Patangkaratn
3:1-9
3
Kamar kapala page waris samadiꞌatn, sabatolnya aku inaꞌ baya ngomong man kitaꞌ lea urakng nang dewasa rohani. Aku kahe baya ngomong man kitaꞌ lea urakng nang masih idup manurut kamaoꞌan dunia lea urakng nang giꞌ enek man baruꞌ kanal Karistus. 2 Susulah nang kumareꞌatn kaꞌ kitaꞌ bukeꞌ makanan nang karas, barang kitaꞌ giꞌ inaꞌ baya narimaꞌnya.a Man ampeatnpun kitaꞌ napeꞌ ugaꞌ baya narimaꞌnya. b 3 Barang kitaꞌ masih idup manurut kamaoꞌan talino nang jahat, tagal kaꞌ antara kitaꞌ giꞌ ada nang rusiꞌ man patangkaratn. Hal-hal nian nojokatn kadeꞌ kitaꞌ idup manurut kamaoꞌan talino nang jahat, man kalakuan kitaꞌ lea urakng-urakng nang giꞌ inaꞌ pucayaꞌ kaꞌ Tuhan. 4 Jukut ada nang bakata, “Kami panunaꞌ Paulus.” Nang lain bakata, “Aku panunaꞌ Apolos.” Hal koa nojokatn kadeꞌ kitaꞌ bakalakuan lea urakng-urakng nang giꞌ inaꞌ pucayaꞌ kaꞌ Tuhan.c 5 Sabanarnya, Apolos inaꞌ panting. Lea koa ugaꞌ, Pauluspun inaꞌ panting. Kami kahe palayan-palayan Allah, nang dah ngirikng kitaꞌ untuꞌ pucayaꞌ kaꞌ Karistus. Kami kahe nyalanan pakarajaatn nang di Tuhan nugasatn kaꞌ kami masing-masing. 6 Aku nang nanam, Apolos nyiram, tapi Allah babarolah nang manjawat tanaman koa tumuh. d 7 Tagal koa nang panting bukeꞌlah nang nanam ato nang nyiram, tapi Allah lah nang manjawat tanaman koa tumuh. 8 Baik nang nanam maoꞌpun nang nyiram sama; man masing-masing narimaꞌaꞌ upahnya sasuai man pakarajaatnnya. 9 Kami urakng-urakng nang sama-sama bakaraja untuꞌ Allah, man kitaꞌ lea umanya Allah. Kitaꞌpun lea bangunan Allah ugaꞌ.Dasar man bangunan
3:10-23
10 Pas man kabaikatn ati Allah, nang Nya mareꞌatn kaꞌ aku, aku sebagai tukang ahli nang dah ngalakaꞌatn dasar untuꞌ bangunan koa, man urakng lain manjawat bangunan kaꞌ atas dasar koa. Tiap urakng arus maratiatniꞌ baik-baik leamae ia manjawat bangunan kaꞌ atas dasar koa. 11 Barang Allah babaro dah nampatatn Yesus Karistus jaji soteꞌ-soteꞌnya dasar untuꞌ bangunan koa, man inaꞌ saurakngpun nang baya nampatatn dasar nang lain. 12 Intah keꞌnya urakng koa manjawat bangunan koa dari amas, perak ato batu permata, make kayu, rumput karikng atopun aruman, 13 naꞌenya pakarajaatn masing-masing urakng kateleꞌannannaꞌ waꞌtu Karistus atakng ngakimiꞌ. Kaꞌ ari koa, api ngujiaꞌ pakarajaatn tiap urakng untuꞌ muktiatnnaꞌ pakarajaatn urakng koa batahan ato inaꞌ. 14 Kadeꞌ ahe nang di urakng koa madiri kaꞌ atas dasar koa tatap badiri tagap, ia narimaꞌaꞌ upahnya. 15 Tapi kadeꞌ pakarajaatnnya angus, ia narimaꞌaꞌ karugiatn, tapi ia babaro disalamatatnnaꞌ, lea urakng nang dingincakng kaluar dari dalapm api.
16 Inaꞌ keꞌ kitaꞌ nauꞌan, kadeꞌ kitaꞌ Rumah Allah, man kadeꞌ Roh Kudus badiapm kaꞌ dalapm diriꞌ kitaꞌ?e 17 Jaji kadeꞌ ada urakng nang ngarusak Rumah Allah umat-Nya koa, Allah ngarusakaꞌ urakng koa. Barang Rumah Allah koa kudus man Rumah Allah koa kitaꞌ. 18 Amelah ada urakng nang nipu diriꞌnya babaro. Kadeꞌ ada kaꞌ antara kitaꞌ nang nyangka diriꞌnya pane manurut urakng-urakng kaꞌ dunia nian, biarlah ia bodoh manurut urakng-urakng kaꞌ dunia nian supaya ia pane kaꞌ mata Allah. 19 Barang kapanean urakng-urakng kaꞌ dunia nian, kabodohatn manurut Allah. Kaꞌ dalapm Kitap Suci ada taconteng, “Allah nangkap ia kaꞌ koa nang bapikir kadeꞌ ia kaꞌ koa pane, kaꞌ dalapm oroꞌnya kaꞌ koa babaro.”f 20 Ada ugaꞌ nang taconteng lea nian, “Tuhan nauꞌan rancana-rancana urakng pane, sabatolnya samuanya toaꞌ-toaꞌ.”g 21 Tagal koa, amelah saurakngpun bangga jaji panunaꞌ talino, barang samua di Allah mareꞌatn kaꞌ kitaꞌ untuꞌ kabaikatn kitaꞌ: 22 baik Paulus, Apolos, Petrus, baik dunia, kaidupatn, maoꞌpun kamatiatn, baik waꞌtu ampeatn, maoꞌpun waꞌtu nang atakngaꞌ naꞌe. Samuanya koa dikitaꞌ ngampuꞌ. 23 Man kitaꞌ di Karistus ngampuꞌ, man Karistus di Allah ngampuꞌ.