SURAT PAULUS NANG PAMULAꞌATN
UNTUꞌ JAMAAT KAꞌ
KORINTUS
Salam
1:1-3
1
Surat nian dari Paulus, man dari sodara sakapucayaꞌatn diriꞌ Sostenes. Aku Paulus di Allah nyaruꞌ jaji rasul Yesus Karistus manurut kamaoꞌan-Nya. 2 Surat nian kami ngiripm untuꞌ kitaꞌ jamaat kaꞌ kota Korintus nang dinyaruꞌ jaji umat Allah nang kudus. Ia lah nang ngudusatn kitaꞌ tagal kitaꞌ jaji soteꞌ man Karistus Yesus, sama-sama man samua urakng nang badiapm kaꞌ maeaꞌ maꞌan nang pucayaꞌ kaꞌ Karistus Yesus, Tuhan nya kaꞌ koa ugaꞌ Tuhan diriꞌ. a 3 Kabaikatn ati man idup nang panuh dame mpat kaꞌ Allah, Apaꞌ diriꞌ, man mpat kaꞌ Tuhan Yesus Karistus nyarataiꞌ kitaꞌ.Ucapatn sukur
1:4-9
4 Aku gia batarimaꞌ kasih kaꞌ Allah diriꞌ tagal di kitaꞌ, barang kitaꞌ dah narimaꞌ kabaikatn ati mpat kaꞌ Allah melaluiꞌ Yesus Karistus. 5 Barang kitaꞌ dah di Karistus ngampuꞌ, jaji kitaꞌ dah narimaꞌ balimpah-limpah sigana hal nang baik lea kapanean untuꞌ nyampeatn pasatn-Nya man ugaꞌ nauꞌan tentang sigana hal-hal rohani. 6 Koa nojokatn kadeꞌ kabar tentang Karistus dah sidi dalapm kaꞌ atinyu, 7 sampe-sampe kitaꞌ inaꞌ kakurangan soteꞌ barakatpun, samintara kitaꞌ nunggu Tuhan diriꞌ Yesus Karistus atakng man diteleꞌ disamua urakng. 8 Ia ugaꞌ nguatatnnaꞌ kitaꞌ untuꞌ batahan sampe kaꞌ pangabisatn, sampe-sampe kitaꞌ inaꞌ bacacat kaꞌ ari kaatangan-Nya. 9 Allah pantas dipucayaꞌiꞌ sapanuhnya, tagal Ia napatiaꞌ janji-Nya. Ia Allah nang dah nyajiatn kitaꞌ soteꞌ man Anak-Nya Yesus Karistus, nang jaji Tuhan diriꞌ.
Perpecahan kaꞌ dalapm jamaat
1:10-17
10 Kamar kapala page waris samadiꞌatn! Atas dama Tuhan diriꞌ Yesus Karistus, aku sidi-sidi bapintaꞌ biar kitaꞌ samua saia sakata; supaya ame ada perpecahan kaꞌ antara kitaꞌ. Arus lah kitaꞌ jaji soteꞌ, saati, man sapikir. 11 Tagal, urakng-urakng dari kaluarga Kloe madahatn kaꞌ aku kadeꞌ ada patangkaratn kaꞌ antara kitaꞌ, sodara-sodaraku. 12 Nang ku maksut ialah kadeꞌ kaꞌ antara kitaꞌ ada nang bakata, “Aku panunaꞌ Paulus.” Ada ugaꞌ nang bakata, “Aku panunaꞌ Apolos.” Nang lain bakata, “Aku panunaꞌ Petrus.” Sedangkan nang lain bakata, “Aku panunaꞌ Karistus.” b 13 Inaꞌ mungkin Karistus dah tabagi-bagi jaji sangahe kalompok! Aku Paulus inaꞌ mati kaꞌ kayu salip untuꞌ kitaꞌ. Kitaꞌ ugaꞌ inaꞌ dibaptis make damaku untuꞌ jaji panunaꞌku. 14 Sukurlah aku inaꞌ maptis saurakngpun kaꞌ antara kitaꞌ, salain Krispus man Gayus, c 15 ame sampe saurakngpun bakata kadeꞌ aku dah maptis ia untuꞌ jaji panunaꞌ ku. 16 O auꞌ, kaluarga Stepanus aku ugaꞌ nang maptisnya. Tapi selain nang kaꞌ koa, saingatku, inaꞌ ada urakng lain agiꞌ nang ku maptis. d 17 Barang Karistus nyuruh aku bukeꞌ untuꞌ maptis urakng, tapi untuꞌ ngesahatn Kabar Baik mpat kaꞌ Allah. Kabar Baik koa pun arus ku gesahatn bukeꞌ tagal kapaneanku ngomong, supaya koasa dari kamatiatn Karistus kaꞌ kayu salip inaꞌ jaji toaꞌ-toaꞌ.
