Karistus mulakng idup dari kamatiatn
15:1-11
15
Tapi ampeatn, Page waris samadiꞌatn, aku maoꞌ ngingatiꞌ kitaꞌ agiꞌ tentang Kabar Baik mpat kaꞌ Allah nang deꞌe dah ku ngesahatn kaꞌ kitaꞌ. Kabar koalah nang dah kitaꞌ narimaꞌ, nang sampe ampeatn masih kitaꞌ nyingiꞌiꞌ. 2 Kadeꞌ kitaꞌ nyingiꞌiꞌ kuat-kuat kaꞌ ahe nang ku ngesahatn koa, Kabar Baik koa nyalamatatn kitaꞌ. Tapi kadeꞌ kitaꞌ inaꞌ pucayaꞌ kaꞌ sigana Kabar Baik koa, kususnya kaꞌ kamatiatn man Karistus mulakng idup toaꞌ-toaꞌlah kitaꞌ pucayaꞌ! 3 Kabar Baik koa ugaꞌ nang dah kunarimaꞌ sanapeꞌnya. Kabar Baik koalah nang dah kunyampeatn kaꞌ kitaꞌ. Kabar koa sidi panting, tagal Karistus dah mati nanggong dosa-dosa diriꞌ, lea nang taconteng kaꞌ dalapm Kitap Suci.a 4 Kadeꞌ Ia dinyubur, tapi dingidupatn agiꞌ kaꞌ ari nang katalu, koa ugaꞌ taconteng kaꞌ dalapm Kitap Suci,b 5 lalu Karistus nang dingidupatn agiꞌ koa nojokatn ugaꞌ diriꞌ-Nya kaꞌ Kepas (Kepas sama man Petrus ratinya batu), man kaꞌ kadua balas murit-Nya.c 6 Lakaꞌ koa Ia nojokatn diriꞌ-Nya ugaꞌ kaꞌ lima ratus labih pangikut-Nya sakaligus. Kamanyakatn dari urakng-urakng koa masih idup ampeatn, kahe sangahe urakng ihan nang dah mati. 7 Lakaꞌ koa Karistus nojokatn diriꞌ-Nya ugaꞌ kaꞌ Yakobus man kaꞌ samua rasul. 8 Pangabisatn sidi Ia nojokatn diriꞌ-Nya kaꞌ aku ugaꞌ, aku nang lea kamudaꞌ enek nang dimaranakatn sanapeꞌ arinya!d 9 Koalah tagalnya aku nganggap diriꞌ ku rasul Tuhan nang paling hina. Aku inaꞌ patut di sabut rasul, barang aku dah nganiaya jamaat Allah.e 10 Tapi tagal kabaikatn ati Allah, aku jaji lea keadaan ku nang ampeatn nian. Kabaikatn ati nang Nya mareꞌatn kaꞌ aku inaꞌ toaꞌ-toaꞌ. Lalu aku bakaraja paluh memeh daripada rasul nang lainnya. (Tapi bukeꞌ aku nang bakaraja, kabaikatn ati Allah ihan nang nyarataiꞌ aku.) 11 Jaji, inaꞌlah panting ahe keꞌ aku ato rasul-rasul nang lain, nang nyampeatn pasatn mpat kaꞌ Allah kaꞌ kitaꞌ. Kami samuanya nyampeatn Kabar Baik nang sama, man nianlah nang kitaꞌ mucayaꞌiꞌ.Sigana talino nang soteꞌ man Karistus diidupatnnaꞌ agiꞌ dari kamatiatn
15:12-34
12 Kami ngesahatn kadeꞌ Karistus dah mulakng idup agiꞌ dari kamatiatn. Jaji, ngahe ada kaꞌ antara kitaꞌ nang bakata kadeꞌ urakng mati inaꞌ mulakngngaꞌ idup agiꞌ dari kamatiatn? 13 Kadeꞌ banar urakng mati inaꞌ mulakngngaꞌ idup agiꞌ, koa ratinya Karistus ugaꞌ inaꞌ mulakng idup agiꞌ dari kamatiatn. 14 Man kadeꞌ Karistus inaꞌ mulakng idup dari kamatiatn, jaji toaꞌ-toaꞌ kami ngesahatn Kabar Baik koa man toaꞌ-toaꞌ kapucayaꞌatn kitaꞌ. 15 Kadeꞌ ingkaꞌ banar urakng mati inaꞌ mulakng idup dari kamatiatn, barati Karistus inaꞌ kalaꞌ di Allah idupatn dari kamatiatn. Sidi batol kami saksi pangalok tentang Allah. Barang salamaꞌ nian kami ngesahatn kadeꞌ Allah ngidupatn Karistus agiꞌ dari kamatiatn. 16 Kadeꞌ banar urakng mati inaꞌ mulakng idup agiꞌ, jaji Karistus inaꞌ mulakng idup agiꞌ dari kamatiatn. 17 Kadeꞌ Karistus inaꞌ mulakng idup agiꞌ dari kamatiatn jaji kapucayaꞌatn kitaꞌ sidi toaꞌ-toaꞌ; koa ratinya kitaꞌ masih idup kaꞌ dalapm dosa. 18 Kadeꞌ lea koa urakng-urakng nang dah pucayaꞌ kaꞌ Karistus kadeꞌ mati inaꞌ ada harapan. 19 Kadeꞌ diriꞌ baarap kaꞌ Karistus kahe untuꞌ kaidupatn kaꞌ dunia nian ihan, diriꞌ urakng-urakng nang paling pantas dikasihatniꞌ dari sigana talino.
