Petrus nyamuhatn urakng elat
3:1-10
3
Waꞌtu koa sakitar jam talu ayungannya kaꞌ koa daꞌ Yohanes man Petrus ampus kaꞌ Rumah Kudus Allah untuꞌnya ikut jam badoꞌa. 2 Kaꞌ pamobok pintu Rumah Kudus Tuhan nang dipadah “Pamobok Edoꞌ,” ada saurakng nanglaki nang dah elat dari ia di maranakatn. Miakng ari ia koa di ngantat kaꞌ tampat koa untuꞌnya ngadaꞌ pamareꞌ urakng nang ngalintas kaꞌ tampat koa. 3 Lalu nya neleꞌ daꞌ Yohanes man Petrus giꞌ tagah bajalatn notok Rumah Allah, ia koa mintaꞌ pamareꞌ kaꞌ ayukngnya. 4 Jaji Petrus man Yohanes neleꞌ ia koa, lalu Petrus bakata kaꞌ ia, “Coba teleꞌ kaꞌ kami!” 5 Jaji ia pun maratiatnniꞌ naꞌ Petrus, baarap namuaꞌ pamareꞌ. 6 Tapi Petrus bakata: “Amas man Perak inaꞌ kaꞌ aku, tapi ahe nang ku ngampuꞌ, ku bareꞌatn kaꞌ kao: Man dama Yesus Karistus urakng Nasaret koa bajalatnlah!” 7 Lalu nya nyingiꞌiꞌ kokot kanan urakng elat koa di Petrus, mantoꞌnya lumpat, sakajab koa ugaꞌ pahanya jaji kuat man bisa badiri. 8 Ia koa pun lalu lumpat pane badiri man bajalatn kaꞌ kea kaꞌ naun nunaꞌan naꞌ Petrus man Yohanes tamaꞌ kaꞌ Rumah Allah, sambilnya bajalatn man baburansakng karepo-repoatn ia muji Allah. 9 Sigana urakng neleꞌnya tiba-tiba pane bajalatn man ia tarus muji-muji Allah. 10 Urakng-urakng kaꞌ koa pun nauꞌan kadeꞌ ia koa urakng elat nang kaja duduk bapintaꞌ kaꞌ pamobok pintu nang dipadah pamobok Edoꞌ Rumah Allah, tagal koa ayukngnya pun takajut man heran neleꞌ ahe nang dah tajaji kaꞌ ia.Petrus bakotbah kaꞌ dalapm Rumah Allah
3:11-26
11 Urakng nang dah samuh koa tarus maꞌan nunaꞌan Yohanes man Petrus. Lalu sigana urakng rami nang kaheran-heranan koa pun ampus ugaꞌ komoꞌ sama-sama kaꞌ alaman nang di madah “Teras Salomo.”a 12 Takaꞌ Petrus neleꞌ urakng rami koa ia bakata, “O urakng-urakng Israel, ngahe ba kitaꞌ heran kaꞌ kajadian nian? Ngahe kitaꞌ neleꞌ tarus kaꞌ kami? Ahe keꞌ kitaꞌ pikir urakng nian pane bajalatn tagal kuasa kami ato tagal kami ngasiꞌ kaꞌ Allah? 13 Bukeꞌ kami, tapi Allah nang nyamuhatnnya. Allah nang disambah di Abraham, Isak man Yakup, Allah eneꞌ moyang diriꞌ koalah nang dah manjawatnya koa untuꞌ kamuliaatn Yesus, Amba-Nya. Yesus koalah nang di kitaꞌ nolak, man kitaꞌ nyarahatn Yesus kaꞌ Pilatus untuꞌ di ukum mati, nang sabatolnya Pilatus inaꞌ satuju kaꞌ tuntutan kitaꞌ.b 14 Kitaꞌ baiꞌ ngakoꞌiꞌ Yesus urakng nang Suci man Banar, lalu kitaꞌ nantakng-Nya man mintaꞌ kaꞌ Pilatus biar ngalapasatn saurakng pamunuh untuꞌ kitaꞌ.c 15 Man kitaꞌ munuh Yesus nang sabatolnya Ia koalah sumber paridupatn diriꞌ man nang dah Allah ngidupatn agiꞌ mpat kaꞌ kamatiatn. Tagal kami nian nang neleꞌ babaro. 16 Man tagal kapucayaꞌatn dalapm Dama Yesus Karistus, koalah nang dah nguatatn urakng nang kitaꞌ neleꞌ man nang kitaꞌ nganal nian; man kapucayaꞌatnnya koa dah mareꞌ kasamuhatn kaꞌ urakng nian kaꞌ adapatn kitaꞌ samua. 17 Jaji kitaꞌ samuanya boh, aku nauꞌan kadeꞌ kitaꞌ man pamimpin-pamimpin kitaꞌ babuat macam koa kaꞌ Ia, jukut kitaꞌ inaꞌ nauꞌan ahe nang tagah kitaꞌ ngarajaatn. 18 Tapi man cara koalah Allah nyajiatn ahe nang dah-Nya ngataatn kanaꞌ nabi-nabi-Nya deꞌe, kadeꞌ Raja Panyalamat koa arus singsara sampe mati. 19 Jaji page samadiꞌatn sadarlah man batobatlah, ataknglah kaꞌ Allah biar Ia ngamponiꞌ sigana dosa kitaꞌ. 20 Allah mareꞌ ati nang lapang kaꞌ kitaꞌ. Allah ngiripm Yesus ampus kaꞌ kitaꞌ tagal Ia koa nang di Allah nantuatn jaji Raja Panyalamat. 21 Yesus arus badiapm kaꞌ saruga, sampe Allah nyajiatn samuanya jaji baharu lea nang suah Ia madahatn kaꞌ nabi-nabi-Nya nang kudus pansa doloꞌnya. 22 Musa suah bakata, ‘Allahnyu ngiripmaꞌ saurakng dari bangsa kitaꞌ babaro lea Ia ngiripm aku. Kitaꞌ arus nangngaratn sigana ahe nang di nabi koa ngataatn kaꞌ kitaꞌ.d 23 Urakng nang baiꞌ maratiatn ahe nang dinabi ngataatn koa, urakng koa dimuang dari umat Allah man dibunuhaꞌ.’ 24 Mulaiꞌ dari Nabi Samuel man sampe lakaꞌ ia koa, samua Nabi nang lain ugaꞌ dah banubuat tentang jaman nian. 25 Kitaꞌlah nang jaji waris janji-janji koa man namu bagiatn dalapm pajanjian nang dah di Allah panjawat man eneꞌ uyut diriꞌ, takaꞌ Ia baPirman kaꞌ Abraham: Di katurunan nyu sigana bangsa kaꞌ aiꞌ tanah dibarakatiaꞌ.e 26 Koa tagalnya Allah milih amba ulutn-Nya, lalu nyuruh Ia atakng kaꞌ kitaꞌ labih doloꞌ, biar Ia marakatiꞌ kitaꞌ. Koa cara Ia marakatiꞌ kitaꞌ man manjawat kitaꞌ batobat dari cara idup kitaꞌ nang jahat.”