Israel jaji paringatan
10:1–11:1
10
Sodara-sodara! Aku maoꞌ ngingatiꞌ kitaꞌ kaꞌ ahe nang tajaji kaꞌ eneꞌ uyut diriꞌ takaꞌ ia kaꞌ koa nunaꞌan Musa kaluar dari nagari Mesir. Ia kaꞌ koa kana linukngiꞌ rahuꞌ, man salamat nyabarangiꞌ Laut Merah.a 2 Jaji ia kaꞌ koa samuanya dimaptis kaꞌ dalapm rahuꞌ man kaꞌ dalapm laut untuꞌ jaji pangikut-pangikut Musa. 3 Ia kaꞌ koa samuanya makatn makanan rohani nang sama,b 4 man nyocok cocokatn rohani nang sama nang di Allah mareꞌ man koasa-Nya. Tagal ia kaꞌ koa samuanya nyocok dari panamukng batu rohani nang nyarataiꞌ ia kaꞌ koa; panamukng batu koalah Karistus babaro.c 5 Kahepun mpa koa, Allah inaꞌ sanang kaꞌ kamanyakatn eneꞌ uyut diri, tagal koa ia kaꞌ koa dimunuh kaꞌ abut nang bapaser luas man babatu-batu.d6 Samunya koa jaji conto untuꞌ diriꞌ, untuꞌ jaji paringatan biar kitaꞌ ame maoꞌiꞌ hal-hal nang jahat lea eneꞌ uyut diriꞌ.e 7 Man ugaꞌ biar kitaꞌ ame nyambah pantak-pantak lea nang di sabagian nya kaꞌ koa panjawat. Kaꞌ dalapm Kitap Suci taconteng, “Jaji duduklah bangsa koa makatn nyocok, man karepoatn lea laok.”f 8 Diriꞌ inaꞌ mulih manjawat sigana macam dosa (pikiran, pakataatn, man ahe nang dipanjawat) nang baubungan man kamaluatn talino lea nang di sabagian nya kaꞌ koa panjawat. Barang dalapm saari ihan sampe dua puluh talu ribu urakng dari nya kaꞌ koa mati tagal babuat lea koa.g 9 Diriꞌ inaꞌ mulih nyobaiꞌ Karistus, lea nang di sabagian eneꞌ moyang diriꞌ panjawat deꞌe, sampe-sampe ia kaꞌ koa mati di ular matok.h 10 Diriꞌ ugaꞌ inaꞌ mulih bagarungut lea nang di sabagian nya kaꞌ koa deꞌe panjawat, sampe-sampe Allah nyuruh malaekat kamatiatn munuh ia kaꞌ koa.i
11 Samua hal koa tajaji kaꞌ eneꞌ uyut diriꞌ jaji conto untuꞌ diriꞌ. Man samuanya koa taconteng ugaꞌ jaji paringatan untuꞌ diriꞌ. Barang ampeatn diriꞌ idup nyalatniꞌ jaman pangabisatn. 12 Urakng nang nyangka diriꞌnya badiri tagap, aruslah ati-ati, ame sampe ia jantuꞌ kaꞌ dalapm dosa. 13 Tiap cobaan nang kitaꞌ alamiꞌ cobaan nang biasa di talino alamiꞌ. Allah koa satia, Ia inaꞌ miaratnnaꞌ kitaꞌ di cobai man pencobaan nang ngalabihiꞌ kamampuan kitaꞌ. Tapi takaꞌ kitaꞌ dicobaiꞌ, Allah mareꞌaꞌ maraga biar kitaꞌ mampu batahan.
14 Tagal koa, Sodara-sodara kitaꞌ nang sidi ku kasihiꞌ, aruslah kitaꞌ jauhiꞌ untuꞌ nyambah kaꞌ pantak-pantak! 15 Aku bakata kaꞌ kitaꞌ lea urakng-urakng nang pane. Jaji kitaꞌlah babaro nang mutusatn ahe keꞌ pakataatnku nian banar ato salah. 16 Waꞌtu diriꞌ nyocok aiꞌ anggur sambil batarimaꞌ kasih kaꞌ Allah, inaꞌ keꞌ koan nojokatn kadeꞌ diriꞌ soteꞌ man Karistus kaꞌ dalapm darah-Nya? Man kaꞌ waꞌtu diriꞌ magi-magiatn roti untuꞌ dimakatn sama-sama, inaꞌ keꞌ koa nojokatn kadeꞌ diriꞌ soteꞌ kaꞌ dalapm tubuh Karistus?j 17 Barang roti koa soteꞌ ihan. Diriꞌ memang rami tapi diriꞌ soteꞌ tubuh. Barang diriꞌ samua namu bagiatn dari soteꞌ roti.
