Sidang kaꞌ Yerusalem
15:1-21
15
Basangahe urakng Yahudi nang dah pucayaꞌ kaꞌ Yesus atakng dari Yudea kaꞌ Antiokia man ngajar urakng-urakng pucayaꞌ kaꞌ Antiokia koa kadeꞌ ia kaꞌ koa inaꞌ di balak nurut ukum Musa, ia kaꞌ koa inaꞌ bisa salamat. 2 Paulus man Barnabas baiꞌ narimaꞌ pandapat nya kaꞌ koa. Ahirnya di nantuatn biar Paulus man Barnabas man urakng lain dari Antiokia ampus kaꞌ Yerusalem untuꞌ ngomongan masalah koa man rasul-rasul man pamimpin-pamimpin kaꞌ naun.3 Jadi, man dukungan dari jamaat, Paulus man Barnabas ampus kaꞌ Yerusalem. Waꞌtu ngalewatiꞌ propinsi Penisia man Samaria ia kaꞌ koa ugaꞌ naboꞌ page samadiꞌatn nang saiman kaꞌ diꞌkoa, man ugaꞌ ngesahatn kadeꞌ manyak urakng-urakng nang bukeꞌ Yahudi dah batobat man nunaꞌ Yesus. Nangngar gesah koa page samadiꞌatn nang saiman koa jaji sidi karepoatn. 4 Takaꞌ nya sampe kaꞌ Yerusalem, ia kaꞌ koa di narimaꞌ baik di jamaat man rasul-rasul sarata ugaꞌ pamimpin-pamimpin. Lalu Paulus man Barnabas ngesahatn kaꞌ urakng-urakng koa tentang samuanya nang dah di Allah manjawat lewat ia kaꞌ koa. 5 Tapi basangahe urakng dari golongan Parisi nang dah pucayaꞌ, badiri man bakata, “Urakng-urakng bangsa lain nang dah pucayaꞌ koa arus di balak man inaꞌ mulih inaꞌ ngikutiꞌ ukum Musa.”
6 Lalu rasul-rasul man pamimpin-pamimpin bakomoꞌ untuꞌ ngomongan masalah koa. 7 Lakaꞌ sangahe waꞌtu lamanya batukar pikiran. Petrus badiri man bakata, “Page samadiꞌatn! Kitaꞌ babaro nauꞌan kadeꞌ sangahe waꞌtu nang deꞌe Allah milih Aku dari antara kitaꞌ untuꞌ ngesahatn Kabar Baik koa kaꞌ urakng-urakng nang bukeꞌ urakng Yahudi, biar ia kaꞌ koa pun nangngar man pucayaꞌ.a 8 Allah nang nganal ati talino dah nojokatn kadeꞌ Ia dah narimaꞌ urakng-urakng nang bukeꞌ Yahudi. Allah nojokatn hal koa kaꞌ diriꞌ takaꞌ Ia mareꞌ Roh Kudus kaꞌ ia kaꞌ koa sama lea nang dah di-Nya mareꞌatn kaꞌ diriꞌ.b 9 Allah inaꞌ meda-medaatn diriꞌ man ia kaꞌ koa. Ia marasehatn ati nya kaꞌ koa, tagal ia kaꞌ koa pucayaꞌ. 10 Jadi, ngahe kitaꞌ maoꞌ ngalawan Allah ampeatn man mareꞌ tanggongan nang barat kaꞌ page samadiꞌatn saiman nang bukeꞌ Yahudi koa? Padahal eneꞌ moyang diriꞌ man diriꞌ babaro inaꞌ mampu nyalanan Ukum Torat koa. 11 Sabaliknya, diriꞌ pucayaꞌ man di salamatatn tagal kasih karunia Tuhan Yesus; lekoa ugaꞌ ia kaꞌ koa.” 12 Lalu samua urakng nang ada diꞌkoa tadiapm nangngaratn Barnabas man Paulus, nang ngesahatn sigana hal-hal ajaip nang luar biasa nang Allah manjawat lewat nya dua kaꞌ antara urakng-urakng bangsa lain nang bukeꞌ Yahudi. 13 Lakaꞌ Paulus man Barnabas ngomong, Yakobus bakata, “page samadiꞌatn, coba dangngaratn aku. 14 Simon dah ngesahatn leamae Allah pamulaꞌatnnya nojokatn kabaikatn ati-Nya kaꞌ urakng-urakng nang bukeꞌ Yahudi, man bamaksut milih dari ia kaꞌ koa urakng-urakng lain nang jajiaꞌ umat-Nya. 15 Hal koa sasuai man pakataatn-pakataatn nabi-nabi lea nang taconteng:
16 ‘Lakaꞌ koa Aku atakngngaꞌ agiꞌ,’
kata Allah, ‘Aku madiriatnnaꞌ agiꞌ karajaan Daut nang dah rusak.
