Paulus ngomong kaꞌ urakng Yahudi
22:1-22
22
“Page samadiꞌatn man pamimpin-pamimpin bangsa diriꞌ nian, coba dangngaratnlah pambelaanku nian!” 2 Takaꞌ ia kaꞌ koa nangngar Paulus make bahasa Ibrani, ia kaꞌ koa jaji labih tanang agiꞌ. Lalu Paulus ngomong agiꞌ: 3 “Aku urakng Yahudi, lahir kaꞌ Tarsus kaꞌ tanah Kilikia. Aku murit Gamaliel, aku di ngajar manurut ukum eneꞌ moyang diriꞌ. Jaji aku sidi-sidi miah ngasiꞌ kaꞌ Allah, lea kitaꞌ ari nian.a b 4 Aku nganiaya sampe mati pangikut-pangikut ajaran baru koa. Ia kaꞌ koa samuanya, baik nang laki maoꞌ pun nangbini, ku nangkap man ku namaꞌan kaꞌ dalapm pinjara.c 5 Imam Agung babaro man samua Sidang Agama Yahudi baya mareꞌ kasaksian kadeꞌ aku inaꞌ alok. Tagal ia kaꞌ koalah nang dah mareꞌatn kaꞌ aku surat kuasa nang dinujuatn kaꞌ urakng-urakng Yahudi kaꞌ Damsik. Man surat koa aku mulih nangkap kaꞌ naun urakng-urakng nang pucayaꞌ kaꞌ ajaran koa, man ngincakng ia kaꞌ koa kaꞌ Yerusalem untuꞌ diukum.6 Waꞌtu kaꞌ pajalanan nangkapaꞌ ia kaꞌ koa man amper sampe kaꞌ Damsik, waꞌtu tangah ari, tiba-tiba ada saho nang sidi miah tarakng mpat kaꞌ langit ngulilikngiꞌ aku. 7 Aku tarabah kaꞌ tanah lalu nangngar suara nang bakata kaꞌ aku, ‘Saulus, Saulus! Ngahe kao nganiaya Aku?’ 8 Lalu aku batanyaꞌ, ‘Sae kitaꞌ Tuhan?,’ sahut-Nya, ‘Akulah Yesus urakng nasaret koa nang kao nganiaya,’ 9 urakng-urakng nang ada diꞌkoa sama-sama man aku neleꞌ saho koa, tapi ia kaꞌ koa inaꞌ nangngar suara nang ngomong kaꞌ aku. 10 Lalu aku batanyaꞌ ugaꞌ, ‘Ahe nang arus ku panjawat Tuhan?’ Tuhan nyahut, ‘Lumpatlah man tamaꞌ kaꞌ Damsik. Kaꞌ naun naꞌe kao di bareꞌ nauꞌan naꞌ sigana nang ahe nang Allah maoꞌ panjawat kaꞌ kao.’ 11 Aku jaji butaꞌ tagal saho nang miah nyiloꞌatn koa. Jaji ayukng-ayukngku nyingiꞌiꞌ kokotku man ngirikng aku tamaꞌ kaꞌ Damsik. 12 Kaꞌ Damsik, ada saurakng nang badama Ananias. Ia saurakng nang miah satia naatiꞌ Ukum Torat, Samua urakng Yahudi nang diapm kaꞌ Damsik miah hormat kaꞌ ia. 13 Ia atakng naboꞌ aku, lalu badiri kaꞌ sabalahku man bakata, ‘Saulus, sodaraku bukaꞌlah matanyu man neleꞌlah!’ Takaꞌ koa ugaꞌ aku baya neleꞌ man neleꞌ kaꞌ ia. 14 Lalu jakatanya kaꞌ aku, ‘Allah eneꞌ moyang diriꞌ dah milih kao biar kao nauꞌan kamaoꞌan-Nya, man neleꞌ Yesus nang gia idup banar kaꞌ mata Allah man nangngar langsung suara-Nya, 15 Kao jajiaꞌ saksi-Nya untuꞌ ngesahatn kaꞌ samua urakng ahe nang dah dinyu neleꞌ man nangngar. 16 Ampeatn ame agiꞌ nunggu lama-lama. Lumpatlah, man biarlah diriꞌnyu di baptis badoꞌalah kaꞌ Tuhan Yesus biar kao dibarasehatn dari dosa-dosanyu.
