Sarat-sarat jaji pamimpin jamaat
3:1-7
3
Banarlah pakataatn nian: “Kadeꞌ saurakng maoꞌ jaji pamimpin jamaat, barati ia nginginiꞌ tanggongjawap nang edoꞌ.” 2 Tagal koa pamimpin jamaat aruslah saurakng nang inaꞌ bacacat, babini sekoꞌ, dapat nahan diriꞌ, bijaksana, sopan, suka mareꞌ tumpangan, pane ngajar urakng,a 3 bukeꞌ panyocok, bukeꞌ pamera tapi paramah, pandame, bukeꞌ amba duit, 4 saurakng kapalaꞌ kaluarga nang edoꞌ di kamudaꞌ-kamudaꞌnya seganiꞌ man hormatiꞌ. 5 Kadeꞌ saurakng inaꞌ nauꞌan ngapalaiꞌ kaluarganya babaro, lemae keꞌ ia baya ngurus jamaat Allah? 6 Amelah ia saurakng nang baruꞌ batobat, biar ia ame jaji sombong man kana ukuman Ibalis. 7 Ia aruslah urakng nang ngampuꞌ dama nang edoꞌ dalapm masarakat, tagal kadeꞌ inaꞌ lea koa, ia dihinaaꞌ urakng sampe jantuꞌ kaꞌ dalapm parangkap Ibalis.Sarat-sarat untuꞌ palayan jamaat
3:8-13
8 Palayan jamaat aruslah urakng nang edoꞌ man tulus; inaꞌ pamabuk man bukeꞌ urakng nang tamaꞌ kaꞌduit. 9 Ia kaꞌ koa arus mampautiꞌ kuat-kuat kaꞌ ahe nang dah di Allah madahatn kaꞌ diriꞌ tentang iman diriꞌ, man ugaꞌ arus idup man ati nurani nang murni. 10 Ia kaꞌ koa arus diuji doloꞌ, dibareꞌ tugas palayanan samintara. Kadeꞌ palayanannya tabukti inaꞌ bacacat, baruꞌlah ia mulih diangkat jaji palayan jamaat. 11 Bini palayan jamaat ugaꞌ arus urakng nang dihargaiꞌ masarakat. Ia kaꞌ koa bukeꞌlah urakng nang suka majahat urakng lain, baya nahan diriꞌ, man baya dipucayaꞌiꞌ kaꞌ dalapm samua hal. 12 Palayan jamaat aruslah babini sekoꞌ man sanggup ngatur kamudaꞌ-kamudaꞌ man rumah tangngaꞌnya. 13 Palayan jamaat nang nyalanan tugas nang baik siaꞌ dihormatiaꞌ urakng lain. Tagal koa, ia kaꞌ koa siaꞌ barani ngataatn kaꞌ urakng lain tentang kapucayaꞌatnnya kaꞌ Karistus Yesus.
Jamaat Allah nianlah dasar man panyanakng kabanaran
3:14-16
14 Aku baarap inaꞌ lama agiꞌ aku naboꞌaꞌ kao. Biarpun lea koa, aku nyontengan ugaꞌ surat nian untuꞌnyu. 15 Kadeꞌ aku talambat, dari surat nian kao nauꞌannaꞌ lemae urakng arus idup jaji kaluarga Allah. Nang dimaksut kaluarga Allah koa, samua jamaat nang idup nang di Allah ngampuꞌ. Jamaat nianlah nang jaji dasar man tihakng panyanakng pangajaran nang banar dari Allah. 16 Man sabatolnya agunglah rahasia ibadah diriꞌ:
“Ia nang dah madahatn diriꞌ-Nya dalapm rupa talino,
dibanaratn dalapm Roh Kudus;
nang neleꞌatn diriꞌ-Nya kaꞌ malaekat-malaekat,
dingesahatn kaꞌ antara bangsa-bangsa nang inaꞌ kanal kaꞌ Allah;
nang dipucayaꞌiꞌ kaꞌ aiꞌ tanah,
dingangkat dalapm kamuliaatn.”