Oengani na bɔphɛi á mbɛa
4
1 Cɔ, Měma á Mokonga ayɔngi bhase gea, ka mbenɔ á sungiaga, bakpa bunɛngbo bádeketande beekea, báǒbea baketi na bɔphɛi nɛbɔ á mbɛa. 2 Bědhemisande na batɔa-maibhe na batɔa mbɛa íbunde měma abɔ aújukani bea kema nde aɛkɛkanigi na nsa. 3 Bakpa ndɔ báoimisia eyamani, bá phɔtɔ oimisia eaga ea nɛngbo nnde Mokonga dáconji gǎkɛ u ka gea babeeki, bunde báoúbha doni báeɛ u na bhebha á Mokonga. 4 Cɔ, kema bhui nde Mokonga dáconji a anjaa, nna na kau nde akeni taa i, ambe bensegɛ gǎkɛ Mokonga mbenɔ nde beoea u 5 nga, nyɔngɔ á Mokonga n'ɛmɛmi áɔbɔngisia eea bhui mosá á Mokonga.Mbhɛdanigi anjanja ndea Kiísito Yéso
6 Cɔ, kangodeɛ á badhakɔ nyɔngɔ ndɔ bhase, obande mbhɛdanigi anjanja ndea Kiísito Yéso, mmbe eenda akɛ aobea nyɔngɔ á beekea na bɔphɛi anja nde dótetemisi. 7 Kóbeekeɛmbɛ gǎkɛ egani á jai-jai, n'índe atingani moangɔ á beekea. Ɔɛmbanisa sasakɔ ka tambea anja mosá á Mokonga. 8 Eya, ɛ̌mbanisa na kema á nyama á nyama a gǎkɛ na kantíti ka kema. Tambea anja mosá Mokonga aunge andiu na kantíti ka kema bhui nga, k'índɔ unge bena mɔkɔ á enda ka matu nde na ka matu nde abhikande. 9 Nndɔ ande nyɔngɔ á doni nnde akeni ka bakpa bɔbhu beekea i. 10 Cɔ, kabɛ na beotambaga na beomana, ande ka gea bebhisi nsebeɔ nɛsu ka Mokonga mmbe anaenda, mmbe ande Namisi á bakpa bɔbhu na Namisi phɛ̂ á bunde bábeeki. 11 Cɔ, ósosea na óphangiaga nyɔngɔ ndɔ bhui.
12 Ambe nkpa kakɔbɛnjiɛgɛmbɛ ka nyɔngɔ nde onde moganda. Óbɛ ndiu mphangiɔ ka babeeki, ka yɔngɛa akɔ, tambea akɔ, k'ekondi, beekea, ka tambea akɔ anja mosá á Mokonga. 13 Suia tanga á buku á Mokonga mosá á bakpa, ka phɛa abɔ na phangiaga abɔ, na ka bii ne kidiande. 14 Kɔbɛnjiɛgɛmbɛ bhɛdaneaga egabhɔ á bonjanja ékonde nde asubi akɔ, nnde dábakophi ka bii báɔtu-nyɔngɔ dábayɔngi na ka bii bagbɛga dábakobhisii njaga. 15 Cɔ, Bhisa měma akɔ kindɔ bhui, óyamea bhuakɔ k'ekuma nɛkɔ mpɔ, bakpa báɔnande gea, ootutuisa ekuma.
16 Cɔ, ɔbɛ sasakɔ, amba tambea akɔ na bɔphɛi nɛkɔ anja , ótetemanɛ kau. Ka nyɔngɔ nde oogea bó, ǒamisande sasakɔ na amisa á bundɔ báɔkɔɔka.