Koasa man kapanean Allah ada kaꞌ Karistus
1:18–2:5
18 Tagal, urakng-urakng nang inaꞌ disalamatatnnaꞌ koa nganggap kadeꞌ Kabar tentang kamatiatn Karistus kaꞌ kayu salip koa sidi-sidi inaꞌ masok akal, tapi diriꞌ nang disalamatatnnaꞌ nauꞌan rati Kabar koa, nojokatn kadeꞌ Allah koa bakoasa. 19 Barang kaꞌ dalapm Kitap Suci, Allah bakata,
“Aku ngancuratnnaꞌ rancana urakng-urakng pane
man ngagalatnnaꞌ rancana urakng-urakng bijak.”e
20 Jaji, urakng-urakng pintar inaꞌ panting agiꞌ man urakng nang ngampuꞌ kapanean inaꞌ baguna man urakng-urakng nang jago ngomongpun inaꞌ ugaꞌ barati. Allah dah nojokatn kadeꞌ samua pangatahuan man kapanean dari dunia nian, sidi-sidi inaꞌ barati.f 21 Tagal nurut kapanean Allah, talino inaꞌ baya nganal Allah man kapanean talino koa babaro. Jaji, Allah mutusatn nyalamatatn talino nang pucayaꞌ kaꞌ Ia lewat Kabar nang kami nyampeatn, nang dinya kaꞌ koa nganggap inaꞌ masok akal. 22 Untuꞌ pucayaꞌ kaꞌ Kabar nang kami ngesahatn, urakng Yahudi maoꞌ ada hal ajaip jaji bukti. Man urakng Yunani maoꞌ kapanean nang luarbiasa jaji bukti. 23 Tapi kami kahe ngesahatn Karistus nang mati kaꞌ kayu salip. Kabar koa nyinggung parasaan urakng Yahudi, man dianggap Kabar nang inaꞌ masok akal di urakng-urakng nang bukeꞌ urakng Yahudi. 24 Tapi untuꞌ urakng-urakng nang dah di Allah nyaruꞌ, baik urakng Yahudi maoꞌpun urakng bukeꞌ Yahudi, Kabar tentang Karistus koalah cara Allah nojokatn koasa man kapanean-Nya. 25 Rancana Allah untuꞌ nyalamatatn talino, nang di talino anggap bodoh, jauh ngalabihiꞌ kapanean talino. Lea koa ugaꞌ rancana Allah nang dianggap lamah sasidinya jauh labih kuat dari kakuatan talino.
26 Ingat boh, kamar kapala page waris samadiꞌatn, leamae keadaan kitaꞌ kaꞌ waꞌtu Allah nyaruꞌ kitaꞌ jaji umat-Nya. Kahe sabebet ihan kaꞌ antara kitaꞌ nang pane ato bakoasa, ato bakadudukatn tingngi manurut paneleꞌanan urakng. 27 Tapi ahe nang bodoh di dunia teleꞌ, di Allah milih untuꞌ matabeꞌiꞌ urakng-urakng nang pane, man ahe nang lamah kaꞌ mata dunia, di Allah milih untuꞌ matabeꞌiꞌ nang kuat. 28 Allah milih ahe nang di dunia anggap inaꞌ baraga, man ahe nang dunia busakaatn man nang inaꞌ barati, biar Allah ngancuratn ahe nang di dunia anggap panting. 29 Biar ame saurakngpun nang nyombongkatn diriꞌnya kaꞌ adapatn Allah. 30 Allahlah nang manjawat sampe-sampe kitaꞌ soteꞌ man Karistus Yesus. Lewat Karistuslah, Allah nojokatn kaꞌ diriꞌ ahe sabanarnya nang dimaksut man kapanean-Nya. Man lewat Ia ugaꞌ Allah manjawat kitaꞌ babaikatn agiꞌ man diriꞌ-Nya, nyajiatn diriꞌ umat-Nya nang kusus, man mebasatn diriꞌ dari dosa. 31 Jaji, lea nang taconteng kaꞌ dalapm kitap suci, “Urakng nang maoꞌ babangga-bangga, arus babangga kaꞌ ahe nang di Tuhan panjawat.”g