Hal koa lea kemah nang dah roboh.
Tapi Aku madiriatnnaꞌ kemah koa agiꞌ.c
17 Supaya samua urakng lain ngagoꞌ Tuhan
man sigana bangsa nang inaꞌ kanal Allah, nang dimadah Ku-ngampuꞌ
lea koa lah Pirman Allah nang manjawat sigananya nian.
18 Hal koa dah di tauꞌatn dari deꞌe.’
19 “Jaji nurut pandapat ku,” kata Yakobus, “diriꞌ inaꞌ mulih nyusahiꞌ urakng-urakng nang bukeꞌ Yahudi koa nang dah nyarahatn diriꞌnya kaꞌ Allah. 20 Tapi diriꞌ arus nyonteng surat kaꞌ ia kaꞌ koa man nasehatiꞌnya biar ia kaꞌ koa ame makatn makanan nang inaꞌ baraseh nang dah di ngaremahan, ame babuat sigana macam dosa (pikiran, pakataatn, man ahe nang dipanjawat) nang baubungan man kamaluatn talino, ame makatn isiꞌ laok nang mati di nyakel tagal darahnya inaꞌ kaluar, ato makatn darah.d 21 Tagal Ukum Musa dah dari deꞌe di ngesahatn kaꞌ samua kota man dimacaatn kaꞌ tiap ari Sabat kaꞌ rumah tampat sumbayang.”
Surat kaꞌ urakng-urakng Antiokia nang dah pucayaꞌ
15:22-34
22 Lakaꞌ koa Rasul-rasul man pamimpin-pamimpin, man ugaꞌ sigana anggota jamaat naap kaputusan untuꞌ milih sangahe urakng dari nya kaꞌ koa nang di utusaꞌ kaꞌ Antiokia sama-sama Paulus man Barnabas. Jaji ia kaꞌ koa milih Silwanus man Yudas nang di nalah Barsabas. Dua urakng nian, urakng-urakng nang tapandang kaꞌ antara urakng pucayaꞌ kaꞌ Yerusalem. 23 Kaꞌ Silwanus man Yudas ia kaꞌ koa ngiripm surat nang bunyinya lea nian, “Kaꞌ samua page samadiꞌatn dari bangsa lain nang bukeꞌ Yahudi, nang badiapm kaꞌ Antiokia, Siria man Kilikia. Salam dari kami, rasul-rasul man pamimpin-pamimpin, sodara saiman kitaꞌ. 24 Kami nangngar ada sangahe urakng kaꞌ antara kami nang dah ampus kaꞌ kitaꞌ, ia kaꞌ koa ngajar kitaꞌ man hal-hal nang manjawat kitaꞌ ragu man bimbang kaꞌ kapucayaꞌatn kitaꞌ. Tapi kami inaꞌ ngiripm ia kaꞌ koa untuꞌ atakng ngajar kitaꞌ. 25 Tagal koa, kami samua soteꞌ ati naap kaputusan untuꞌ milih dua urakng man ngiripm ia kaꞌ koa kaꞌ kitaꞌ barage man kadua sodara terkasih diriꞌ Barnabas man Paulus. 26 Kadua urakng nian dah bataroh nyawa tagal Tuhan diriꞌ Yesus Karistus. 