SURAT PAULUS NANG PAMULAꞌATN UNTUꞌ
TIMOTIUS
Salam
1:1-2
1
Dari Paulus, rasul Karistus Yesus nurut parentah Allah, Panyalamat diriꞌ, man Karistus Yesus dasar nang diriꞌ ngarapatn. 2 Untuꞌ Timotius, nang dah ku nganggap lea anakku babaro tagal kapucayaꞌatn diriꞌ nang sama kaꞌ Tuhan Yesus. Kiraꞌnya Allah, Apaꞌ diriꞌ, man Karistus Yesus, Tuhan diriꞌ, kaja nojokatn kabaikatn ati-Nya man mareꞌ untukng tuah man idup nang panuh dame kaꞌ kitaꞌ.aTentang ajaran nang sasat
1:3-11
3 Waꞌtu aku maoꞌ ampus kaꞌ Makedonia, aku mintaꞌ biar kao tatap badiapm kaꞌ Epesus, barang di koa ada basangahe urakng nang dah ngajaratn ajaran nang salah. Jaji aku mintaꞌ biar kao nyuruh ia kaꞌ koa badiapm ngajaratn ajaran salah koa. 4 Man ame sampe ia kaꞌ koa magunaan waꞌtu nya kaꞌ koa ngajaratn ajaran nang badasar curita dongeng ato tentang daptar katurunan eneꞌ moyang. Palajaran nang lea koa muat bosan barang inaꞌ ada abis-abisnya, man kajuh nimulatn salisih paham tentang hal-hal nang inaꞌ bisa dipastiatn. Man ajaran lea koa kajuh ngalangiꞌ Allah madahatn kamaoꞌan-Nya untuꞌ nyalamatatn talino. Rancana Allah koa kahe baya dikanal lewat pucayaꞌ kaꞌ Karistus. 5 Tujuan nasehat nian biar urakng pucayaꞌ ngasihiꞌ sekoꞌ man nang lainnya. Kasih nang lea koa kaluar dari ati nang suci, ati nang baya milih mae nang banar, man ugaꞌ dari kapucayaꞌatn nang banar-banar kaꞌ Karistus. 6 Tapi ada urakng nang nyempang dari tujuan koa, sasat man omongan nang toaꞌ-toaꞌ. 7 Ia kaꞌ koa maoꞌ jaji guru agama Yahudi, tapi inaꞌ ngarati ahe nang di nya kaꞌ koa ngajaratn, biarpun ia kaꞌ koa bapikir kadeꞌ ia kaꞌ koa nauꞌan tentang hal koa. 8 Kitaꞌ nauꞌan kadeꞌ ukum Torat baik kadeꞌ tapat digunaan, 9 barang kitaꞌ nauꞌan kadeꞌ ukum Torat dibareꞌatn bukeꞌ untuꞌ ngukum urakng-urakng nang idupnya banar. Tapi ukum Torat dibareꞌatn untuꞌ urakng-urakng nang inaꞌ suka nangngar parentah Tuhan, suka ngalawan Allah, inaꞌ hormat kaꞌ Tuhan, babuat dosa, baiꞌ idup suci, kahe mikiriꞌ hal-hal duniawi, bahkan ada nang sampe munuh apaꞌ man uweꞌ nya kaꞌ koa ato urakng lain, 10 urakng pamabayaꞌ man ugaꞌ ia kaꞌ koa nang baubungan tubuh, nanglaki man nanglaki, nangbini man nangbini. Urakng-urakng nang pantas diukum ugaꞌ urakng nang nyual ulutn, samua nang pangalok, man nang basaksi alok-alok tentang urakng lain, man tiap urakng nang kalakuannya batantangan man ajaran nang banar. 11 Man ajaran nang banar koa pas man Kabar Baik nang Allah mucayaꞌatn kaꞌ aku untuꞌ ku gesahatn. Kiraꞌnya Allah dipuji lewat Kabar Baik koa nang ngambaratn kamuliaatn-Nya!
Basukur kaꞌ kabaikatn ati Allah
1:12-17
12 Aku basukur kaꞌ Tuhan diriꞌ Karistus Yesus nang kaja mareꞌ kakuatatn kaꞌ aku. Aku ugaꞌ sidi basukur kaꞌ Ia nang ngangap aku satia sampe Ia mucayaꞌatn barita Kabar Baik koa kaꞌ aku. 13 Padahal deꞌe aku urakng nang ngina dama-Nya, suka batindak karas ugaꞌ nganiaya pangikut-Nya. Tapi Karistus ngasihatniꞌ aku, barang waꞌtu koa aku napeꞌ pucayaꞌ, jaji aku inaꞌ nauꞌan ahe nang kumanjawat.b 14 Tuhan diriꞌ ugaꞌ tarus neleꞌatn kaꞌ aku kadeꞌ Ia sidi kasih kaꞌ aku. Ia ugaꞌ manjawat aku pucayaꞌ kaꞌ Ia man baya ngasihiꞌ urakng lain. Nianlah nang jaji kaꞌ diriꞌ takaꞌ diriꞌ ngampuꞌ ubungan akrab man Karistus Yesus. 15 Pakataatn nian banar man patut ditarimaꞌ sapanuhnya: “Karistus Yesus atakng kaꞌ aiꞌ tanah untuꞌ nyalamatatn urakng badosa,” man kaꞌ antara ia kaꞌ koa, akulah nang paling badosa. 16 Tapi justru gara-gara nang koa lah aku dikasihatniꞌ, urakng nang miah badosa. Karistus Yesus neleꞌatn samua kasabaran-Nya kaꞌ aku biar aku jaji contoꞌ untuꞌ urakng-urakng nang maoꞌ pucayaꞌ kaꞌ Ia man namu idup nang salamanya. 17 Jadi, injeꞌlah diriꞌ hormat man muliaatn Allah sampe salama-lamanya! Ialah Raja nang marentah salama-lamanya, nang inaꞌ baya diteleꞌ man inaꞌ kalaꞌaꞌ binasa. Ialah sekoꞌ-sekoꞌnya Allah! Amin.
Tugas Timotius
1:18-20
18 Tugas nian kubareꞌatn kaꞌ kao, Timotius anakku, ngingat ahe nang dah dinubuatatn tentang diriꞌnyu, sanapeꞌ mulaiꞌ palayanannyu. Kao arus magunaan nubuat koa untuꞌ nguatatn diriꞌnyu, bajuanglah nang baik man iman man ati nang baraseh. 19 Basangahe urakng dah baiꞌ nangngar kata atinya nang baraseh koa, sampe ia kaꞌ koa inaꞌ pucayaꞌ agiꞌ kaꞌ Tuhan Yesus. 20 Kaꞌ antara nya koa, Himeneus man Aleksander. Kaduanya dah kunyarahatn kaꞌ Ibalis,c biar ia kaꞌ koa jaraꞌ ngina Allah.