Paulus kaꞌ Epesus
19:1-12
19
Takaꞌ Apolos masih kaꞌ kota Korintus, Paulus naboꞌ daꞌerah-daꞌerah padalaman sampe kaꞌ Epesus. Diꞌkoa ia batamu man sangahe urakng nang dah pucayaꞌ kaꞌ Yesus. 2 Lalu Paulus batanyaꞌ kaꞌ ia kaꞌ koa, “Takaꞌ kitaꞌ pucayaꞌ ajaran koa, ahe keꞌ kitaꞌ ugaꞌ narimaꞌ Roh Kudus Allah?” Tapi ia kaꞌ koa nyahutiꞌnya: “Napeꞌ, bahkan kami giꞌ naꞌ suah nangngar kadeꞌ ada Roh Kudus Allah.” 3 Lalu ia batanyaꞌ agiꞌ, “Kadeꞌ lekoa, kitaꞌ di maptis man ajaran sae?” Sahutnya kaꞌ koa, “Kami dibaptis man ajaran Yohanes.” 4 Lalu Paulus bakata, “Yohanes maptis urakng jaji tanda kadeꞌ ia kaꞌ koa dah batobat dari dosa-dosa nya. Yohanes ugaꞌ bapadah kadeꞌ ia kaꞌ koa arus pucayaꞌ kaꞌ saurakng nang atakngngaꞌ lakaꞌ ia, yakoa Yesus.”a 5 Takaꞌ nangngar pakataatn Paulus koa, ia kaꞌ koa mintaꞌ Paulus maptis nya kaꞌ koa dalapm dama Tuhan Yesus. 6 Man waꞌtu Paulus ngangkat kadua kokot kaꞌ atas nya kaꞌ koa, Roh Kudus nguasaiꞌ nya kaꞌ koa, lalu mulaiꞌ ngomong dalapm bahasa nang ajaip man ugaꞌ nyampeatn pasatn mpat kaꞌ Allah. 7 Jumbalah nya kaꞌ koa kurang labih dua balas urakng nanglaki.8 Salamaꞌ talu bulatn Paulus naboꞌ rumah tampat sumbayang diꞌkoa man ngajar sidi barani. Man pangajarannya ia barusaha untuꞌ mareꞌ kayakinan kaꞌ ia kaꞌ koa tentang leamae Allah marentah jaji Raja. 9 Tapi basangahe urakng kaꞌ antara nya kaꞌ koa karas kapala man baiꞌ pucayaꞌ kaꞌ Yesus. Kaꞌ adapatn urakng nang bakomoꞌ kaꞌ diꞌkoa ia kaꞌ koa ngina maraga kasalamatan lewat Yesus. Tagal koa Paulus ningalatn nya kaꞌ koa, lalu ampus man panunaꞌ-panunaꞌ Yesus kaꞌ samiꞌ kuliah Tiranus. Tiap ari ia batukar pikiran man urakng-urakng nang ada diꞌkoa. 10 Hal koa di nya manjawat salamaꞌ dua tahutn lamanya, sampe samua panduduk Asia nangngar Pirman Tuhan, baik urakng Yahudi maoꞌ pun urakng Yunani.
11 Allah manjawat hal-hal ajaip nang luar biasa lewat Paulus. 12 Kadeꞌ saput tangan ato kaen pangikat pingakng Paulus di ngincakng kaꞌ urakng-urakng sakit, panyakit nya kaꞌ koa samuh man roh setan pun kaluar dari nya kaꞌ koa.
Kamudaꞌ-kamudaꞌ Skewa
19:13-20
13 Tapi ada ugaꞌ basangahe tukang jampi urakng Yahudi, bajalatn ngulilikngiꞌ nagari koa, nyoba nyabut dama Tuhan Yesus kaꞌ ia kaꞌ koa nang di roh jahat ngarasukiꞌ, kata nya kaꞌ koa: “Man dama Yesus nang di Paulus ngesahatn koa, aku ngoser kao!” 14 Ada batujuh kamudaꞌ nanglaki anak saurakng imam kapalaꞌ Yahudi, badama Skewa nang manjawat hal koa. 15 Tapi roh jahat koa bakata kaꞌ ia kaꞌ koa, “Aku kanal Yesus man Paulus aku pun kanal, tapi kao sae?” 16 Urakng nang di roh jahat ngarasukiꞌ koa tiba-tiba nyarang, man ngarantak pakean nya kaꞌ koa man ngalahatnnya. Lalu ia kaꞌ koa badariatn mpat kaꞌ rumah koa lukaꞌ-lukaꞌ, amper taranjong. 17 Samua urakng Yahudi man urakng bangsa lain nang badiapm kaꞌ Epesus nangngar tentang kajadian koa, lalu ia kaꞌ koa jaji galiꞌ. Jaji dama Tuhan Yesus siaꞌ di puji-puji. 18 Rami kaꞌ antara nya kaꞌ koa nang dah jaji pucayaꞌ kaꞌ Yesus atakng ngakoꞌiꞌ kaꞌ adapatn urakng rami kadeꞌ ia kaꞌ koa suah talibat ilamu sihir. 19 Man ia kaꞌ koa nang biasa nyalanan ilamu sihir, ngomoꞌan buku-bukunya kaꞌ koa lalu nununya kaꞌ adapatn urakng rami. Raga buku-buku koa kadeꞌ di jumbalahatn samuanya ada kurang labih lima puluh ribu duit perak. 20 Man cara lekoalah, barita kasalamatan tentang Tuhan Yesus siaꞌ tasabar man siaꞌ ayaꞌ pangaruhnya.