27 Jadi, kami ngiripm Yudas man Silwanus kaꞌ page samadiꞌatn. Ia kaꞌ koalah nang nyampeatnnaꞌ babaro kaꞌ kitaꞌ barita nang taconteng kaꞌ dalapm surat nian ugaꞌ. 28 Tagal kaputusan Roh Kudus man ugaꞌ kami, biar kaꞌ kitaꞌ inaꞌ di tanggongan ubaꞌatn nang barat, dari pada ubaꞌatn nang palalu nian ihan: 29 Ame makatn makanan nang inaꞌ baraseh nang dah dingaremahan, ame muat sigana macam dosa (pikiran, pakataatn, man ahe nang dipanjawat) nang baubungan man kamaluatn talino, ame makatn isiꞌ laok nang mati di nyakel, ato makatn darah. Kadeꞌ kitaꞌ nyaga diriꞌ dari hal-hal koa, kitaꞌ dah manjawat nang baik. Nian ihan surat mpat kaꞌ kami, tarimaꞌkasih!”
30 Lakaꞌ bapadah, Yudas man Silwanus barangkat kaꞌ Antiokia. Diꞌkoa nyadua nyaruꞌ sigana anggota jamaat bakomoꞌ lalu nyampeatn isiꞌ surat koa. 31 Takaꞌ anggota-anggota jamaat maca surat koa, ia kaꞌ koa repo sidi kaꞌ isiꞌ surat koa nang ngibur atinya kaꞌ koa. 32 Yudas man Silwanus nian nabi ugaꞌ, ia kaꞌ koa lama nasehatiꞌ kaꞌ page samadiꞌatn nang pucayaꞌ kaꞌ Antiokia koa untuꞌ nguatatn nya kaꞌ koa. 33 Lakaꞌ Yudas man Silwanus badiapm sangahe lama kaꞌ diꞌkoa, urakng-urakng pucayaꞌ kaꞌ Antiokia koa ngiripm ia kaꞌ koa mulakng man nyuruh nyampeatn salam kaꞌ urakng-urakng Yerusalem nang ngiripm nya dua. 34 Tapi Silwanus mutusatn untuꞌ tatap badiapm kaꞌ Antiokia.
Paulus man Barnabas bararaꞌ
15:35-41
35 Paulus man Barnabas ugaꞌ badiapm sangahe lama kaꞌ Antiokia. Kaꞌ diꞌkoa ia kaꞌ koa ngajar man ngesahatn pakataatn Allah kaꞌ urakng rami diꞌkoa. 36 Inaꞌ lama lakaꞌ koa Paulus bakata kaꞌ Barnabas, “Injeꞌ diriꞌ ampus naboꞌ page samadiꞌatn nang pucayaꞌ kaꞌ Yesus kaꞌ sigana kota-kota diꞌmae diriꞌ dah ngesahatn pakataatn Allah; Supaya diriꞌ neleꞌ leamae kaadaannya kaꞌ koa.” 37 Barnabas maoꞌ mabaaꞌ Yohanes nang di nyabut ugaꞌ Markus, 38 tapi Paulus marasa inaꞌ baik maba ia, tagal Markus dah ningalatn nya kaꞌ koa kaꞌ Pampilia man baiꞌ karaja sama man ia kaꞌ koa.e 39 Jaji Paulus man Barnabas batangkar sampe nyadua bapisah: Lalu Barnabas maba Markus balayar kaꞌ Siprus. 40 Tapi Paulus milih Silwanus, man lakaꞌ disarahatn di page samadiꞌatn koa kaꞌ kasih karunia Allah 41 Barangkatlah ia ngulilikngiꞌ Siria man Kilikia sambil nguatatn jamaat-jamaat diꞌkoa.