Batujuh urakng nang dimilih untuꞌ palayanan
6:1-7
6
Siaꞌ lama siaꞌ batambah rami urakng-urakng nang ngikutiꞌ Yesus. Waꞌtu koa urakng-urakng Yahudi nang babahasa Yunani, jaji naꞌ sanang kaꞌ urakng-urakng Yahudi nang babahasa Ibrani. Ayungannya naꞌ sanang tagal nangbini-nangbini janda kaꞌ koa inaꞌ agiꞌ namu pamakanan kaꞌ dalapm pambagiꞌan makanan tiap arinya. 2 Koalah tagalnya, kadua balas rasul koa ngumpulatn samua pangikut man bakata kaꞌ ayungannya, “Nanaꞌ edoꞌ kadeꞌ kami baranti matakatn pakataatn Allah, untuꞌ ngurus soꞌal-soꞌal makanan. 3 Jaji page samadiꞌatn gagoꞌlah kaꞌ antara kitaꞌ batujuh urakng nanglaki nang dah ditauꞌatn baik, bijak, man panuh di Roh Kudus Allah. Supaya kami makenya untuꞌ ngurus Soꞌal-soꞌal koa tadi; 4 Jaji kami babaro bisa tekun kaꞌ dalapm doꞌa man ngajaratn pakataatn Allah.” 5 Samua urakng kaꞌ koa pun satuju kaꞌ saran naꞌ rasul-rasul koa. Lalu urakng kaꞌ koa milih Stepanus, urakng nang pucayaꞌ batol kaꞌ Tuhan Yesus man nang dipanuhiꞌ Roh Kudus Allah. Tapilih ugaꞌ : Pilipus, Prokhorus, Nikanor, Timon, Parmenas, man Nikolaus urakng Antiokia; ia koa bukeꞌ urakng Yahudi tapi dah masok agama Yahudi. 6 Batujuh urakng nang tapilih koa tadi dimaba kaꞌ rasul-rasul, lalu rasul-rasul koa badoꞌa sambil ngangkat langannya mintaꞌ barakat Allah untuꞌ batujuh urakng koa tadi.7 Ampa koalah barita dari Allah siaꞌ tasabar man pangikut-pangikut Tuhan Yesus kaꞌ Yerusalem pun siaꞌ batambah rami. Lekoa ugaꞌ manyak imam nang nyarahatn diriꞌnya pucayaꞌ kaꞌ Tuhan Yesus.
Stepanus di urakng Yahudi nangkap
6:8-15
8 Stepanus koa idupnya sidi di Allah marakatiꞌ, sampe ia bisa ngadaatn manyak kaajaipatn man hal-hal ajaip nang luar biasa kaꞌ tangah-tangah masarakat. 9 Tapi ada urakng-urakng nang nantakng Stepanus; Urakng-urakng kaꞌ koa urakng Yahudi dari Kirene man Aleksandria. Urakng-urakng Yahudi dari Kilikia man Asia, ia kaꞌ koa anggota rumah tampat sumbayang nang disabut rumah tampat sumbayang urakng-urakng Libertini. Samua urakng kaꞌ koa baadu molot man Stepanus. 10 Tapi inaꞌ saurakng pun dari urakng kaꞌ koa nang manang baadu molot koa, tagal Roh Kudus mareꞌ kaꞌ Stepanus kapanean untuꞌ bakata-kata. 11 Lalu mulaiꞌlah urakng-urakng kaꞌ koa ngasut urakng lain untuꞌ matakatn: “Kami dah nangngar Stepanus nian ngina Musa man ngujat Allah.” 12 Lekoalah cara ayukngnya ngasut urakng-urakng man pamimpin-pamimpin Yahudi sarata guru-guru agama. Lalu ayukngnya ampus naap Stepanus, mabanya ngadap Sidang Agama Yahudi. 13 Ada ugaꞌ saksi-saksi palsu nang ayukngnya maba untuꞌ mareꞌ katarangan-katarangan. Saksi-saksi kaꞌ koa bakata, “Urakng nian kaja ngina Rumah Kudus Allah man ugaꞌ ngina ukum nang di Musa nyampeatn, 14 barang kami dah nangngar babaro ia koa bakata, sagaꞌ Yesus urakng Nasaret koa ngancuratnnaꞌ Rumah Kudus Allah nian man ngubahaꞌ adat istiadat nang di nyampeatn Musa kaꞌ diriꞌ!” 15 Samua urakng nang ikut kaꞌ dalapm Sidang Agama koa neleꞌ Stepanus. Tapi urakng-urakng koa neleꞌ muhanya nojokatn kabaikatn lea muha malaekat.