Ajaran tentang lemae jamaat badoꞌa
2:1-7
2
Labih doloꞌ aku nasehatiꞌ: Tagal masalah-masalah koa tadi, sampeatnlah pamintaan, doꞌa man ucapatn sukur untuꞌ samua urakng. 2 Man badoꞌalah untuꞌ raja-raja man samua panguasa pamarentah. Mintaꞌlah kaꞌ Allah biar diriꞌ bisa idup tanang man dame, man bisa bebas untuꞌ idup pas man nang di Allah maoꞌiꞌ man cara nang pantas kaꞌ paneleꞌanan samua urakng. 3 Koalah nang edoꞌ man nang di Allah maoꞌiꞌ, Panyalamat diriꞌ. 4 Ia maoꞌ biar samua urakng disalamatatn man nauꞌan kaꞌ ahe nang banar. 5 Barang kahe ada soteꞌ Allah, man kahe sekoꞌ urakng jaꞌ nang jaji pangantara Allah man talino, ia koa Karistus Yesus nang jaji talino. 6 Ialah nang dah nyarahatn diriꞌ-Nya babaro untuꞌ mebasatn sigana talino dari dosa. Hal koa di manjawat pas man waꞌtu nang di Allah nantuatn, nojokatn kabaikatn ati-Nya kaꞌ talino. 7 Man koalah tagalnya aku dinyuruh ampus kaꞌ urakng-urakng nang bukeꞌ urakng Yahudi untuꞌ ngesahatn Kabar Baik kaꞌ ia kaꞌ koa man ngajaratn ajaran nang banar tentang Yesus. Ahe nang kungataatn nian banar! Aku inaꞌ alok!aAjaran tentang sikap nanglaki man nangbini kaꞌ dalapm ibadah
2:8-15
8 Mulakng agiꞌ tentang doꞌa, aku maoꞌ tiap kali kitaꞌ ibadah kaꞌ Allah, nanglaki badoꞌa man ugaꞌ kalakuannya arus pas man kamaoꞌan Allah. Inaꞌ bera man inaꞌ basalisih man urakng lain. 9 Ampa koa ugaꞌ kiraꞌnya nangbini. Kiraꞌnya ia basedo nang pantas, sopan man sederhana, buꞌuknya ame dipiꞌit-piꞌit. Ame make amas ato mutiara atopun pakean nang mahal-mahal.b 10 Tapi kiraꞌnya ia basoleꞌ man kalakuan-kalakuan nang edoꞌ lea nang pantas untuꞌ nangbini nang baibadah kaꞌ Allah. 11 Saarusnyalah nangbini nangngaratn ihan man narimaꞌ ajaran nang patut. 12 Aku inaꞌ ngijinan nangbini ngajar man ugaꞌ inaꞌ ngijinannya marentah nanglaki. Aruslah ia nangngaratn ihan. 13 Barang Adam nang pamulaꞌatn dinampaꞌ baruꞌlah Hawa.c 14 Man bukeꞌ Adam nang di Ibalis nipu, tapi nangbinilah nang di Ibalis nipu sampe ia ngalanggar parentah Allah.d 15 Biarpun lekoa nangbini disalamatatnnaꞌ tagal maranakatn kamudaꞌ, asal ia tatap pucayaꞌ panuh kaꞌ Karistus man tatap ngasihiꞌ urakng lain sarata idup suci man pantas.