Kasih
13:1-13
13
Sakalipun aku baya ngomong man samua bahasa talino, man bahasa malaekat, tapi kadeꞌ aku inaꞌ ngampuꞌ kasih, omonganku koa kahe bunyi agukng man dau nang kahe babunyi inaꞌ ada ratinya. 2 Sakalipun aku baya nyampeatn pasatn mpat kaꞌ Allah, man ngarati hal-hal nang di Allah nosokatn dari talino, nauꞌan sigana hal man ugaꞌ sidi miah pucayaꞌ kaꞌ Allah sampe-sampe baya mindahatn panamukng, tapi kadeꞌ aku inaꞌ ngampuꞌ kasih, aku inaꞌ ada ratinya!a 3 Man sakalipun samua nang ku ngampuꞌ, ku bareꞌatn kaꞌ urakng nang kodo, man aku nyarahatn tubuhku untuꞌ ditunu, tapi kadeꞌ aku inaꞌ ngampuꞌ kasih, samuanya koa sama sakali inaꞌ baguna untuꞌ ku.4 Kasih koa sabar, kasih koa baik ati, inaꞌ panimuru, inaꞌ balagaꞌ, man inaꞌ sombong. 5 Kasih koa inaꞌ manjawat hal-hal nang matabeꞌiꞌ man ngagoꞌ kabaikatn babaro, inaꞌ capat bera, man inaꞌ ngingat kasalahatn urakng lain kaꞌ diriꞌnya. 6 Kasih koa inaꞌ repo kaꞌ urakng nang manjawat nang inaꞌ banar, ia turut repo kaꞌ urakng nang manjawat kabanaran. 7 Kasih koa inaꞌ kanal nyarah ngadapiꞌ sigana hal, tatap pucayaꞌ kaꞌ Allah, tatap baarap kaꞌ Allah dalapm sigana hal, tatap sabar nanggong sigana hal.
8 Kasih inaꞌ bakatampusatn, kapanean rohani untuꞌ nyampeatn pasatn Allah abisaꞌ, bahasa-bahasa nang ajaip barantiaꞌ, sigana hal nang ditauꞌatn lanyapaꞌ. 9 Barang, kapanean rohani untuꞌ nyampeatn pasatn Allah man sigana hal nang diriꞌ tauꞌatn inaꞌ langkap. 10 Naꞌe namusaꞌ waꞌtunya Allah manjawat sigananya jaji langkap, man nang inaꞌ langkap lanyapaꞌ. 11 Takaꞌ aku giꞌ enek, aku ngomong leamae kamudaꞌ enek, aku marasa lea kamudaꞌ enek, aku bapikir lea kamudaꞌ enek. Ampeatn aku dah ayaꞌ, aku ninggalatn sipat ku nang giꞌ enek koa. 12 Tagal ampeatn diriꞌ neleꞌ kaꞌ caramin bendong nang inaꞌ jelas kateleꞌatn, tapi naꞌe diriꞌ neleꞌaꞌ langsung man jelas. Ampeatn aku napeꞌ nauꞌan samuanya tentang Allah, tapi naꞌe aku nauꞌanaꞌ samuanya lea Allah nauꞌan samuanya tentang diriꞌ ku.
13 Jaji, ampeatn ada talu hal nang arus tatap di diriꞌ panjawat: Pucayaꞌ, baarap, man kasih. Nang paling panting dari katalunya koa kasih.