Tuhanlah sekoꞌ-sekoꞌnya akim
4:1-5
4
Anggaplah kami palayan-palayan Karistus, nang batanggong jawap ngesahatn rancana-rancana Allah nang giꞌ napeꞌ di dunia tauꞌatn. 2 Jaji saurakng palayan arus nojokatn kadeꞌ diriꞌnya pantas dipucayaꞌiꞌ. 3 Bagi ku, inaꞌ panting pikiran kitaꞌ ato koasa pangadilan talino kaꞌ aku. Aku pun inaꞌ ngakimiꞌ diriꞌ ku. 4 Aku inaꞌ marasa basalah kaꞌ dalapm ahe pun ugaꞌ, tapi koan bukeꞌ bukti kadeꞌ aku ingkaꞌ inaꞌ basalah. Tuhan babarolah nang nantuatn aku basalah ato inaꞌ. 5 Tagal koa, kadeꞌ napeꞌ waꞌtunya, amelah kitaꞌ ganceh-ganceh nilai kadeꞌ dangan basalah ato inaꞌ. Antiatnlah sampe Tuhan mulakng agiꞌ kaꞌ dunia, Ia nang madahatnnaꞌ samua hal-hal nang inaꞌ ditauꞌatn nang dinyosokatn kaꞌ abut patakng. Ia nang madahatnnaꞌ samua niat nang tapanapm kaꞌ dalapm ati talino. Waꞌtu Tuhan mulakng agiꞌ kaꞌ dunia baruꞌlah tiap urakng narimaꞌ pujian nang patut dinya tarimaꞌ.Ame bangga kaꞌ diriꞌ babaro
4:1-5
6 Jaji ampeatn kamar kapala page waris samadiꞌatn, aku make Apolos man diriꞌku babaro jaji conto untuꞌ kitaꞌ, biar kitaꞌ balajar dari kami arti pakataatn nian, “Ngasiꞌlah kahe kaꞌ ahe nang taconteng kaꞌ dalapm Kitap Suci.” Jaji ame ngina saurakng palayan untuꞌ membanggakan palayan nang lain. 7 Sae nang nganggap kitaꞌ labih dari urakng lain? Agiꞌnya, ahe nang kitaꞌ ngampuꞌ, nang bukeꞌ pamareꞌ dari Allah? Lalu ngahe kitaꞌ jaji sombong saolah-olah kitaꞌ namunya babaro man bukeꞌ tagal pamareꞌ Allah? 8 Ingkaꞌ kitaꞌ inaꞌ malaluatn ahe-ahe agiꞌ! Kitaꞌ dah kaya! Kitaꞌ dah jaji raja! Tapi kami inaꞌ. Sidi baiknya kadeꞌ kitaꞌ banar-banar dah jaji raja, biar kami baya marentah sama-sama man kitaꞌ. 9 Tapi manurut pikiranku, kami rasul-rasul, dah di Allah nyajiatn tontonan kaꞌ adapatn talino man malaekat-malaekat. Kami lea urakng-urakng hina nang dinyantuiꞌ ukuman mati kaꞌ adapatn urakng rami. 10 Kami dianggap bodoh tagal kami pangikut Karistus, tapi kitaꞌ kateleꞌanan lea urakng pucayaꞌ nang pane! Kami lamah, tapi kitaꞌ kuat! Kami dingina, tapi kitaꞌ dihormatiꞌ.
11 Kami singsara tagal kaiparatn, aus, bapakean compaꞌ camping, kaja dimangkong man idup kaꞌ kea kaꞌ naun, 12 kami banting tulakng bagagoꞌ makatn. Kadeꞌ kami dikutuk, kami mintaꞌ Allah marakatiꞌnya, kadeꞌ kami dianiaya, kami sabar, a 13 kadeꞌ urakng majahat kami, kami balas man kata-kata nang manseꞌ. Kami inaꞌ labih dari sampah kaꞌ dunia nian, sampe ampeatn nian kami masih dianggap lea kotoran nang inaꞌ baraga kaꞌ dunia nian.
14 Hal nian ku contengan bukeꞌ untuꞌ matabeꞌiꞌ kitaꞌ, tapi untuꞌ nagur kitaꞌ tagal aku ngasihiꞌ kitaꞌ man ngaggap kitaꞌ anak-anakku. 15 Biarpun kitaꞌ dah ngampuꞌ ribuan guru nang ngajar kitaꞌ tentang Karistus, tapi kitaꞌ inaꞌ ngampuꞌ manyak apaꞌ. Aku nang jaji apaꞌ kitaꞌ, barang aku nang ngincakng Kabar Baik tentang Karistus kaꞌ kitaꞌ. 16 Tagal koa aku sidi bapintaꞌ biar kitaꞌ ngikutiꞌ conto nang dah ku ngajaratn kaꞌ kitaꞌ.b 17 Untuꞌ koa aku dah nyuruh Timotius atakng kaꞌ kitaꞌ. Ia lea anakku babaro nang kungasihiꞌ man nang satia jaji pangikut Karistus. Ia anak nang baya dipucayaꞌiꞌ. Naꞌe ia ngingatiaꞌ kitaꞌ tentang cara idup nang ku ngikutiꞌ lakaꞌ aku pucayaꞌ kaꞌ Karistus, yakoa cara idup nang ku ngajaratn kaꞌ tiap jamaat, kaꞌ maepun ugaꞌ. 18 Ada sangahe urakng nang jaji sombong, barang ia kaꞌ koa nyangka, kadeꞌ aku inaꞌ atakngngaꞌ agiꞌ kaꞌ kitaꞌ. 19 Tapi kadeꞌ Tuhan ngijinan, aku atakngngaꞌ naboꞌ kitaꞌ inaꞌ lama agiꞌ. Waꞌtu koalah aku neleꞌaꞌ, ahe keꞌ ia kaꞌ koa nang ngomong sombong koa ngampuꞌ koasa untuꞌ manjawat hal nang labih dari pakataatnnya kaꞌ koa. 20 Barang bukti Karajaan Allah marentah idup diriꞌ dari ahe nang diriꞌ panjawat, bukeꞌ dari ahe nang di diriꞌ ngataatn. 21 Jaji pilih jaꞌ ahe nang kitaꞌ labih sukaiꞌ! Ahe keꞌ kitaꞌ maoꞌ aku atakng untuꞌ ngajar kitaꞌ karas ato lambut man kasih sayang?