Badoꞌa man bakaraja
3:1-15
3
Ahirnya, sodara-sodara taruslah badoꞌa kaꞌ Allah untuꞌ kami, biar barita tentang Tuhan Yesus ganceh didangngar kaꞌ manyak tampat lain man ditarimaꞌ baik, sama lea nang kitaꞌ manjawat. 2 Man badoꞌalah biar kami dibebasatn dari urakng-urakng nang sidi jahat nian, barang manyak urakng nang nangngar barita tentang Yesus tapi inaꞌ pucayaꞌ. 3 Tapi Tuhan koa setia, Ia nguatatnaꞌ kitaꞌ man ngalinukngiꞌ kitaꞌ dari nang jahat. 4 Man kami pucayaꞌ kaꞌ Tuhan, kadeꞌ ahe nang kami pasatn kaꞌ kitaꞌ, kitaꞌ panjawat man kitaꞌ panjawataꞌ maꞌan. 5 Kami badoꞌa biar Tuhan ngirikng kitaꞌ untuꞌ labih ngarati kadeꞌ Allah ngasihiꞌ kitaꞌ man mantoꞌ kitaꞌ batahan dalapm kasingsaraatn lea Karistus.6 Sodara-sodara, dalapm dama Tuhan Yesus Karistus, kami parentahatn biar kitaꞌ jauhiꞌ samua sodara nang idupnya pamalas man nang inaꞌ nurutiꞌ ajaran-ajaran nang kami ajaratn kaꞌ ia kaꞌ koa. 7 Kitaꞌ babaro nauꞌan lemae saarusnya kitaꞌ niru kaidupatn kami barang kami bukeꞌ pamalas takaꞌ kami badiapm man kitaꞌ. 8 Kami inaꞌ makatn makanan urakng nang inaꞌ dibayar. Sabaliknya siakng malaman kami bakaraja paluh memeh biar kami inaꞌ nyusahiꞌ sae pun ugaꞌ kaꞌ antara kitaꞌ. 9 Kami manjawat nian, bukeꞌ tagal kami inaꞌ bahak kaꞌ bantuan dari kitaꞌ, tapi kami maoꞌ nyajiatnaꞌ diriꞌ kami jaji conto untuꞌ kitaꞌ turutiꞌ. 10 Takaꞌ kami man kitaꞌ, kami mareꞌ parentah nian: kadeꞌ ada nang baiꞌ bakaraja, usah ia makatn! 11 Kami ngataatn lenian, gara-gara kami dah nangngar kadeꞌ kaꞌ antara kitaꞌ ada nang pamalas. Ia kaꞌ koa inaꞌ karaja ahe-ahe tapi sibuk nyampuriꞌ urusan urakng lain. 12 Mpakoalah kami mintaꞌ man nasehatiꞌ kaꞌ dalapm Tuhan diriꞌ Yesus Karistus, biar ia kaꞌ koa ngubah tabiatnya kaꞌ koa man mulaiꞌ bakaraja agiꞌ sampe ia kaꞌ koa baya mali makanannya babaro. 13 Man kitaꞌ, sodara-sodara amelah latih manjawat ahe nang banar. 14 Kadeꞌ ada urakng nang inaꞌ nurutiꞌ pakataatn kami dalapm surat nian, ati-ati boh kaꞌ urakng nang lekoa ame bagaul man ia biar ia supeꞌ. 15 Tapi ame jadiatn urakng koa saolah-olah munsuhnyu, tapi nasehatiꞌ ia lea sodara.
Salam pangabisatn
3:16-18
16 Ampeatn, kami badoꞌa kaꞌ Allah biar Ia mareꞌatn idup nang panuh dame tiap waꞌtu man dalapm sigana hal. Tuhan nyarataiꞌ kitaꞌ samua. 17 Aku, Paulus, man kokotku babaro nyontengan kata-kata pangabisatn nian kaꞌ kitaꞌ. 18 Kiraꞌnya Tuhan diriꞌ Yesus Karistus neleꞌatn kabaikatn ati-Nya kaꞌ kitaꞌ samua! Amin.