18 Paratiatniꞌlah bangsa Israel. Waꞌtu ia kaꞌ koa makatn makanan nang dimaremahan, ia kaꞌ koa dah namu bagiatn takaꞌ ia kaꞌ koa magi-magiatn makanan nang dah dimaremahan kaꞌ atas mesbah.k 19 Ahe maksut ku man hal koa? Pantak-pantak ato pun pamakanan nang dimaremahan kaꞌ pantak-pantak koa sama sakali inaꞌ ada ratinya. 20 Korban nang dinyambaleh diurakng-urakng nang inaꞌ kanal kaꞌ Allah untuꞌ pantak-pantak koa inaꞌ diparemahan kaꞌ Allah, tapi kaꞌ roh-roh jahat. Man aku baiꞌ kitaꞌ namu bagiatn dari roh jahat koa.l
21 Kitaꞌ inaꞌ baya nyocok dari cawan anggur Tuhan, man dari cawan anggur roh-roh jahat ugaꞌ. Kitaꞌ inaꞌ baya makatn kaꞌ meja Tuhan, man kaꞌ meja roh-roh jahat ugaꞌ. 22 Ato ahe keꞌ diriꞌ maoꞌ manjawat Tuhan timuru? Ahe keꞌ diriꞌ labih kuat dari Tuhan?m
23 Urakng-urakng bakata, ‘Bagi diriꞌ sigana ahe jaꞌ mulih dipanjawat.’ Tapi aku bakata, inaꞌ samuanya baguna. Biarpun sigana ahe jaꞌ mulih dipanjawat tapi inaꞌ samuanya nguatatn kapucayaꞌatn diriꞌ.n 24 Ame saurakngpun barusaha untuꞌ kabaikatnnya babaro ihan. Tiap urakng arus barusaha untuꞌ kabaikatn urakng lain ugaꞌ.
25 Kitaꞌ mulih makatn ahe jaꞌ nang dinyual kaꞌ pasar dageng. Inaꞌ palalu batanyaꞌ dari mae asalnya, kahe tagal ati nurani kitaꞌ marasa kabaratan makatn dageng nang lea koa. 26 Barang kaꞌ dalapm Kitap Suci ada taconteng, ‘Dunia nian man sigana isiꞌnya di Tuhan ngampuꞌ.’o
27 Kadeꞌ kitaꞌ diundang di urakng nang bukeꞌ urakng pucayaꞌ, man kitaꞌ narimaꞌ undangan koa, makatn jaꞌ ahe nang dingidaratn kaꞌ kitaꞌ. Inaꞌ palalu batanyaꞌ dari mae asalnya makanan koa, kahe tagal ati nurani kitaꞌ marasa kabaratan kaꞌ ahe nang dikitaꞌ makatn koa. 28 Tapi kadeꞌ ada nang bakata, ‘Makanan nian dah di maremahan kaꞌ pantak-pantak.’ Ame makatniꞌ makanan-makanan koa. Kitaꞌ manjawatnya koa untuꞌ kabaikatn urakng koa, man tagal kabaratan ati nurani. 29 Maksutku bukeꞌ ati nurani kitaꞌ, tapi ati nurani urakng koa. Mungkin ada nang batanyaꞌ, ‘Ngahe kabebasatn ku dinilai di ati nurani urakng lain? 30 Kadeꞌ aku makatn makanan man batarimaꞌ kasih kaꞌ Allah, ngahe urakng lain ngina aku takaꞌ aku makatn makanan koa, padahal aku dah batarimaꞌ kasih kaꞌ Allah?’ 31 Tagal koa, ahe pun nang kitaꞌ makatn, ato nyocok, ato pun manjawat hal nang lain, panjawatlah samuanya koa untuꞌ muji Allah. 32 Jaji amelah manjawat hal nang nyajiatn urakng lain badosa kaꞌ adapatn Tuhan, baik untuꞌ urakng Yahudi maoꞌpun bukeꞌ urakng Yahudi, maoꞌpun sodara sakapucayaꞌatn dalapm jamaat Allah. 33 Aku ugaꞌ manjawat hal nang sama. Aku barusaha ngarepoatn ati samua urakng kaꞌ dalapm samua hal, bukeꞌ ngagoꞌ kabaikatn babaro. Tujuanku biar rami urakng di salamatatn.