5
1 Cɔ baya, kátókeni gea te, bénodunduiɛ nyɔngɔ á digimisa ésa na matu á ja a Mɔkɔta. 2 Nga, bo ye uubha gea, esa ndɔ abhikaeka bea nkukuba naobuna endu kipha, mɛn-éndu nakáubhi mosa. 3 Mbenɔ á ja akɛ, báyɔngande te: «Be na bɔjɛjɛ, bɛphɔngi phio!» Motuko-tuko â gǎkɛ ǒdhonda mɔngɔ moti. Bákáteɛku. Esa á ja a Mɔkɔta abande bea boae nandhondi ama ka eme.4 Baya, benu gǎkɛ, bókó bea bakpa nde bá ka keiphe bea bakpa nde esa á ja Mɔkɔta ědhondande bea nkukuba. 5 Bo ndiu batɔa-esa, batɔa-somani. Béké batɔa-kipha, batɔa-kaiphiɔ. 6 Ka bondɔ, bókoyengiɛmbɛ. Kodani ndiu iso, bɔ́ɛngɛphɛ. 7 Nga, kipha a unge bakpa báoda, bunɛngbo, makana aɔ́bhɛda. 8 Besu gǎkɛ, bende batɔa- somani. Ka bondɔ, békeyengiɛmbɛ. Ande gea te, beekea n'ekondani nɛsu ákengeanɛ na ngɔmbɛ á k'egogo ndea ntɔ-émani, nnde báconji na ngɔa. a Nsebeɔ nɛsu, á boamia ka měma, ábɛ phɔtɔ bea kuku á ngɔa nɛkɛ. bHK75B Roman soldiersBeekea n'ekondani nɛsu ákengeanɛ na ngɔmbɛ á k'egogo ndea ntɔ-émani, nnde báconji na ngɔa. Nsebeɔ nɛsu, á boamia ka měma, ábɛ phɔtɔ bea kuku á ngɔa nɛkɛ.Near 1 Thessalonians 5:8.
9 Nga, Mokonga dákásɔɔphani gea, esuia nɛkɛ ásoguiɛ. Dásɔɔphani ndiu gea, bébɛ na boamia ka měma, ka nyɔngɔ ékuma ndea Mɔkɔta nɛsu Yéso Kiísito. 10 Nga, yɛ, dásokui ka gea te, bíikɛ kimoti na yɛ, kabɛ nebesí, kabɛ nebe phɔ́tɔ ka mokonda k'esa á ja akɛ.
11 Cɔ, phiphisanani měma, gbagisanagani, bíndɔ bo yetɔ ogea kɛkɛ ndee.
Bɔphɛi danga-danga, á ka sungiaga a baobá́
12 Baya, bɛ̌̀nɔmɛmi, ɔ́bɔkani bakpa nde báɔmbhɛdaneaga Mokonga akpɛ sɔsɔbɛ anu. Nga, Mokonga ěbhisi gu anu ka phɛa anu. 13 Odokomisani, ókondagani ka nyɔngɔ ékuma nɛbɔ k'ina á Mɔkɔta.
Ikani na bɔjɛjɛ sɔsɔbɛ anu.
14 Baya, běnodengemisigi, ókeagani bakpa nde bánaɔbhɛda ka kema, ógbagisagani babɔbɔkɔ, ɔ́bhɛdɛani bakusi. Ophiphiani bakpa bɔbhu.
15 Oengani phɛ̂ gea, nkpa kansikisiɛ mɔnɔ dhakɛ bojede. Bógeanɛ ndiu bonjánja. Geani phɔtɔ bó ka bakpa bɔbhu
16 Bani na maseye esa bhui, 17 mɛmani Mokonga kanga á sungiaga, 18 nsegani ka nyɔngɔ nɛnu bhui. Nga, nyɔngɔ ndɔ ande mɔphɛ á Mokonga ka benu bunde bɔɔngani na Yéso Kiísito.
19 Bókoimisiɛ mɔnɔ ekuma ndea Měma á Mokonga. 20 Bókǒtondiɛ mɔnɔ bɔphɛi ndea baɔtu-nyɔngɔ. c 21 ěnjiani phɔ bɔphɛi bhui mosa, mpɔ, bóoamba nnde a anja. 22 Teani bojede bhubhui.
23 Mokonga, Mɛna-bɔjɛjɛ, ánophɛ měma anja phɛ̂, áambɛ enda anu bhui, ka gea, měma anu, ubhapha anu, na nyama anu, áikɛ kanga á bojede na ka bii Mɔkɔta nɛsu Yéso Kiísito asɛnɛkaeka. 24 Mokonga, mmbe ǎnɔɔphani, atɔtɔkisande nyɔngɔ ndɔ bhui, ka nyɔngɔ nde, nnaotinganisa mɔkɔ nɛkɛ.
25 Baya, mɛmani Mokonga ka nyɔngɔ asu.
26 Kotoanagani k'ina a Mɔkɔta. d
Mɔkɔ
27 Cɔ, nɛ̌̀nɔɔkusi k'ina a Mɔkɔta, tangani baobá́ nde, mosa á babeeki bɔbhu.
28 Bonjánja ékondi ndea Mɔkɔta nɛsu Yéso Kiísito, ábɛ na benu.