Paulus kaꞌ adapatn Peliks
24:1-27
24
Dah lakaꞌ lima ari, Imam Agung Ananias man sangahe urakng pamimpin-pamimpin Yahudi man ugaꞌ saurakng ahli ukum badama Tertulus dari Yeusalem ampus kaꞌ Kaisarea. Ia kaꞌ koa atakng kaꞌ gubernur nyampeatn tuntutan kaꞌ Paulus. 2 Paulus di nyaruꞌ man di ngincakng kaꞌ Gubernur, lakaꞌ koa Tertulus mulaiꞌ nuduh Paulus, katanya: “Gubernur Peliks nang tahormat, tagal usaha kitaꞌ nagari kami aman. Man kapanean kitaꞌ bangsa kami dah manyak namu kamajuan. 3 Man kami kaꞌ mae-mae maꞌan sidi miah batarimaꞌkasih untuꞌ sigananya koa. 4 Tapi biar ame manyak muang waꞌtu kitaꞌ, aku mintaꞌ, man kamurahatn ati kitaꞌ biar nangngaratn kami sabantar maꞌan. 5 Kami dah namuan kadeꞌ urakng nang badama Paulus nian, saurakng nang dah manjawat nagari nian jaji inaꞌ aman. Urakng-urakng Yahudi manyak tapacah balah dinya nian kaꞌ saluruh karajaan binua Romawi. Ia ugaꞌ saurakng pamimpin dari kalompok nang ngikutiꞌ ajaran Yesus urakng Nasaret koa. 6 Malahan ia nyoba ngalanggar kakudusan Rumah Allah. Tagal mpa koa kami nangkap ia man maoꞌ ngakimiꞌ manurut Ukum Torat kami. 7 Tapi kapalaꞌ pasukan Lisias atakng man kakarasan ngarabut ia dari kami, 8 lalu nyuruh urakng-urakng nang nuntutnya atakng ngadap kitaꞌ. Kadeꞌ kitaꞌ mareksa ia, kitaꞌ babaro nauꞌanaꞌ kadeꞌ sigana tuduhan kami kaꞌ ia ingkaꞌ banar.” 9 Urakng-urakng Yahudi nang diꞌkoa ugaꞌ ikut nuduh Paulus man mabanar samua kaꞌ ahe nang Tertulus ngataatn.10 Lalu Gubernur koa mareꞌ isarat kaꞌ Paulus kadeꞌ ia mulih ngomong. Jakata Paulus, “Paꞌ Gubernur nang tahormat aku nauꞌan kadeꞌ kitaꞌ dah batahutn-tahutn lamanya jaji pamimpin man mutusatn pakara-pakara bangsa nian. Tagal koa aku inaꞌ galiꞌ untuꞌ mela diriꞌ ku kaꞌ adapatn kitaꞌ. 11 Baruꞌ dua balas ari nang lalu aku atakng kaꞌ Yerusalem untuꞌ baibadah. Hal koa baya dimuktiatn tagal rami nang jaji saksi. 12 Man inaꞌ suah urakng-urakng Yahudi neleꞌ aku batangkar man sae maꞌan ahe agiꞌ ngomoꞌan urakng untuꞌ manjawat karusuhan baik kaꞌ dalapm Rumah Allah, maoꞌ pun kaꞌ dalapm rumah tampat sumbayang ato pun kaꞌ maeaꞌ maꞌan kaꞌ dalapm kota nian 13 urakng-urakng nian inaꞌ bisa muktiatn kaꞌ kitaꞌ kadeꞌ tuduhan-tuduhan nya kaꞌ koa banar. 14 Ingkaꞌ arus ku akoꞌiꞌ kaꞌ kitaꞌ kadeꞌ aku nyambah Allah eneꞌ moyang kami manurut ajaran Yesus nang urakng-urakng Yahudi nian nganggap salah. Tapi aku pucayaꞌ kaꞌ sigananya nang taconteng kaꞌ dalapm Kitap Torat Musa man Kitap Nabi-nabi. 15 Lea ia kaꞌ kea, aku ugaꞌ miah pucayaꞌ kadeꞌ naꞌe Allah ngidupatnnaꞌ samua urakng mati, baik urakng-urakng banar maoꞌ pun urakng-urakng jahat. 16 Koa tagalnya aku sidi barusaha baik-baik biar ati nuraniku baraseh kaꞌ adapatn Allah man talino. 17 Dah sangahe tahutn lamanya aku ningalatn Yerusalem, aku mulakng agiꞌ kaꞌ koa sambil ngincakng bantuan duit kaꞌ bangsa ku man untuꞌ mareꞌ persembahan korban kaꞌ Allah.a 18 Samintara aku manjawat sigananya koa, sangahe urakng Yahudi dari binua propinsi Asia neleꞌ aku kaꞌ dalapm Rumah Allah, dah aku lakaꞌ man adat panyucian diriꞌ. Nanaꞌ manyak urakng man aku, man inaꞌ ada karusuhan diꞌkoa. 19 Arusnya ia kaꞌ koa lah nang ngadap kitaꞌ kaꞌ dian man nyampeatn tuduhan koa, kadeꞌ ia kaꞌ koa ingkaꞌ ada tuduhan kaꞌ aku. 20 Ato biarlah urakng-urakng nang ada kaꞌ dian nyampeatn kajahatatn ahe nang ia kaꞌ koa namu, takaꞌ aku kaꞌ adapatn Dewan Agama Yahudi. 21 Ato mungkin Ia kaꞌ koa ngadiliꞌ aku kaꞌ kitaꞌ, tagal aku suah kata kaꞌ ia kaꞌ koa lea nian: Aku pucayaꞌ kadeꞌ urakng-urakng mati mulakngaꞌ idup agiꞌ.”b
22 Lalu Peliks nang dah manyak nauꞌan tentang ajaran Yesus, nundaꞌ sidang koa sambil bakata: “Aku mareꞌ kaputusan, kadeꞌ kapalaꞌ pasukan Lisias dah atakng.” 23 Lalu ia mareꞌ parentah kaꞌ perwira nang batanggongjawap kaꞌ Paulus koa biar tatap nahan Paulus, tapi mareꞌ sabebet kabebasatn kaꞌ ia man ngijinan ayukng-ayukngnya mareꞌatn kaꞌ ia ahe nang di Paulus malaluatn.
24 Dah lakaꞌ sangahe ari Peliks atakng agiꞌ man bininya nang badama Drusila; Ia saurakng Yahudi. Lalu Peliks nyuruh urakng naap Paulus, lakaꞌ koa Peliks nangngaratn Paulus ngomong tentang leamae pucayaꞌ kaꞌ Yesus. 25 Tapi takaꞌ Paulus narusatn omongannya tentang kajujuran man nguasaiꞌ diriꞌ man ugaꞌ tentang ukuman kaꞌ ari kiamat, Peliks jaji galiꞌ man lalu bakata, “Cukuplah doloꞌ ari nian, lain kali kadeꞌ ada waꞌtu kao mulih ngomong agiꞌ” 26 Samintara koa Peliks ngarapatn namuaꞌ duit dari Paulus. Koa tagalnya ia bakali-kali nyuruh urakng naap Paulus untuꞌ bangomongan man ia.
27 Salamaꞌ dua tahutn Peliks miaratn Paulus kaꞌ dalapm pinjara. Tagal Peliks maoꞌ naap ati urakng Yahudi. Lakaꞌ koa Peliks diganti Perkius Pestus jaji gubernur.