Tentang paremahan kaꞌ pantak-pantak
8:1-13
8
Ampeatn tentang makanan nang di paremahan kaꞌ pantak-pantak. Ingkaꞌ banar lea kata urakng, “Kitaꞌ koa samuanya dah nauꞌan manyak hal.” Tapi hal-hal koa manjawat urakng jaji sombong, tapi kasih nguatatn urakng. 2 Urakng nang nyangka kadeꞌ ia nauꞌan manyak hal, sabatolnya nauꞌan manyak hal koa giꞌ inaꞌ langkap. 3 Tapi urakng nang ngasihiꞌ Allah, Allah nauꞌan urakng koa.4 Tentang hal makatn, makanan nang dah dimaremahan kaꞌ pantak-pantak, diriꞌ nauꞌan kadeꞌ inaꞌ soteꞌ pun pantak-pantak kaꞌ dunia nian nang idup. Man diriꞌ ugaꞌ nauꞌan kadeꞌ Allah koa sekoꞌ, inaꞌ ada nang lain. 5 Urakng-urakng bakata kadeꞌ manyak nang disabut dewa man tuhan, baik nang kaꞌ saruga maoꞌpun nang kaꞌ aiꞌ tanah. 6 Tapi untuꞌ diriꞌ, Allah koa sekoꞌ ihan man Ia ugaꞌ Apaꞌ. Ia nang nampaꞌ sigananya man untuꞌ Ia lah diriꞌ idup. Man Tuhan ugaꞌ kahe sekoꞌ, yakoa Yesus Karistus; lewat Ia sigananya di nampaꞌ, man tagal Ia lah diriꞌ baya idup. 7 Kahepun mpa koa, inaꞌ samua urakng nauꞌan samuanya koa. Ada nang deꞌe biasanya nyambah pantak-pantak. Jaji, sampe ampeatn pun ia kaꞌ koa masih marasa kadeꞌ makanan nang dah dingaremahan kaꞌ pantak-pantak, jaji makanan pantak-pantak. Lalu kadeꞌ ia kaꞌ koa makatn makanan koa, ia kaꞌ koa marasa badosa, tagal ati nurani nya kaꞌ koa napeꞌ kuat. 8 Sabatolnya makanan inaꞌ manjawat hubungan diriꞌ man Allah siaꞌ samak. Kadeꞌ diriꞌ makatn makanan koa, diriꞌ inaꞌ namu kauntungan ahe-ahe. Sabaliknyapun kadeꞌ diriꞌ inaꞌ makatn makanan koa, diriꞌpun inaꞌ rugi ahe-ahe. 9 Tapi jagalah, ame sampe kabebasatn kitaꞌ koa manjawat ia kaꞌ koa nang ati nuraninya napeꞌ kuat, jantuꞌ kaꞌ dalapm dosa. 10 Maksutku lea nian: Seandainya kao nang dah nauꞌan manyak hal, tagah duduk makatn makanan nang dah dimaremahan kaꞌ pantak-pantak. Lalu ada urakng nang ati nuraninya lamah neleꞌ kao duduk makatn di koa. Urakng koa baraniaꞌ makatn makanan nang dah di mareꞌatn kaꞌ pantak-pantak koa. 11 Jaji urakng nang ati nuraninya nang lamah koa ia binasaaꞌ tagal ahe nang dah di kitaꞌ tauꞌatn. Padahal ia koa sodara kitaꞌ nang sakapucayaatn, man Karistus ugaꞌ mati untuꞌ sodara kitaꞌ koa. 12 Kadeꞌ kitaꞌ manjawat dosa lea koa kaꞌ sodara-sodara sakapucayaꞌatn man kitaꞌ, koa ngarusakaꞌ ati nuraninya nang lamah, jaji kitaꞌ badosa kaꞌ Karistus. 13 Jaji, kadeꞌ makanan nang ku makatn koa baya manjawat urakng nang sakapucayaꞌatn man aku jantuꞌ kaꞌ dalapm dosa, aku inaꞌ makatnnaꞌ dageng agiꞌ salama-lamanya, biar inaꞌ manjawat sodara sakapucayaꞌatn man aku jantuꞌ kaꞌ dalapm dosa!