Demetrius nimulatn uru-ara kaꞌ Epesus
19:21-40
21 Lakaꞌ kajadian-kajadian koa, Paulus barancana ampus kaꞌ Yerusalem ngalewatiaꞌ Makedonia man Akaya. Ia ugaꞌ bakata, “Lakaꞌ kaꞌ Yerusalem, aku arus naboꞌ Roma.” 22 Lalu Paulus nyuruh dua urakng kapucayaꞌatnnya, yakoa Timotius man Erastus untuꞌ ampus kaꞌ Makedonia, samintara ia badiapm sangahe waꞌtu lamanya agiꞌ kaꞌ propinsi Asia.
23 Kira-kira kaꞌ waꞌtu koalah tajaji kaributatn nang ayaꞌ kaꞌ Epesus tagal ajaran tentang Yesus. 24 Tagal kaꞌ kota koa ada saurakng tukang perak badama Demetrius, nang manjawat rumah-rumahan dewa untuꞌ dewi Artemis. Usaha urakng koa ngatangan pangasilan nang ayaꞌ kaꞌ tukang-tukangnya. 25 Ia ngomoꞌan pangarajitn kaꞌ perusahaannya koa sama-sama man pangarajitn perak nang lainnya man bakata: “Page samadiꞌatn, kitaꞌ nauꞌan, kadeꞌ diriꞌ namu asil kakayaatn dari pakarajaatn nian! 26 Ampeatn kitaꞌ babaro neleꞌ man nangngar, leamae Paulus, bukeꞌ jaꞌ kaꞌ Epesus, tapi ugaꞌ amper kaꞌ sigana Asia dah mujuk man nyasatatn manyak urakng man bakata, kadeꞌ ahe nang di kokot talino panjawat bukeꞌlah dewa. 27 Gara-gara Paulus koa, pakarajaatn diriꞌ dingarugiatn. Nang labih parah, panyambahan dewi diriꞌ di anggapaꞌ toaꞌ-toaꞌ, man kaagungan Artemis di tinyak-tinyak! Sidi cilaka! Padahal ia lah dewi agung nang dipuja di samua urakng Asia, bahkan kaꞌ saluruh aiꞌ tanah.” 28 Nangngar pakataatn Demetrius, ati urakng-urakng kaꞌ koa jaji angat lalu ia kaꞌ koa bangampakatn, “Idup Artemis, dewi urakng Epesus!” 29 Lalu timullah uru-ara kaꞌ sigana kota. Kadua ayukng sapajalanan, nang ngayukngiꞌ Paulus dari Makedonia, yakoa Gayus man Aristarkus, di nangkap man di nyeret barami-rami tamaꞌ kaꞌ gedung kesenian 30 Paulus maoꞌ tamaꞌ nunaꞌannaꞌ ia kaꞌ koa, tapi urakng-urakng nang pucayaꞌ kaꞌ Yesus kaꞌ koa maiꞌan ia. 31 Basangahe urakng pambesar kaꞌ propinsi Asia nang dah jaji ayukng Paulus ngiripm pasatn biar ia ame tamaꞌ kaꞌ tampat koa. 32 Samintara koa urakng-urakng nang bakomoꞌ kaꞌ gedung kesenian koa dah jaji kaco balo. Ada nang ngampak lea koa, ada nang lea nian, tagal kamanyakatn dari nya kaꞌ koa inaꞌ nauꞌan ahe sabab nya bakomoꞌ diꞌkoa. 33 Lalu saurakng badama Aleksander dinyorong kaꞌ depan di urakng-urakng Yahudi. Ia namu katarangan dari urakng rami tentang ahe nang tajaji. Ganceh ia mareꞌ isarat man kokotnya maoꞌ mareꞌ penjalasan untuꞌ mela diriꞌ kaꞌ adapatn urakng-urakng koa. 34 Tapi takaꞌ ia kaꞌ koa nauꞌan, kadeꞌ ia urakng Yahudi, ia kaꞌ koa bangampakatn sama-sama kurang labih dua jam lamanya: “Idup Artemis, dewi urakng Epesus!” 35 Lalu seketaris kota nyuruh urakng rami koa tanang. Lakaꞌ koa ia bakata, “O urakng Epesus, heaꞌ geger! Samua urakng nauꞌan kadeꞌ Epesuslah kota nang nyaga rumah dewi Artemis man batu suci nang jantuꞌ dari langit. 36 Inaꞌ saurakng pun baya mantah hal koa. Tagal koa tananglah man ame baganceh-ganceh naap tindakan. 37 Urakng-urakng nian, kitaꞌ ngincakng kaꞌ dian bukeꞌ tagal ia kaꞌ kea dah ngarampok rumah dewa ato tagal ia kaꞌ kea ngina dewi diriꞌ. 38 Kadeꞌ Demetrius man ayukng sakarajanya bera kaꞌ saurakng, ia kaꞌ koa baya ngincakng pakara koa kaꞌ sidang pangadilan, diꞌmae kadua balah pihak kajah nojokatn kasalahatn kaꞌ adapatn naꞌ akim. 39 Tapi kadeꞌ masih ada agiꞌ nang lain nang kitaꞌ maoꞌiꞌ, koa arus di salasaiatn dalapm rapat umum nang sah. 40 Tagal ahe nang tajaji ari nian sidi bahaya untuꞌ diriꞌ. Diriꞌ baya di tuduh ngadaatn pambarontakan, barang diriꞌ naꞌ ada soteꞌ alasan pun untuꞌ manaratn uru-ara nian.” Lakaꞌ ngataatn samuanya koa, ia nyuruh urakng rami koa pulakng.