Baoba a ko ibe ndea Pɔ́lɔ ka BaTɛsalɔníka
Nsesɔ
1
1 Ka babeeki á ka kanisa ndea Tɛsalɔníka sambani. Eme Pɔ́lɔ aámbé nenódundui baoba nde, ne kimoci na Síla, na Timɔtɛ́ɔ. Nedundu ka benu íbunde bo kimoci na Abhasu Mokonga, na Mɔkɔta Yéso Kiísito. 2 Abhasu Mokonga, na Mɔkɔta nɛsu Yéso Kiísito, ánophɛ bɔjɛjɛ na bonjánja ékondi.Mokonga atenande nyɔngɔ esande Kiísito ajaeka
3 Baya, akeni bénsegɛ Mokonga esa bhui ka phɔa anu. Aánja begeɛ bó nga, beekea nɛnu aɔmɔta phê, na ekondani nɛnu benu bɔbhu, nkpa miki ka dhakɛ amɔti phɔtɔ phê. 4 Ka bondɔ unge, beóbhebha ka phɔa anu mosá á batɔa-kanisa ndea Mokonga bhui ka nyɔ á moingi nɛnu na beekea nɛnu subi á tambaga bhui na kema ajede phɛ̂ nde bosubii.
5 Nndɔ a phɔtɔ uúbhisa bhase gea te, Mokonga ande nteni-nyɔngɔ kanga obayɔ. Nga, ka nyɔngɔ á phiphia anu tambaga ndɔ unge bokeni na ngia ka koboamɛ nɛkɛ nnde bootamba ka nyɔngɔ i. 6 Eya, Mokonga ande ntɔa-doni, ětambisagande bunde báonótambisaga. 7 Cɔ, benu íbunde bootambaga, Mokonga anophande muumbiɔ kimoci na besu mbenɔ nde Mɔkɔta Yésu abhikande ka toka na kobha, kimoci na bamalaeka nɛkɛ bunde bá na bukpɛkpɛ. 8 Adhidhande k'ɛɛmbɛ á nsa, ka tena á nyɔngɔ á bunde bánaomǔbha Mokongaa, na ya á beekea á Nyɔngɔ Anja ndea Mɔkɔta nɛsu Yéso Kiísito. 9 Tena á nyɔngɔ nɛbɔ, abande otukɔtukɔ á kanga sungiaga, na katana danga na Mɔkɔta, na katana danga na boombia á bukpɛkpɛ nɛkɛ.
10 Nndɔ atɔtɔkɛanaeka k'ɛsa á ja akɛ. Oa, bakpa nɛkɛ, bunde bám'beeki, bándokomisaeka, báotangaaga boombia nɛkɛ. Benu phɔtɔ, bobande sɔsɔbɛ abɔ, nga, bobeeki nyɔngɔ nde dɛ́bɛnɔtɔ̌mi.
11 Ka bondɔ unge, bɛɔmɛma Mokonga mbenɔ bhui ka phɔa anu. Bɛɔmɛma gea, Mokonga ánokakamisɛ ka mɔphani nɛkɛ. Atɔtɔkisɛ moangɔ nɛnu bhui bíndɔ akeni. Ageɛ bó na bukpɛkpɛ nɛkɛ. Atɔtɔkisɛ phɔtɔ ekuma nɛnu nde bogi ka nyɔngɔ á beekea akɛ. 12 Mpɔ, báobhebha ina á Mɔkɔta nɛsu Yéso ka nyɔngɔ anu, bâ phɔtɔ onóbhebha ka nyɔngɔ akɛ bondɔ. Nndɔ bhui atɔtɔkɛanande ka bonjánja ékondi ndea Mokonga na Mɔkɔta Yéso Kiísito.