Timotius nunaꞌ Paulus man Silwanus
16:1-3
16
Paulus narusatn pajalanannya kaꞌ Derbe, lakaꞌ koa kaꞌ Listra. Diꞌkoa ada saurakng panunaꞌ Yesus nang badama Timotius. Uweꞌnya urakng Yahudi, nang dah pucayaꞌ kaꞌ Tuhan Yesus; tapi Apaꞌnya urakng Yunani. 2 Kaꞌ antara urakng-urakng pucayaꞌ nang badiapm kaꞌ Listra man Ikonium, Timotius di kanal urakng nang baik. 3 Paulus maoꞌ biar Timotius nunaꞌan ia. Tagal koa ia nyuruh malak Timotius. Barang urakng-urakng Yahudi kaꞌ daꞌerah koa samuanya nauꞌan kadeꞌ apaꞌ Timotius urakng Yunani.Paulus nyabarang kaꞌ Makedonia
16:4-12
4 Kaꞌ tiap-tiap kota nang di Paulus man Silwanus nyarohiꞌ, ia kaꞌ koa nyampeatn kaꞌ jamaat-jamaat tentang paraturan nang dah di rasul-rasul man pamimpin-pamimpin koa mutusatn kaꞌ Yerusalem biar jamaat naatiꞌ paraturan koa. 5 Jaji jamaat-jamaat koa siaꞌ kuat imannya, man tiap ari siaꞌ batambah manyak jumbalahnya.
6 Paulus man Silwanus narusatn pajalanan kaꞌ daꞌerah Prigia man Galatia tagal Roh Kudus inaꞌ ngijinan Paulus man Silwanus ngesahatn pakataatn Allah kaꞌ Asia. 7 Takaꞌ sampe kaꞌ batas Misia, ia kaꞌ koa nyoba tamaꞌaꞌ kaꞌ propinsi Bitinia, tapi Roh Yesus maiꞌan nya kaꞌ koa. 8 Jaji ia kaꞌ koa ngalintasiꞌ Misia sampe kaꞌ kota palabuhan Troas. 9 Malamnya, kaꞌ Troas koa Paulus namu paneleꞌanan. Kaꞌ paneleꞌanannya koa ia neleꞌ saurakng Makedonia badiri kaꞌ adapatnnya mintaꞌ ia atakng kaꞌ Makedonia untuꞌ mantoꞌnya kaꞌ koa. 10 Lakaꞌ Paulus namu paneleꞌanan koa, kami langsung siap-siap ampus kaꞌ Makedonia. Tagal kami yakin kadeꞌ Allah nyuruh kami ngesahatn Kabar Baik koa kaꞌ urakng-urakng Makedonia.
11 Kami ningalatn Troas, balayar langsung kaꞌ Samotrake, man ampaginya kaꞌ Neapolis. 12 Dari koa kami kaꞌ Pilipi, kota pamulaꞌatn dari Makedonia. Pilipi nian jajahatn karajaan Roma. Kaꞌ kota koa kami badiapm sangahe ari lamanya.
Paulus kaꞌ Pilipi
16:13-18
13 Kaꞌ ari sabat kami ampus kaꞌ tapi sunge kaꞌ luar pintu gerbang kota, tagal kami rasa kaꞌ diꞌkoa ada tampat sumbayang untuꞌ urakng Yahudi. Lalu kami bangomongan man nangbini-nangbini nang bakomoꞌ kaꞌ tampat koa. 14 Saurakng dari koa damanya Lidia nang barasal dari Tiatira. Ia koa saurakng panjual kaen ungu. Allah Kasih kaꞌ ia, Allah mukaꞌ atinya sahingga ia narimaꞌ ahe nang di Paulus ngajaratn kaꞌ ia. 15 Lidia man sarumahannya di maptis. Lalu ngundang kami. Ia bakata, “Kadeꞌ page samadiꞌatn marasa aku dah sidi-sidi pucayaꞌ kaꞌ Tuhan Yesus, badiapmlah kaꞌ rumah ku.” Ia pun mintaꞌ sidi kaꞌ kami sampe ahirnya kami narimaꞌ tawarannya.
16 Kaꞌ soteꞌ ari takaꞌ kami tagah ampus kaꞌ tampat badoꞌa nang kaꞌ tapi sunge, kami batamu man saurakng nangbini; ia koa ulutn. Nangbini koa di roh jahat nguasaiꞌ, sampe ia pane ngaramal ahe nang jajiaꞌ kaꞌ depan. Man ramalannya koa, ia mareꞌ kauntungan nang ayaꞌ kaꞌ tuannya. 17 Ia nunaꞌan Paulus man kami dari balakang sambilnya ngampak, katanya: “Urakng-urakng nian amba Allah nang inta Miah Tingi. Ia ngesahatn kaꞌ kitaꞌ maraga kasalamatan.” 18 Sangahe ari lamanya ia manjawat hal koa. Tapi Paulus inaꞌ tahan agiꞌ di gangguan koa, ia malek kaꞌ balakang man bakata kaꞌ roh koa: “Man dama Yesus Karistus aku nyuruh kao kaluar dari nangbini nian.” Waꞌtu koa ugaꞌ setan koa ningalatn nangbini koa.