20 Tapi Karistus banar-banar dah mulakng idup agiꞌ dari kamatiatn. Nianlah jaminan kadeꞌ urakng-urakng nang dah mati mulakngngaꞌ idup agiꞌ. 21 Tagal kamatiatn jaji lewat saurakng talino, lea koa ugaꞌ mulakng idup dari kamatiatn jaji lewat saurakng talino. 22 Tagal jujuhatn Adam, sigana talino ngalamiꞌ kamatiatn. Tapi sigana talino nang soteꞌ man Karistus diidupatnnaꞌ agiꞌ dari kamatiatn. 23 Tapi tiap-tiap talino diidupatnnaꞌ dari kamatiatn nurut gilirannya; pamulaꞌatn Karistus; lalu urakng-urakng nang di Karistus ngampuꞌ diidupatnnaꞌ kaꞌ waꞌtu Karistus mulakng agiꞌ kaꞌ dunia. 24 Lakaꞌ koa jajilah kiamat. Kaꞌ waꞌtu koa Karistus ngalahatnnaꞌ samua pamarentahan, samua kakuasaan man samua kakuatan; lalu Ia nyarahatnnaꞌ kakuasaan-Nya jaji Raja, kaꞌ Allah, Apaꞌ diriꞌ. 25 Karistus arus tarus marentah sampe Allah manjawat sigana munsuh Karistus tunduk kaꞌ Karistus.f 26 Munsuh nang pangabisatn nang diancuratnnaꞌ ialah kamatiatn. 27 Kaꞌ dalapm Kitap Suci taconteng lea nian, “Allah manjawat sigananya tunduk kaꞌ Ia.” Jelaslah kadeꞌ nang di maksut man sigana nya inaꞌ termasuk man Allah babaro, nang manjawat sigananya koa tunduk kaꞌ Karistus.g 28 Waꞌtu Allah manjawat sigananya tunduk kaꞌ Anak-Nya, Ia Anak-Nya koa nampatatnnaꞌ diriꞌ-Nya kaꞌ babah parentah Allah, nang dah manjawat samuanya tunduk kaꞌ Ia. Jaji man hal koa Allah banar-banar marentahaꞌ sigananya. 29 Kadeꞌ urakng mati inaꞌ mulakng idup agiꞌ dari kamatiatn, ngahe ada urakng nang dimaptis untuꞌ urakng mati? Kadeꞌ memang urakng mati sama sakali inaꞌ diidupatnaꞌ agiꞌ dari kamatiatn, ngahe ia kaꞌ koa manjawat hal koa? 30 Man untuꞌ ahe ugaꞌ kami maoꞌ ngadapiꞌ bahaya tiap waꞌtu? 31 Page waris samadiꞌatn, tiap ari aku tahan singsara sampe amper mati. Tagal aku bangga kaꞌ kaidupatn kitaꞌ barang kitaꞌ dah pucayaꞌ kaꞌ Karistus Yesus, Tuhan diriꞌ. 32 Kadeꞌ kahe nurut pikiran talino ihan aku dah bajuang ngalawan laok ganas kaꞌ Epesus, ahe gunanya hal koa untuꞌ ku? Kadeꞌ ada urakng mati nang inaꞌ mulakng idup, jaji ‘Injeꞌlah diriꞌ makatn man nyocok, barang ampagi diriꞌ mati.’h 33 Ame kitaꞌ sasat; ayukng nang jahat ngarusak kabiasaan nang baik. 34 Batol-batollah sadar ampeatn, man ame agiꞌ babuat dosa! Tagal kaꞌ antara kitaꞌ ada nang inaꞌ kanal kaꞌ Allah, hal nian ku madahatn kaꞌ kitaꞌ biar kitaꞌ marasa tabeꞌ.
