Tugas Timotius dalapm ngadapiꞌ pangajar sasat
4:1-16
4
Roh Kudus tarus tarang bakata kadeꞌ kaꞌ ahir jaman, sabagian urakng baiꞌaꞌ agiꞌ mucayaꞌiꞌ ajaran nang banar. Ia kaꞌ koa nurutiaꞌ roh-roh nang nyasatatn man nunaꞌan ajaran setan-setan 2 Ajaran koa diajaratn urakng-urakng nang bapuraꞌ-puraꞌ baik nang suka nipu man nyasatatn urakng lain. Urakng-urakng jahat nian inaꞌ bisa medaatn mae nang banar mae nang salah. 3 Ia kaꞌ koa ngajar urakng-urakng untuꞌ inaꞌ panganten man inaꞌ makatn makanan tatantu. Sabatolnya, makanan koa di Allah nampaꞌ untuꞌ di makatn man ucapatn sukur kaꞌ Ia di urakng-urakng nang dah pucayaꞌ kaꞌ Karistus man nang dah nganal ajaran nang banar. 4 Samua nang di Allah koa manjawat sidi edoꞌ. Inaꞌ ada nang haram kadeꞌ ditarimaꞌ man ucapatn sukur, 5 barang samua makanan disuciatn di pakataatn Allah man di doꞌa diriꞌ.6 Ajaratnlah ajaran-ajaran nang ku nyampeatn kaꞌ urakng-urakng pucayaꞌ kaꞌ naun, sahingga kaꞌ adapatn Karistus Yesus, kao tabuktiaꞌ jaji amba-Nya nang baik. Saurakng amba Karistus nang baik aruslah siaꞌ dewasa dalapm samua pangajaran nang membangun kayakinan diriꞌ lea ajaran-ajaran nang edoꞌ nang dah dinyu nunaꞌan. 7 Jauhiꞌlah gesah-gesah nang alok-alok nang inaꞌ baguna man inaꞌ sasuai man kabanaran Allah. Sabaliknya latihlah diriꞌnyu babaro untuꞌ idup nang banar nang ngarepoatn Allah. 8 Tagal latihan tubuh sabebet jaꞌ gunanya, tapi latihan rohani baguna dalapm samua hal, barang barisiꞌ janji untuꞌ idup kaꞌ dunia ampeatn nian man untuꞌ idup lakaꞌ ningalatn dunia nian. 9 Pakataatn nang tadi ku nyampeatn koa banar man patut ditarimaꞌ man bisa dipucayaꞌ sapanuhnya. 10 Koa tagalnya diriꞌ bajuang man bakaraja karas, tagal diriꞌ baarap sapanuhnya kaꞌ Allah nang idup, Ialah Panyalamat samua urakng, tarutama urakng-urakng nang pucayaꞌ.
11 Ajaratnlah maꞌan samuanya nian man suruhlah urakng-urakng nurutiꞌnya. 12 Biarpun kao masih mudaꞌ, amelah sampe ada nang ngaremehan kao. Aruslah kao jaji conto nang edoꞌ untuꞌ urakng-urakng pucayaꞌ man cara ngomongnyu, kaꞌ dalapm tingkah lakunyu, dalapm kasihnyu, dalapm kasetiaannyu man dalapm kasuciannyu. 13 Sampe aku atakng naꞌe, kao arus sidi-sidi macaatn Kitap-Kitap Suci kaꞌ urakng-urakng, nguatatn ia kaꞌ koa man ngajar nya kaꞌ koa. 14 Amelah kao lengah make karunia dari Roh Kudus nang dibareꞌatn kaꞌ kao kaꞌ waꞌtu pamimpin-pamimpin jamaat ngangkat kokot nya kaꞌ koa kaꞌ atas kapalanyu, man nyampeatn pasatn Allah tentang diriꞌnyu. 15 Karajaatnlah tugas-tugas koa sidi-sidi sampe kayakinan man palayanannyu siaꞌ jelas kateleꞌanan kaꞌ samua urakng. 16 Awasiꞌlah diriꞌnyu babaro man awasiꞌlah ajarannyu. Kao arus tarus manjawat hal-hal nang kuparentahatn kaꞌ kao. Man hal koa, kao nyalamatatnnaꞌ diriꞌnyu man samua urakng nang nangngar kao.