Ame ngincakng pakara sasama sodara sakapucayaꞌatn kaꞌ urakng-urakng nang inaꞌ pucayaꞌ kaꞌ Tuhan
6:1-11
6
Kadeꞌ saurakng kaꞌ antara kitaꞌ basalisih man sodara sakapucayaꞌatnnya, amelah ia mintaꞌ urakng lain nang inaꞌ banar kaꞌ mata Allah untuꞌ ngadiliꞌ pakaranya koa! Tapi ia arus mintaꞌ kaꞌ urakng-urakng pucayaꞌ untuꞌ nyalesaiatn pakaranya koa. 2 Ahe keꞌ kitaꞌ inaꞌ nauꞌan kadeꞌ umat Allah nang ngadiliaꞌ dunia nian? Jaji, kadeꞌ ingkaꞌ kitaꞌ ngadiliaꞌ dunia nian ahe keꞌ kitaꞌ inaꞌ sanggup nyelesaiatn pakara-pakara nang enek? 3 Ahe keꞌ kitaꞌ inaꞌ nauꞌan kadeꞌ diriꞌ ngadiliaꞌ malaekat-malaekat? Labih agiꞌ pakara-pakara kaidupatn ari-ari! 4 Lalu kadeꞌ ada pakara-pakara lea koa, amelah kitaꞌ nyarahatn pakara koa kaꞌ ia kaꞌ koa nang inaꞌ dihormatiꞌ kaꞌ dalapm jamaat. 5 Sidi matabeꞌiꞌ! Tantu kaꞌ antara kitaꞌ pasti ada urakng nang cukup pane untuꞌ nyelesaiatn pakara-pakara kaꞌ antara kitaꞌ sodara sakapucayaꞌatn! 6 Tapi kadeꞌ ada kaꞌ antara kitaꞌ sodara sakapucayaaꞌtn nang tagah basalisih, inaꞌ pantas kitaꞌ mintaꞌ urakng nang bukeꞌ urakng pucayaꞌ untuꞌ ngakimiꞌ pakara kitaꞌ. 7 Sabatolnya adanya pakara-pakara kaꞌ antara kitaꞌ dah nojokatn kakalahatn kitaꞌ. Labih baik kitaꞌ singsara inaꞌ namu kaadilan ato dirugiatn! 8 Dari pada kitaꞌ babaro inaꞌ babuat adil man kitaꞌ babaro ngarugiatn sodara-sodara sakapucayaꞌatn man kitaꞌ. 9 Pasti kitaꞌ nauꞌan kadeꞌ urakng nang inaꞌ banar kaꞌ mata Allah, inaꞌ jaji anggota Karajaan Allah.Ame nipu diriꞌ babaro! Nang ku maksut urakng-urakng nang babuat sigana macam dosa (pikiran, pakataatn, man ahe nang dipanjawat) nang baubungan man kamaluatn talino, urakng-urakng nang nyambah pantak, nang babayaꞌ, nanglaki baubungan nang inaꞌ sanonoh man nanglaki, 10 nang pangalit, nang sarakah, nang pamabuk, nang suka majahat dama urakng lain, man nang parampok, samuanya koa inaꞌ namuaꞌ bagiatn kaꞌ dalapm Karajaan Allah. 11 Kaꞌ antara kitaꞌ deꞌe ada nang babuat lea koa. Tapi ampeatn dah dimarasehatn dari dosa, kitaꞌ dah di Allah ngampuꞌ nang kusus man kitaꞌ dah di Allah manaratn. Tagal, kitaꞌ pucayaꞌ kaꞌ Tuhan Yesus Karistus man tagal koasa Roh Allah diriꞌ.
Pakelah tubuh kitaꞌ untuꞌ menghormatiꞌ Allah
6:12-20
12 Urakng-urakng bakata sigana hal mulih dipanjawat. Tapi bagiku bukeꞌ samuanya baguna. Biarpun sigana ahe jaꞌ mulih dipanjawat tapi aku baiꞌ dikoasai di ahe pun.a 13 Urakng-urakng bakata ugaꞌ, makanan untuꞌ parut man parut untuꞌ makanan. Tapi kadua-duanya di Allah lanyapatnnaꞌ. Tubuh bukeꞌlah untuꞌ babuat sigana macam dosa (pikiran, pakataatn, man ahe nang dipanjawat) nang baubungan man kamaluatn talino, tapi untuꞌ ngalayaniꞌ Tuhan, man Tuhan nang ngampuꞌ tubuh. 14 Allah dah manjawat Tuhan Yesus mulakng idup dari kamatiatn, lea koa ugaꞌ Allah man koasa-Nya ngidupatnnaꞌ diriꞌ dari kamatiatn. 15 Kitaꞌ nauꞌan kadeꞌ tubuh kitaꞌ anggota tubuh Karistus. Jaji, mulih keꞌ aku naap soteꞌ anggota tubuh Karistus lalu nyajiatnnya anggota tubuh saurakng palacur? Tantunya inaꞌ! 16 Ato barangkali kitaꞌ inaꞌ nauꞌan kadeꞌ urakng nang bacampur man palacur, ia jaji soteꞌ man palacur koa! Barang kaꞌ dalapm Kitap Suci ada taconteng, “Kaduanya jaji soteꞌ tubuh.”b 17 Tapi urakng nang jaji soteꞌ man Tuhan, urakng koa jaji soteꞌ roh man Tuhan. 18 Jauhiꞌlah, sigana macam dosa (pikiran, pakataatn, man ahe nang dipanjawat) nang baubungan man kamaluatn talino, barang samua dosa lain nang di talino panjawat tajaji kaꞌ luar tubuh urakng koa. Tapi urakng nang babuat sigana macam dosa (pikiran, pakataatn, man ahe nang dipanjawat) nang baubungan man kamaluatn talino, barati babuat dosa kaꞌ tubuhnya babaro. 19 Kitaꞌ pasti nauꞌan kadeꞌ tubuh kitaꞌ Rumah Roh Kudus nang badiapm kaꞌ dalapm tubuh kitaꞌ. Allah babarolah nang dah mareꞌatn Roh-Nya koa kaꞌ kitaꞌ. Tubuh kitaꞌ bukeꞌlah kitaꞌ babaro nang ngampuꞌnya tapi Allah ngampuꞌnya.c 20 Allah dah mali kitaꞌ man mayarnya lunas. Tagal koa, pakelah tubuh kitaꞌ untuꞌ menghormatiꞌ Allah.