Kajahatatn talino sanapeꞌ Tuhan Yesus atakng
2:1-12
2
Ampeatn kami maoꞌ nyontengan tentang waꞌtu takaꞌ Tuhan Yesus Karistus atakngngaꞌ agiꞌ man Allah ngomoꞌan diriꞌ basama-sama batamu man Ia. Sodara-sodara, kami mintaꞌa 2 biar kitaꞌ ame mudah bingung man gulinsah, takaꞌ ada urakng-urakng nang ngajaratn kadeꞌ ari kaatangan Tuhan Yesus kadua kalinya koa dah tajaji. Ame pucayaꞌ kaꞌ ia kaꞌ koa, sakalipun ia kaꞌ koa bakata pasatn nian dari roh Allah ato dari ajaran kami man dari surat kami babaro. 3 Man amelah miaratn urakng nipu kitaꞌ man cara ahe pun ugaꞌ. Sanapeꞌ ari kaatangan Tuhan Yesus, arus tajaji doloꞌ urakng nang rami barontak ngalawan Allah. Man ada saurakng nang dinyabut Talino Jahat nang nampilatnnaꞌ diriꞌ, ia koa dinantuatn untuꞌ tamaꞌ kaꞌ naraka. 4 Man kasombongan Talino Jahat koa ngalawanaꞌ man ninggian diriꞌnya kaꞌ atas samua nang di talino nyambah, ato samua nang di talino ngangap Allah. Bahkan ia dudukaꞌ kaꞌ dalapm Rumah Kudus Allah man madahatn kadeꞌ diriꞌnya koalah Allah.b5 Inaꞌ keꞌ kitaꞌ ingat, kadeꞌ hal koa pancah kungataatn kaꞌ kitaꞌ, takaꞌ aku masih man kitaꞌ? 6 Man ampeatn, kitaꞌ nauꞌan ahe nang nahan Talino Jahat koa untuꞌ atakng, sampe ia napeꞌ atakng madahatn diriꞌnya. 7 Ia nang manjawat kajahatatn koa, dah mulaiꞌ bakaraja nosok-nosok, jukut masih ada nang ngalang-ngalangiꞌnya. Tapi naꞌe kadeꞌ nang ngalangiꞌnya koa dah di Allah nyingkiratn, 8 baruꞌlah kateleꞌatn Talino Jahat koa. Takaꞌ Tuhan Yesus atakng agiꞌ, Ia munuhaꞌ Talino Jahat koa man sengat dari molot-Nya.c 9 Kaatangan Talino Jahat koa dari koasa Ibalis, kapalaꞌ setan-setan. Man ia manjawataꞌ hal-hal nang luar biasa man hal-hal ajaip man tanda-tanda untuꞌ nipu urakng.d 10 Talino Jahat koa ugaꞌ magunaanaꞌ sigana macam cara nang jahat untuꞌ nipu urakng-urakng. Ia kaꞌ koa dibinasaatnaꞌ barang ia kaꞌ koa inaꞌ suka man baiꞌ narimaꞌ barita nang banar tentang Yesus Karistus nang baya nyalamatatn nya kaꞌ koa. 11 Koalah tagalnya Allah ngatangan kaꞌ ia kaꞌ koa kuasa nang nyasatatn, sampe ia kaꞌ koa pucayaꞌ kaꞌ ahe nang inaꞌ banar. 12 Allah manjawat lea koa biar urakng-urakng nang inaꞌ suka kaꞌ ajaran nang banar, tapi suka manjawat nang jahat, pasti diukumaꞌ.
Dimilih untuꞌ disalamatatn
2:13-17
13 Sodara-sodara nang di Tuhan Yesus ngasihiꞌ, kami arus kaja basukur kaꞌ Allah, barang dari mulanya Allah dah milih kitaꞌ untuꞌ disalamatatn. Koa tajaji tagal pakarajaatn Roh Kudus nang ngudusatn kitaꞌ, ugaꞌ tagal kitaꞌ pucayaꞌ kaꞌ kabar nang banar dari Allah. 14 Untuꞌ koalah Allah nyaruꞌ kitaꞌ lewat Kabar Baik nang kami ngesahatn kaꞌ kitaꞌ, biar kitaꞌ namu agiatn dalapm kamuliaatn Yesus Karistus, Tuhan diriꞌ. 15 Jaji, sodara-sodara kitaꞌ arus badiri kuat man ingatlah sigana ajaran nang dah kitaꞌ narimaꞌ dari kami, baik nang kami nyampeatn secara langsung ato pun nang kami nulis. 16 Tuhan diriꞌ, Yesus Karistus, man Allah, Apaꞌ diriꞌ, kaja ngibur man manjawat kitaꞌ ngarapatn nang edoꞌ jukut Ia ngasihiꞌ man nojokatn kabaikatn ati-Nya kaꞌ kitaꞌ. Kami badoꞌa biar Tuhan Yesus man Allah 17 ngibur atinyu man nguatatn kitaꞌ biar kitaꞌ baya manjawat man nyampeatn sigana hal nang edoꞌ.