Tambea nde ambɔngɛi Mokonga
4
1 Cɔ, baya, ka gɔba á nyɔngɔ, bɛ̌̀nɔphɛi ye nyɔngɔ á tambea nde aɔmbɔngɛa Mokonga. Doni, botámbi tɔndɔ bó. Kɛkɛ nde gǎkɛ, bɛ̌̀nɔmɛmi na dengemisaga k'ina Mɔkɔta Yéso gea, bótetemisɛ phɔtɔ tambea ndɔ anja phɛ̂.2 Cɔ, buubhi ye bɔphɛi nde débenóngodi k'ina á Mɔkɔta Yéso. 3 Nga, Mokonga akondi gea, bóbɛ bakpa ba anja phɛ̂, bóbangɛ iɛbɛ, 4 bóikɛ ndiu na bake anu ka bonjánja bíndɔ akeni, 5 kanga á mɔphɛ ajede, botea anu bea bakpa nde bánaomǔbha Mokonga. 6 Ka bondɔ, nkpa kangeeɛ mɔnɔ dhakɛ ajede, ka nyɔngɔ á tunga á nkakɛ. Mɔkɔta atenande nyɔngɔ ndea bakpa ndɔ akpɛ. A tɔ bíndɔ débenóngodi na phɛa anu kala. 7 Nga, Mokonga dákásɔɔphani ka nyɔngɔ íɛbɛ, ǎsɔɔphani ndiu gea, bébɛ bakpa nɛkɛ ba anja phɛ̂. 8 Cɔ, nkpa nde aye bɔphɛi ndɔ, kánye nkpa nde amphɛi, anye ndiu Mokonga, mmbe ǎsophi Měma Anja nɛkɛ.
9 Cɔ, ka nyɔngɔ ékondani, ké na nyɔngɔ á dunduia anu. Nga, Mokonga sasa akɛ, dánophangi aphe ndɔ kala. 10 Eya, bǒkondi batɔa- Mokonga bɔbhu, bunde ba á ka kenombe á Makɛdhɔnía bhui. Baya, bɛ̌̀nɔphɛi gǎkɛ gea, bósuiɛ phɔtɔ ekondi ndɔ phɛ̂.
11 Suiani phɔtɔ ika ka bɔjɛjɛ. Bókongiɛ mɔnɔ ka nyɔngɔ ndea bakpa buangbo. Tetemisani ndiu ekuma á ka njaga anu sasa anu. a Nyɔngɔ ndɔ a tɔ bíndɔ débenóngodi. 12 Bo ye otetemisa ekuma á ka njaga anu sasa anu, bókódokomaneɛku ye bakpa. Bakpa nde bákámbeekimbɛ Kiísito, bâ phɔtɔ ǒnobhebha.
Esa á ja a Mɔkɔta
13 Baya, bekondi gea, bódigimisɛ doni nyɔngɔ á bakpa nde dábasí. Ande gea, bókobɛ mɔnɔ na bɔmbɛ bea bakpa nabána na nsebeɔ. 14 Besu gǎkɛ, bebeeki gea, Yéso dáku, Mokonga áonjujukisa. Ka bondɔ unge, bebeeki gea, ějujukisaeka bakpa nde dábasí nabámbeeki Yéso. Mbusa, Mokonga ěbhikisande bakpa nɛkɛ kimoti na Yéso, mɔtɛkɛ.
15 Cɔ, oani, beónongodea bɔphɛi nde Mɔkɔta nɛsu dásɔtɔ̌mi. Besu ibundɔ Yéso ǎsodhondande nebe phɔ́tɔ ka mokonda, bɛ́kɛ́mɛɛku bakpa nde dábasí mosa. 16 Nga, bɛɔkande ɛsɔ ángbó, á mɔphani, ɛsɔ á malaeka, n'ɛsɔ á mbengu ndea Mokonga. Mpɔ, Mɔkɔta sasa akɛ atokande na kobha, áodhidha. Mbusa, bakpa nde dábasí nadábambeeki Kiísito, bájujukande ka kukua mosa-mosa. 17 Kɛkɛ ndɔ, besu ibundɔ be phɔ́tɔ ka mokonda, betaiande kimoti na bɔ k'egugu phoi! Béodhondana na Mɔkɔta k'ego. Mpɔ, béoika na Mɔkɔta nkongopha. 18 Cɔ, phiphisanani měma ka nyɔngɔ ndɔ.