinindas, man ugaꞌ kaꞌ kami, kaꞌ waꞌtu Tuhan Yesus atakng dari saruga madahatn diriꞌ-Nya basama-sama man malaekat-malaekat-Nya, dalapm koasa-Nya, man dalapm nyala api. 8 Man samua urakng nang inaꞌ kanal kaꞌ Allah man nang baiꞌ ngasiꞌ kaꞌ Kabar Baik tentang Tuhan Yesus di-Nya ukumaꞌ. 9 Ia kaꞌ koa diukumaꞌ salama-lamanya, dijauhatn dari adapatn Tuhan, man ia kaꞌ koa inaꞌ suah neleꞌaꞌ sidi luar biasanya koasa Allah. 10 Ukuman koa jajiaꞌ takaꞌ Tuhan Yesus atakng agiꞌ naꞌe. Kaꞌ waꞌtu koa, Ia dimuliaatnnaꞌ man dipuji di samua urakng nang pucayaꞌ kaꞌ Ia. Man kitaꞌ ugaꞌ sama-sama umat Allah koa, tagal kitaꞌ dah pucayaꞌ pakataatn koa nang kami ngesahatn. 11 Untuꞌ koalah kami gia badoꞌa untuꞌ kitaꞌ, biar Allah mantoꞌ kitaꞌ idup pas man kamaoꞌan-Nya, barang untuꞌ koalah Ia nyaruꞌ kitaꞌ jaji umat-Nya. Kami ugaꞌ badoꞌa man koasa Allah, kitaꞌ bisa manjawat hal nang edoꞌ man nyalasaiatn sigana nang kitaꞌ ngarajaatn tagal kitaꞌ pucayaꞌ kaꞌ Yesus. 12 Man nang koa, dama Yesus Tuhan diriꞌ dimuliaatn kaꞌ dalapm kaidupatn kitaꞌ, man kitaꞌ ugaꞌ dihormatiꞌ tagal Allah man Tuhan diriꞌ, Yesus Karistus, sidi baik ati kaꞌ diriꞌ.