Tambea á baambi-kanisa
3
1 Nyɔnga nde ande doni: Aoba nkpa n'aokonda ekuma á bá n'ambi-kanisa, akondi ekuma anja. 2 Nengi-kanisa ábɛ kanga nyɔngɔ ajede, ábɛ na nke moci tɔndɔ, áámbɛ tambɛa akɛ ánjá sasakɛ ábɛ mubhaphi ábɛ na měma anja, ábɛ nsesi-bakeni na mphangigi anjanja. 3 Kabɛmbɛ ntɔ-ɛ́bhɛdi á makana n'emani. Abɛ ndiu ntɔa-aphɔngɔ na bɔjɛjɛ. Kábɛmbɛ nkondi bangɔa phɛɛ. 4 Aangɛ endu nɛkɛ anja, baniki nɛkɛ bábeɛ bɔphɛi nɛkɛ ka měma abɔ bhui. 5 Cɔ, aobá nkpa nakáuúbha angá ekombo nɛkɛ anja, a angande kanisa ndea Mokonga bo? 6 Kabɛmbɛ moKiísito á kɛ̌kɛ, ambe ěbhebhande, mbuisa i, Mokonga áotena nyɔngɔ nɛkɛ akpɛ. 7 Goto, bunde bána baKiísito bádigimisɛ nyɔngɔ nɛkɛ anja kage, bákam'bɛnjiɛgɛmbɛ na tá ka mɛ̌kɔ ndea nketia.Tambea á babhɛdanigi ndea ka kanisa
8 Babhɛdanigi ndea ka kanisa bábɛ phɔtɔ bakpa nde bákeni na ɔka abɔ, batɔa-doni, bákabɛmbɛ banu makana phɛ̂, bákakabɛmbɛ bangɔa ka maibhe-maibhe. 9 Bábɛ baambi-moangɔ á Mokonga na měma anja. 10 Mosá á bhisa á mbhɛdanigi ndea ka kanisa, akeni phɔ ɔnjia tambea abɔ bhǐbhibhi. Ayeoba na báka na nyɔngɔ á sɛka abɔ, mpɔ, báoba babhɛdanigi ka kanisa.
11 A phɔtɔ bo ka bake nde bande babhɛdanigi ndea ka kanisa, bábɛ bakpa nde bákeni na ɔka abɔ, bákabɛmbɛ n'ɛ̌sɔ ájede-jede, báambɛ tambɛa abɔ ánjá sasabɔ na bábɛ batɔa-kodoni ka kema bhui.
12 Mbhɛdanigi ndea ka kanisa ábɛ tɔ na nke moci. Aangɛ ekombo nɛkɛ bhui anja, baniki na bakpa bɔbhu bunde bák'endu nɛkɛ. 13 Ka bundɔ bábhɛdanigi anja bábande na bophombia, bábande phɔtɔ na nsebeɔ akpɛ ka beekea nɛbɔ k'ina á Kiísito Yéso.
Tambea á batɔ-ékombo ndea Mokonga
14 Nekodundui baoba nde, nanga nesebea bhika mɔtɛ akɔ kɛ̌kɛnde. 15 Cɔ, ne gǎkɛ koiphia kanga kidia, baoba nde aoengande ka tambea akɔ sɔsɔbɛ á ekombo ndea Mokonga. Ekombo ndɔ ande kanisa ndea Mokonga mmbe aoenda, ande ngeɔ na china á doni.
16 Bɔphɛi á doni ndɔ ande kema á bɔsɔmɛa, nnde Mokonga aubhisi, nande angbo phɛ̂, nnde nkpa nnaotoka naye!
Kiísito
dásɛnɛki n'ande nkpa,
Měma á Mokongab dán'digimisi gea ande ntɔa-doni.
Bamalaeke dábamɔ̌ni.
Báɔphɛa nyɔngɔ nɛkɛ k'ekuna bhui.
Bám'beeki k'ɔma bhui.
Mokonga dántaisi ka boombia na kobha.