Tubuh talino takaꞌ mulakng idup dari kamatiatn
15:35-58
35 Mungkin ada nang batanyaꞌ, “Leamae keꞌ urakng mati mulakng idup agiꞌ? Tubuh nang leamae keꞌ nang dimareꞌatn kaꞌ ia kaꞌ koa, takaꞌ ia kaꞌ koa mulakng idup agiꞌ?” 36 Sidi baga! Kadeꞌ kitaꞌ nanam banih kaꞌ tanah, banih koa inaꞌ tumuhaꞌ, kadeꞌ banih koa napeꞌ mati doloꞌ. 37 Man takaꞌ kitaꞌ nanam, nang kitaꞌ tanam bukeꞌ saluruh model tanaman koa, tapi begeꞌnya ihan, contonya begeꞌ gandum ato begeꞌ-begeꞌ tanaman lainnya. 38 Allah babaro nang mareꞌaꞌ sikap sasuai man ahe nang di-Nya maoꞌiꞌ. Untuꞌ tiap macam begeꞌ, Allah dah nyiapatn modelnya masing-masing. 39 Inaꞌ samua insiꞌ sama: insiꞌ talino lain dari insiꞌ laok, lain dari insiꞌ burukng lain dari insiꞌ ikatn. 40 Ada bamodel-model barang kaꞌ langit man kaꞌ aiꞌ tanah nang ngampuꞌ kaedoꞌatnnya masing-masing man babeda-beda. 41 Kaedoꞌatn mataari lain dari kaedoꞌatn bulatn, man kaedoꞌatn bulatn lain dari pada kaedoꞌatn bintakng-bintakng, man kaedoꞌatn bintakng nang soteꞌ beda man bintakng nang lain. 42 Lea koa halnya naꞌe man urakng-urakng mati nang mulakng idup agiꞌ. Tubuh nang dinyubur koa tubuh nang baya buruk, tapi tubuh nang diidupatn agiꞌ, tubuh nang inaꞌ baya buruk. 43 Kaꞌ waꞌtu tubuh koa dinyubur, tubuh koa buruk man lamah; tapi kaꞌ waꞌtu ia mulakng idup agiꞌ, ia tubuh nang edoꞌ man kuat. 44 Kaꞌ waꞌtu dinyubur, tubuh koa tubuh jasmani; tapi takaꞌ ia mulakng idup agiꞌ, jaji tubuh rohani. Kadeꞌ ada tubuh jasmani, tantunya ada tubuh rohani. 45 Kaꞌ dalapm Kitap Suci ada taconteng lea nian, “Talino nang pamulaꞌatn, Adam, jaji talino nang idup,”j tapi Adam nang pangabisatni Roh nang mareꞌ kaidupatn. 46 Nang atakng labih doloꞌ nang jasmani, bukeꞌ nang rohani. Nang rohani atakng naꞌenya. 47 Talino nang pamulaꞌatn dinampaꞌ dari dabu tanah, tapi Talino nang kadua mpat dari saruga. 48 Urakng-urakng kaꞌ aiꞌ tanah nian lea talino nang pamulaꞌatn, nang dinampaꞌ dari tanah, tapi urakng-urakng saruga lea Ia nang atakng mpat kaꞌ saruga. 49 Lea diriꞌ ampeatn talino nang dinampaꞌ dari tanah, jaji lea koa ugaꞌ naꞌe diriꞌ jajiaꞌ lea Ia nang kaꞌ saruga.
50 Page waris samadiꞌatn, nianlah nang maoꞌ ku kataatn, insiꞌ man darah diriꞌ inaꞌ namu agiatn kaꞌ dalapm Karajaan Allah. Barang nang baya mati nian, inaꞌ baya namu bagiatn dari nang inaꞌ baya mati. 51 Aku maoꞌ madahatn kaꞌ kitaꞌ hal-hal nang di Allah nosokatn dari talino; diriꞌ inaꞌ samuanya matiaꞌ, tapi diriꞌ samuanya diubahaꞌ. 52 Hal koa jajiaꞌ tiba-tiba sakajap mata, waꞌtu tarompet dibunyian untuꞌ nang pangabisatnnya. Kaꞌ waꞌtu bunyi tarompet koa kadangngaratn, urakng-urakng mati diidupatnnaꞌ agiꞌ man tubuh nang inaꞌ baya mati, man diriꞌ samuanya diubahaꞌ.k 53 Tubuh diriꞌ nang baya buruk nian arus diganti man tubuh nang inaꞌ baya buruk, man tubuh nang baya mati arus diganti man tubuh nang inaꞌ baya mati 54 Kadeꞌ tubuh nang baya buruk dah diganti man tubuh nang inaꞌ baya buruk, man tubuh nang baya mati dah diganti man tubuh nang inaꞌ baya mati, kaꞌ waꞌtu koa baruꞌlah tajaji ahe nang taconteng kaꞌ dalapm Kitap Suci,
“Kamatiatn dah dikamanangngan ngancuratn.l
55 O kamatiatn, kao dah kalah!
O kamatiatn, racutnyu dah ilang!”m
56 Racutn kamatiatn koalah dosa man koasa dosa ukum Torat. 57 Tapi diriꞌ batarimaꞌ kasih kaꞌ Allah, Ia mareꞌ diriꞌ kamanangan lewat Yesus Karistus Tuhan diriꞌ! 58 Tagal koa, Page samadiꞌatn nang kungasihiꞌ, aruslah kitaꞌ kuat man inaꞌ lamah. Bakarajalah tarus sidi-sidi untuꞌ Tuhan, barang kitaꞌ nauꞌan kadeꞌ samua nang dikitaꞌ ngarajaatn untuꞌ Tuhan, inaꞌ toaꞌ-toaꞌ.