11
Contolah aku, lea aku nyontoh Karistus.aTentang make tutup kapala waꞌtu baibadah
11:2-16
2 Aku muji kitaꞌ barang kitaꞌ gia ingat kaꞌ aku man nurutiꞌ ajaran nang ku ngajaratn kaꞌ kitaꞌ. 3 Tapi aku maoꞌ kitaꞌ nauꞌan soteꞌ hal agiꞌ, yakoa kadeꞌ nang jaji Kapala untuꞌ tiap-tiap nanglaki koa Karistus; nang jaji kapala untuꞌ nangbini koa nanglaki, man nang jaji Kapala untuꞌ Karistus koa Allah. 4 Kadeꞌ nanglaki badoꞌa ato kaꞌ waꞌtu nyampeatn pasatn mpat kaꞌ Allah kaꞌ adapatn urakng rami make tutup kapala, ia inaꞌ hormat kaꞌ Karistus. 5 Tapi kadeꞌ nangbini kaꞌ waꞌtu badoꞌa ato nyampeatn pasatn mpat kaꞌ Allah kaꞌ adapatn urakng rami, inaꞌ batutup kapala, nangbini koa inaꞌ hormat kaꞌ lakinya nang jaji kapala untuꞌ diriꞌnya. Koa sama ugaꞌ saolah-olah kapala nangbini koa dah baboloꞌ. 6 Barang kadeꞌ nangbini baiꞌ make tutup kapala labih baik buꞌuknya digunting. Tapi kadeꞌ nangbini di moloꞌ kapalanya ato di ngunting buꞌuknya, jaji hal koa matabeꞌiꞌ diriꞌnya babaro. Tagal koa labih baik ia make panutup kapala. 7 Nanglaki inaꞌ palalu make panutup kapala, barang ia mancaratn saho sipat man kamuliaatn Allah. Tapi nangbini mancaratn saho kamuliaatn nanglaki.b 8 Tagal nanglaki inaꞌ dinampaꞌ dari nangbini, tapi nangbinilah nang dinampaꞌ dari nanglaki. 9 Nanglaki inaꞌ dinampaꞌ untuꞌ nangbini, tapi nangbini dinampaꞌ untuꞌ nanglaki. 10 Tagal nangbini mancaratn saho kamuliaatn nanglaki, nangbini arus make panutup kapala, tagal malaekat-malaekat.c 11 Kahepun mpa koa kaꞌ dalapm kaidupatn diriꞌ urakng pucayaꞌ kaꞌ Tuhan, inaꞌ ada nangbini kadeꞌ inaꞌ ada nanglaki man inaꞌ ada nanglaki kadeꞌ inaꞌ ada nangbini. 12 Tagal nangbini dinampaꞌ dari nanglaki, lakaꞌ koa nanglaki di nangbini maranakatn; tapi baik nanglaki maoꞌpun nangbini man sigana hal mpat kaꞌ Allah.
13 Coba kitaꞌ babaro mutusatn hal nian: Ahe keꞌ baik nangbini badoꞌa kaꞌ Allah kaꞌ dalapm ibadah jamaat inaꞌ make panutup kapala? 14 Kadeꞌ nurut budaya kitaꞌ, nanglaki inaꞌ dihormatiꞌ kadeꞌ babuuk panyakng. 15 Tapi untuꞌ nangbini, buuk panyakng dimareꞌatn kaꞌ ia untuꞌ nutupiꞌ kapalanya man buuk panyakng koa kahormatannya.
16 Tapi kadeꞌ ada nang maoꞌ batangkar tentang hal-hal kaꞌ atas tadi, kami man jamaat-jamaat Allah inaꞌ ngampuꞌ kabiasaan nang lea koa.
