Petrus man Yohanes di Ngadapatn kaꞌ Sidang Agama Yahudi
4:1-22
4
Takaꞌ Petrus man Yohanes tagah ngomong man urakng-urakng kaꞌ koa, imam-imam man kapalaꞌ pangawal Rumah Allah, sarata ugaꞌ urakng-urakng Saduki atakng kaꞌ Petrus man Yohanes. 2 Urakng-urakng kaꞌ koa sidi miah bera tagal Petrus man Yohanes bakata kaꞌ urakng-urakng kaꞌ koa, kadeꞌ Yesus dah mulakng idup dari kamatiatn. Nang koa muktiatn kadeꞌ urakng mati idupaꞌ agiꞌ. 3 Tagal koa, ayungannya nangkap naꞌ rasul badua koa, lalu namaꞌannya kaꞌ dalapm pinjara. Tagal ari dah malam, jaji Petrus man Yohanes dinahan kaꞌ diꞌkoa sampe ampaginya. 4 Tapi urakng-urakng nang dah nangngar ajaran rasul-rasul koa, manyak nang pucayaꞌ. Jumbalah ayungannya batamah sampe jaji kira-kira lima ribu urakng nang laki.5 Ampaginya pamimpin-pamimpin Sidang Agama Yahudi, pamimpin-pamimpin Yahudi man guru-guru agama bahaupm kaꞌ Yerusalem. 6 Ayungannya batamu Imam Agung Hanas, man Kayapas, Yohanes, Aleksander, lalu sigana nang masih kaluarga imam agung koa. 7 Petrus man Yohanes dingincakng ngadap nya kaꞌ koa, lalu ia kaꞌ koa batanyaꞌ: “Leamae caranya kitaꞌ nyamuhatn urakng nang elat koa? Man kakuatan ato man kuasa dari sae kitaꞌ manjawatnya koa?”
8 Petrus nang dinguasai Roh Kudus nyahut, “Kitaꞌ pamimpin bangsa man Kitaꞌ anggota sidang! 9 Kadeꞌ kami dingadiliꞌ ari nian tagal babuat edoꞌ untuꞌ mantoꞌ urakng elat, man kitaꞌ maoꞌ nauꞌan lemae urakng koa dinyamuhatn. 10 Nah kitaꞌ sigana pamimpin man sigana kitaꞌ bangsa Israel pun arus nauꞌan kadeꞌ urakng nian badiri ampeatn nian man tubuh nang sehat kaꞌ adapatn kitaꞌ tagal kakuatan man kuasa dari Yesus Karistus urakng Nasaret koa. Kitaꞌ dah makulatn Yesus koa kaꞌ kayu salip, tapi Allah dah ngidupatn-Nya agiꞌ. 11 Yesus nianlah nang dimaksut kaꞌ ayat Kitab suci nian,
‘Batu nang di anggap inaꞌ baguna di kitaꞌ tukang-tukang bangunan,
dah jaji batu dasar.’a
12 Jaji Ia ihan sekoꞌ-sekoꞌnya nang baya nyalamatatn Talino. Inaꞌ ada nang lain. Barang kaꞌ sigana aiꞌ tanah kahe Ia ihan nang di Allah milih jaji panyalamat Talino.”
13 Takaꞌ anggota-anggota sidang neleꞌ kabaranian Petrus man Yohanes man nauꞌan, kadeꞌ kaduanya urakng biasa nang inaꞌ tapalajar, ia kaꞌ koa kaheranan; man ia kaꞌ koa nganal naꞌ Petrus man Yohanes koa panunaꞌ Yesus. 14 Tagal ia kaꞌ koa neleꞌ kaꞌ urakng nang dah samuh koa badiri kaꞌ sabalah naꞌ Petrus man Yohanes, ia kaꞌ koa inaꞌ baya bakata ahe-ahe untuꞌ ngalawannya. 15 Lakaꞌ koa ayungannya nyuruh Petrus man Yohanes ningalatn samiꞌ tampatnya basidang, lalu ayungannya bapakat. 16 Man bakata: “Ahe nang diriꞌ maoꞌ panjawat kaꞌ urakng badua naun barang sigana urakng kaꞌ Yerusalem dah nauꞌan kadeꞌ kaajaipatn nang luar biasa koa jaji lewat nya badua, man diriꞌ inaꞌ bisa nyangkal hal koa. 17 Tapi, biar barita nian inaꞌ siaꞌ tasabar luas kaꞌ antara urakng rami, diriꞌ palalu ngancam man maiꞌan nya dua koa biar inaꞌ ngomong agiꞌ kaꞌ sae pun make dama Yesus urakng Nasaret koa.”