Kapalaꞌ pinjara Pilipi
16:19-40
19 Takaꞌ Tuan-tuannya sadar kadeꞌ kasampatannya kaꞌ koa untuꞌ namu duit dah inaꞌ, ia kaꞌ koa nangkap Paulus man Silwanus, lalu nyeret nyadua kaꞌ alun-alun untuꞌ ngadap pajabat kota. 20 Ia kaꞌ koa ngincakng Paulus man Silwanus kaꞌ pajabat-pajabat Roma, lalu bakata, “Urakng-urakng nian urakng Yahudi. Ia kaꞌ kea ngaco kaꞌ kota diriꞌ! 21 Ia kaꞌ kea ngajaratn adat istiadat Yahudi, man diriꞌ warga nagari Roma inaꞌ pantas narimaꞌ man nurutiꞌnya. 22 Urakng rami pun turut nyarang Paulus man Silwanus; man pajabat-pajabat pamarentah ngojek pakean Paulus man Silwanus lalu nyuruh urakng mangkong nyadua man tungkat. 23 Lakaꞌ nyadua di mangkong bamiah-miah nyadua di namaꞌan kaꞌ dalapm pinjara. Kapalaꞌ pinjara di nyuruh nyaga nyadua batol-batol. 24 Tagal parentah koa, kapalaꞌ pinjara koa nahan Paulus man Silwanus kaꞌ kamar pinjara nang paling kaꞌ tangah, man pahanya dingalabak. 25 Tapi kira-kira tangah malam Paulus man Silwanus tagah badoꞌa man barenyah muji-muji Allah, tahanan nang lain pun nangngaratn nyadua barenyah. 26 Tiba-tiba jaji gempa nang sidi kuat, sampe dasar pinjara koa pun bagagar. Samua pintu pinjara tabukaꞌ man rante-rante nang ngalabak sigana tahanan pun talapas. 27 Kapalaꞌ pinjara koa tadohani dari tidurnya man neleꞌ pintu-pintu pinjara tabukaꞌ, ia mabut padangnya munuhaꞌ diriꞌnya, tagal jaatinya samua urakng ukuman koa dah badariatn. 28 Tapi Paulus ngampak sakuat-kuatnya, “Ame munuh diriꞌ! kami samua masih ada kaꞌ dian. 29 Kapalaꞌ pinjara koa mintaꞌ lampu lalu batilamaꞌ kaꞌ dalapm, basiragotatn ia balutut kaꞌ adapatn Paulus man Silwanus. 30 Lakaꞌ koa ia ngincakng nyadua koa kaluar man bakata, “Tuan-tuan, ahe nang arus ku panjawat biar aku salamat. 31 Paulus man Silwanus nyahut, “Pucayaꞌlah kaꞌ Tuhan Yesus! Kao salamataꞌ kao man samua kaluarga nyu. 32 Lalu Paulus man Silwanus narangkatn pakataatn Allah kaꞌ kapalaꞌ pinjara koa man kaꞌ samua urakng nang ada kaꞌ rumahnya. 33 Kaꞌ tangah malam koa ugaꞌ, kapala pinjara koa mindahatn nya dua koa lalu marasehatn lukaꞌ-lukaꞌnya. Jaji ia man samua urakng nang kaꞌ rumahnya koa di maptis. 34 Lakaꞌ koa ia ngincakng Paulus man Silwanus kaꞌ rumahnya mareꞌnya makatn. Ia man sigana kaluarganya sidi repo tagal ia kaꞌ koa pucayaꞌ kaꞌ Allah.
35 Ampaginya, pajabat-pajabat pamarentah Roma ngiripm patugas kaamanan kota kaꞌ kapalaꞌ pinjara untuꞌ nyampeatn parentah biar Paulus man Silwanus di lapasatn. 36 Jaji kapalaꞌ pinjara koa nyampeatn kaꞌ Paulus. Jakatanya, “Tuan-tuan, pajabat-pajabat pamarentah dah mareꞌ parentah untuꞌ ngalapasatn tuan-tuan. Ampeatn tuan-tuan mulih pulakng. Salamat jalan!” 37 Tapi Paulus bakata kaꞌ patugas kaamanan koa, “Kami warga nagari Roma, tagal di pajabat-pajabat kota koa kami di mangkong man di namaꞌan kaꞌ pinjara. Man ampeatn ia kaꞌ koa nyuruh kami pulakng toaꞌ-toaꞌ? Kami baiꞌ! Suruh pajabat pamarentah koa atakng babaro kaꞌ dian ngalapasatn kami.” 38 Lalu naꞌpatugas kaamanan koa ampus ngalaporatn kata-kata Paulus kaꞌ pajabat-pajabat kota. Waꞌtu pajabat-pajabat koa nangngar kadeꞌ Paulus man Silwanus warga nagari Roma, ia kaꞌ koa jaji galiꞌ. 39 Lalu ia kaꞌ koa ampus mintaꞌ maꞌap kaꞌ Paulus man Silwanus, lakaꞌ ngantat nyadua kaluar dari pinjara, man mintaꞌ biar nyadua ningalatn kota koa. 40 Paulus man Silwanus ningalatn pinjara koa lalu ampus kaꞌ rumah Lidia. Lakaꞌ batamu man nguatatn ati sodara-sodari saiman, Paulus man Silwanus ningalatn Pilipi.