2
Kamar kapala page waris samadiꞌatn! Deꞌe waꞌtu aku atakng kaꞌ kitaꞌ man ngesahatn kaꞌ kitaꞌ tentang rancana Allah nang giꞌ inaꞌ di dunia tauꞌatn, aku inaꞌ make kapanean dunia nian ato ngomong man kata-kata nang tingngiꞌ. 2 Barang aku dah batekat kadeꞌ salamaꞌ aku man kitaꞌ, aku inaꞌ ngajaratnnaꞌ ajaran lain salain Yesus Karistus, kususnya kadeꞌ Ia dah mati kaꞌ kayu salip. 3 Takaꞌ aku deꞌe ada man kitaꞌ aku lamah, siragot man kagaliꞌanan.a 4 Biarpun Kabar Baik nang ku ngajaratn koa, inaꞌ ku sampeatn man kapanean ku ngomong nang baya manjawat urakng sidi-sidi pucayaꞌ, tapi lewat koasa Roh Kudus lah nang muktiatn ajaran ku, 5 biar kapucayaꞌatn kitaꞌ ame bagantukng kaꞌ kapanean talino, tapi kaꞌ kakuatan Allah.Kapanean nang banar
2:6-16
6 Kahepun mpa koa, kaꞌ antara urakng-urakng nang kaidupatn rohaninya dah dewasa, aku ingkaꞌ ngomong tentang kapanean. Tapi kapanean nian bukeꞌlah kapanean dunia, ato kapanean panguasa-panguasa jaman ampeatn nian, nang kakuasaannya lanyapaꞌ. 7 Tapi kapanean nang ku nyampeatn koalah rancana Allah nang inaꞌ di dunia tauꞌatn. Deꞌe sanapeꞌ dunia dinampaꞌ Allah dah nyiapatn rancana kasalamatan koa untuꞌ ngincakng diriꞌ jaji mulia. 8 Inaꞌ ada dari panguasa dunia nian nang nganal rancana kasalamatan Allah koa, barang kadeꞌ kiraꞌnya ia kaꞌ koa nganalnya, ia kaꞌ koa inaꞌ makulatn Tuhan nang mulia kaꞌ kayu salip. 9 Tapi lea ada nang taconteng kaꞌ dalapm Kitap Suci,
“Ahe nang inaꞌ suah di mata teleꞌ, man nang inaꞌ suah di tarenyekng dangngar, man nang inaꞌ suah tapikir kaꞌ dalapm ati talino: Samua nang di Allah nyiapatn untuꞌ urakng-urakng nang ngasihiꞌ Ia.”b
10 Tapi ampeatn Allah dah nojokatn hal-hal koa kaꞌ diriꞌ melaluiꞌ Roh-Nya! Barang Roh Allah nauꞌan samua hal, bahkan hal-hal nang paling dalapm nang Allah nyosokatn sakalipun. 11 Nang nauꞌan insiꞌ ati urakng koa, kahelah roh urakng koa babaro. Lea koa ugaꞌ Allah, nang nauꞌan insiꞌ ati Allah kahelah Roh Allah babaro! 12 Diriꞌ inaꞌ narimaꞌ roh dunia, tapi diriꞌ narimaꞌ Roh nang mpat kaꞌ Allah, supaya diriꞌ nauꞌan ahe nang Allah mareꞌatn secara toaꞌ-toaꞌ kaꞌ diriꞌ. 13 Tagal koa, kadeꞌ kami nyelasatn hal-hal tentang Allah kaꞌ urakng-urakng nang ngampuꞌ Roh Allah, kami inaꞌ nyelasatnnya manurut kapanean talino, tapi manurut ajaran Roh Allah. 14 Tapi talino nang inaꞌ ngampuꞌ Roh Allah inaꞌ narimaꞌ ahe nang dari Roh Allah, barang manurut ia hal koa inaꞌ masok akal; man ia inaꞌ baya ngarati maksut Allah kadeꞌ ia inaꞌ di Roh Allah bantoꞌ. 15 Talino nang ngampuꞌ Roh Allah baya nilai sigana hal, tapi ia babaro inaꞌ baya dinilai urakng lain. 16 Barang kaꞌ dalapm Kitap Suci ada taconteng, “Inaꞌ ada urakng nang nauꞌan pikiran Allah, man inaꞌ ada nang dapat nasehatiꞌ-Nya.” Tapi kami ngampuꞌ pikiran Karistus.c