18 Jaji ia kaꞌ koa nyuruh Petrus man Yohanes tamaꞌ agiꞌ kaꞌ tampat sidang. Lalu ia kaꞌ koa maiꞌan kadua rasul koa untuꞌ ngajar man ngomong kaꞌ saepun tentang Yesus.
19 Tapi Petrus man Yohanes nyahut, “Pikirlah babaro di kitaꞌ ahe nang banar kaꞌ adapatn Allah: Nurutiꞌ parentah kitaꞌ ato keꞌ nurutiꞌ parentah Allah. 20 Tagal kami inaꞌ bisa badiapm ngomong tentang ahe nang dah kami neleꞌ man kami nangngar babaro.” 21 Anggota-anggota sidang koa inaꞌ bisa namu soteꞌ alasan pun untuꞌ ngukum naꞌ Petrus man Yohanes. Jaji ia kaꞌ koa ngancam kadua rasul koa, lalu ngalapasatn kadua-duanya man ia kaꞌ koa ugaꞌ galiꞌ, neleꞌ sigana urakng muji-muji Allah.
22 Tagal urakng elat nang dah di nyamuhatn man cara nang ajaip koa dah labih dari ampat puluh tahutn umurnya.
Urakng-urakng pucayaꞌ mintaꞌ kabaranian dari Allah
4:23-31
23 Lakaꞌ Petrus man Yohanes di ngalapasatn, nyadua ampus kanaꞌ ayukng-ayukngnya man ngesahatn sigana ahe nang di imam-imam kapalaꞌ man naꞌ pamimpin-pamimpin Yahudi koa ngataatn kaꞌ ia kaꞌ koa. 24 Lakaꞌ nangngar gesah koa, ayungannya lalu badoꞌa kaꞌ Allah, “Auꞌ Kitaꞌ Allah nang makajaji langit man aiꞌ tanah, laut man sigana isiꞌnya.b 25 Man Roh Kudus Kitaꞌ, Kitaꞌ suah ngomong lewat eneꞌ uyut kami Daut, ia koa amba Kitaꞌ; Kitaꞌ bakata,
‘ngahe urakng-urakng nang inaꞌ kanal kaꞌ Tuhan bera;
ngahe bangsa-bangsa manjawat rancana nang inaꞌ baguna?c
26 Raja-raja dunia basiap-siap untuꞌ baparang,
man naꞌ pamimpin basatu
ngalawan Allah man Raja Panyalamat.’
27 Tagal sabatolnya dah bakomoꞌ kaꞌ dalapm kota nian Herodes, Pontius Pilatus, sarata urakng-urakng nang inaꞌ kanal kaꞌ Allah man urakng-urakng Israel ngalawan Yesus, Amba Kitaꞌ nang Kudus, nang dah Kitaꞌ ngangkat jaji Raja Panyalamat.d 28 Tapi tagal Kitaꞌlah nang Maha Koasa, sigananya koa dah jaji pas man ahe nang di Kitaꞌ rancanaatn dari deꞌe. 29 Ampeatn, Tuhan, teleꞌ ba leamae ayungannya ngancam kami. Man porongan kami, ulutn-ulutn Kitaꞌ nian, matakatn barita Kitaꞌ man inaꞌ galiꞌ. 30 Kiraꞌnya Kitaꞌ mantoꞌ nyamuhatn urakng nang rongkoꞌ, man kuasa Kitaꞌ manjawat tanda-tanda man hal-hal ajaip nang luar biasa man dama Yesus Ulutn Kitaꞌ nang Kudus.”
31 Takaꞌ ayungannya badoꞌa, tampatnya bakomoꞌ koa jaji bagagar, ayungannya binsiꞌ di Roh Kudus Allah, lalu ia kaꞌ koa ngesahatn pasatn dari Allah sidi barani.
Cara Idup Jamaat
4:32-37
32 Sigana pakomoꞌan urakng pucayaꞌ kaꞌ Tuhan Yesus, idup saati sapikir. Inaꞌ ada urakng nang bakata kadeꞌ harata nang nya ngampuꞌ babaro ihan. Sigana nang di nya kaꞌ koa ngampuꞌ nya make untuꞌ kapantingan sama-sama.e 33 Man kuasa nang ayaꞌ rasul-rasul mareꞌ kasaksian kadeꞌ Tuhan Yesus dah mulakng idup. Jaji Allah sidi marakatiꞌ ayungannya. 34 Koa tagalnya inaꞌ ada saurakngpun nang bakakurangan kaꞌ antaranya kaꞌ koa; Tagal samua urakng nang ngampuꞌ tanah ato rumah, nyual nang nya ngampuꞌ koa, lalu asilnya koa nya maba 35 lalu nya ngalakaꞌatn kaꞌ adapatn paha rasul-rasul; baruꞌ nya magi-magiatn kaꞌ sigana urakng pas man kapalaluatnnya.