Kabiasaan-kabiasaan nang salah dalapm perjamuan Tuhan
11:17-34
17 Kaꞌ dalapm paraturan-paraturan salanjutnya, aku inaꞌ baya muji kitaꞌ, barang takaꞌ kitaꞌ bakomoꞌ kaꞌ dalapm ibadah kitaꞌ inaꞌ ngatangan kabaikatn, tapi ngatangan hal nang inaꞌ baik. 18 Pamulaꞌatnnya ku nangngar, kadeꞌ waꞌtu kitaꞌ bakomoꞌ untuꞌ ibadah jamaat ada golongan-golongan nang kajah batantangan. Man hal koa sabebet manyak aku pucayaꞌ kabar koa. 19 Ingkaꞌ dah sawajarnya timul perpecahan kaꞌ antara kitaꞌ, biar kateleꞌanan naꞌe sae urakng-urakng nang batol-batol pucayaꞌ kaꞌ Tuhan. 20 Tapi kaꞌ waꞌtu kitaꞌ bakomoꞌ, nang kitaꞌ panjawat bukeꞌ untuꞌ makatn Perjamuan Tuhan. 21 Barang kaꞌ waꞌtu makatn, kitaꞌ babaro naap makanan babaro-babaro, sampe ada nang inaꞌ namu, lalu nang lain jaji bakamabukatn. 22 Ngahe lea koa? Inaꞌ keꞌ kitaꞌ ada barumah untuꞌ kitaꞌ baya makatn man nyocok di koa? Ato kitaꞌ maoꞌ ngina jamaat Allah man matabeꞌiꞌ urakng-urakng kodo? Ahe nang arus ku omongkatn man kitaꞌ? Arus keꞌ aku muji kitaꞌ? Inaꞌ boh! Dalapm hal nian inaꞌ ihanya aku mujiaꞌ kitaꞌ.
23 Barang nang ku ngajaratn kaꞌ kitaꞌ koa, ku narimaꞌ mpat kaꞌ Tuhan babaro: Kaꞌ malam koa takaꞌ Yesus, Tuhan diriꞌ disarahatnnaꞌ, sanapeꞌnya koa Ia naap roti, 24 Ia batarimaꞌ kasih kaꞌ Allah untuꞌ roti koa, ia macah-macah roti koa man kokot-Nya, lalu bakata, “Nianlah tubuh-Ku nang dinyarahatn untuꞌ kasalamatan kitaꞌ. Panjawatlah nian untuꞌ nganang Aku.” 25 Lea koa ugaꞌ lakaꞌ makatn, Ia naap cawan aiꞌ anggur koa lalu bakata, “Aiꞌ anggur nian perjanjian man Allah nang baharu, dinatapatn man darah-Ku. Tiap kali kitaꞌ nyocok nian, panjawatlah untuꞌ nganang Aku.”d 26 Biar tiap kali kitaꞌ makatn roti man nyocok aiꞌ anggur nian, kitaꞌ ngesahatn kamatiatn Tuhan, sampe Ia mulakng agiꞌ kaꞌ aiꞌ tanah nian. 27 Tagal koa, urakng nang makatn roti Tuhan ato nyocok aiꞌ anggur Tuhan man cara nang inaꞌ pantas, urakng koa badosa kaꞌ tubuh man darah Tuhan. 28 Jaji, tiap urakng arus sadar kaꞌ diriꞌnya babaro doloꞌ, baruꞌ ia mulih makatn roti man nyocok aiꞌ anggur koa. 29 Barang sae makatn man nyocok nang inaꞌ ngakoꞌiꞌ tubuh Tuhan, ia ngatangan ukuman kaꞌ diriꞌnya. 30 Koalah tagalnya manyak kaꞌ antara kitaꞌ nang sakit man lamah, man ada ugaꞌ nang mati. 31 Kadeꞌ kitaꞌ sadar kaꞌ diriꞌ kitaꞌ babaro, ukuman inaꞌ nimpaꞌaꞌ kitaꞌ. 32 Tapi kadeꞌ kitaꞌ narimaꞌ ukuman dari Tuhan, sabatolnya kitaꞌ dididik, biar kaꞌ pangabisatn dunia naꞌe kitaꞌ inaꞌ kana ukum sama-sama man urakng-urakng dari dunia nian.