17 Lakaꞌ koa aku mulakng kaꞌ Yerusalem, man takaꞌ aku tagah badoꞌa kaꞌ Rumah Allah, Aku di Roh Kudus nguasaiꞌ. 18 Aku neleꞌ Tuhan; Ia bakata kaꞌ aku, ‘ganceh tingngalatn Yerusalem, tagal urakng-urakng kaꞌ dian inaꞌ narimaꞌaꞌ kasaksiannyu tentang Aku.’ 19 Aku bakata, ‘Tuhan, ia kaꞌ koa miah nauꞌan kadeꞌ aku dah tamaꞌ rumah tampat sumbayang untuꞌ nangkap ia kaꞌ koa man mangkongiꞌ urakng-urakng nang pucayaꞌ kaꞌ Kitaꞌ 20 Lea koa ugaꞌ saksi Kitaꞌ Stepanus mati dibunuh, aku babaro ada di koa man satuju pambunuhan koa. Malah akulah nang nungguiꞌ pakean urakng-urakng nang munuh ia.’d 21 Tapi Tuhan bakata agiꞌ kaꞌ aku, ‘Ampuslah! tagal aku nyuruhaꞌ kao ampus kaꞌ tampat nang jauh kaꞌ urakng-urakng nang bukeꞌ Yahudi.’”
22 Sampe diꞌkoalah urakng rami koa maoꞌ nangngaratn Paulus. Lakaꞌ koa ia kaꞌ koa langsung bangampakatn, “Bunuh jaꞌ urakng nang lea koa. Ia inaꞌ patut idup!”
Kaꞌ dalapm pos kapalaꞌ pasukan
22:23-29
23 Sambil bangampakatn, ia kaꞌ koa mukaꞌ bajunya kaꞌ koa, man ngamuratn-ngamuratn dabu kaꞌ langit. 24 Tagal koa kapalaꞌ pasukan mareꞌ parentah untuꞌ ngincakng Paulus kaꞌ pos kapalaꞌ pasukan man nyuruh mareksa man malasahnya biar di tauꞌatn ahe tagalnya urakng rami koa ngampak lea koa kaꞌ ia. 25 Tapi waꞌtu Paulus dah dingikat untuꞌ di pangkongaꞌ, Paulus bakata kaꞌ perwira nang badiri diꞌkoa, “Mulih keꞌ malasah saurakng warga nagari Roma sanapeꞌ di adiliꞌ?” 26 Nangngar pakataatn koa, perwira koa ampus kaꞌ kapalaꞌ pasukan man bakata, “Paꞌ komandan, urakng nian warga nagari Roma! Amper jaꞌ diriꞌ ngalanggar ukum!” 27 Lalu kapalaꞌ pasukan koa atakng kaꞌ Paulus man bakata, “Padahatn kaꞌ aku, sidi keꞌ kao warga nagari Roma?” man Paulus nyahut, “Sidi!” 28 Lalu kata kapalaꞌ pasukan koa, “Untuꞌ jaji warga nagari koa dah ku mali man raga nang mahal” sahut Paulus, “Tapi dari aku dimaranakatn dah jaji warga nagari Roma.” 29 Tagal koa lah anggota-anggota tantara nang dah siap mareksa Paulus man mangkongngaꞌnya mundur man jaji galiꞌ tagal dah ngikat Paulus, padahal Paulus warga nagari Roma.
Paulus kaꞌ adapatn Sidang Agama Yahudi
22:30–23:11
30 Kapalaꞌ pasukan Roma koa sidi maoꞌ nauꞌan ahe nang sasidinya nang manjawat urakng-urakng Yahudi nyalahatn Paulus. Tagal koa ampaginya ia nyaruꞌ imam-imam kapalaꞌ man Sidang Agama Yahudi biar bakomoꞌ. Lalu Paulus di ngalapasatn dari ikatatnnya, lalu ngincakng Paulus ngadap ia kaꞌ koa samuanya.